ހިލޭޓީވީ ނަމަކަށް ކިޔާ ވެބްސައިޓަކުން ވަރލްޑްކަޕް ހިލޭ ދައްކާނޭކަމަށް ބުނެފައިވަނިކޮށް ސިވިލްކޯޓުން އެކަން ހުއްޓުވުމަށް އަމުރެއް ނެރެފިއެވެ.

ސިވިލްކޯޓުން މިފަދަ އަމުރެއް ނެރެފައިވަނީ ހިލޭޓީވީ ވެބްސައިޓުން ވަރލްޑްކަޕް ހިލޭ ދައްކާނޭކަމަށް ބުނެފައިވުމުން މިކަމާ ގުޅޭގޮތުން މީޑިއާނެޓުން ސިވިލްކޯޓަށް ހުށަހެޅި ވަގުތީ އަމުރަކާ ގުޅިގެންނެވެ.

މީޑިއާނެޓުން އެދުނު ވަގުތީ އަމުރުގައި ވަނީ ހިލޭޓީވީން މީޑިއާނެޓްގެ ހައްގުތަކަށް އަރައިގަންނަމުންދާ ކަމަށެވެ. ހިލޭ ޓީވީން މީޑިއާނެޓްގެ ފީޑްތައް އެއްކުރުމަށްފަހު އެފަރާތުގެ ވެބްސައިޓް މެދުވެރިކޮށް ފެންނާނޭކަމަށް ޓެލެގްރާމް ގްރޫޕްގައި ބުނެފައިވާކަމަށް ދައުވާކުރާ ފަރާތުން ވަނީ ބުނެފައެވެ. ވަރލްޑްކަޕް ދެއްކުމުގެ ރައިޓްސްނެތް ބަޔަކު ކުރާ މި އަމަލުތައް ވަގުތުން ވަގުތައް ނުހުއްޓުވައިފިނަމަ ދައުވާކުރާ ފަރާތުގެ މަސްލަހަތަށް އަދި އާންމުންގެ މަސްލަހަތަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ކުރިމަތިވާނޭކަމަށް މީޑިއާނެޓުން ސިވިލްކޯޓަށް ހުށަހެޅި ބަޔާނުގައި ވަނީ ފާހަގަކޮށްފައެވެ.

މައްސަލަ ހުށަހެޅި މީޑިއާނެޓްގެ މައްސަލައަށް ނިޔާ އިއްވަމުން ސިވިލްކޯޓުން ނެރުނު ވަގުތީ އަމުރުގައި ބުނެފައިވަނީ، ސިވިލްކޯޓުން ބަލަމުންދާ މި މައްސަލައާމެދު ގޮތެއް ކަނޑައަޅައި ނިމެންދެން ހިލޭ ވެބްސައިޓަށް ދިވެހިރާއްޖޭގެ އައިޕީ އެޑްރެސްތަކުން ނުވަދެވޭނޭހެން ހެދުމަށް ކޮމިޔުނިކޭޝަން އޮތޯރިޓީ އޮފް މޯލްޑިވްސްގެ މައްޗަށް އަންގައި އަމުރުކުރާކަމަށެވެ.