ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އަހްމަދު އަޒާންއާ ގުޅޭގޮތުން ދައުރުގައި ލިޔެފައިވާ އާޓިކަލް ނެގުމަށް ސިވިލް ކޯޓުން އަމުރުކޮށްފި އެވެ.

ކޯޓުން މިފަދަ އަމުރެއް ކުރީ ދައުރާއި ދެކޮޅަށް އަޒާން އެ ކޯޓަށް ހުށައަޅާފައިވާ މައްސަލާގައެވެ. އެ މައްސަލަ ހުށައެޅުމަށް ފަހު އަޒާން ވަނީ ވަގުތީ އަމުރަކަށް އެދިފަ އެވެ. އެއީ ދައުރުގައިވާ އާޓިކަލް ނަގަން އަމުރުކޮށް ދިނުމަށެވެ.

ކޯޓުން މިހާރު ވަނީ އެ އަމުރު ނެރެފަ އެވެ. އެ އަމުރު ނެރުނީ މައްސަލަ ނިމެންދެނެވެ. އެ އަމުރު ނެރެމުން ގާޒީ ވިދާޅުވީ އެފަދަ އަމުރެއް ނެރުނީ އެ އަމުރު ނުނެރެފިނަމަ އަޒާންގެ އަބުރަށް އުނިކަން އަންނާނެ ކަމަށް ފެންނާތީ ކަމަށެވެ.

ދައުރުގެ އެޑިޓަރު އަދި މަޝްހޫރު ނޫސްވެރިޔާ މޫސާ ލަތީފް ލިޔުއްވި މި އާޓިކަލްގައި ހަގީގަތާއި ހިލާފު ވާހަކަތައް ހިމެނޭ ކަމަށް ވިދާޅުވެ ދައުވާ ކުރައްވާނެ ކަމަށް އަޒާން ވަނީ އެ ދުވަހު ވިދާޅުވެފަ އެވެ. ދައުވާގައި އޭނާ އެދިފައިވަނީ އޭނާގެ އަބުރަށް އަރައިގަތްކަން ކަނޑައަޅަައިދިނުމަށާއި ގެއްލުމުގެ މައުނަވީ ބަދަލަކަށް 5،000 ރުފިޔާ ނަގައިދިނުމަށެވެ.

އަދި އެ މައްސަލަ ހުށައެޅުއްވުމަށް ގާނޫނީ ހަރަދުގެ ގޮތުގައި ހޭދަވި 28،670 ރުފިޔާގެ އިތުރުން މައްސަލައިގެ ރެޖިސްޓްރޭޝަން ފީ ނަގައިދިނުމަށެވެ.