އެމްޑީޕީގެ ހަޔާތުގައި މިއަދަކީ ވަރަށް ތާރީހީ އިންތިހާބެއް އޮތް ދުވަހެކެވެ. އެއީ ކުރިއަށް އޮތް ފަސް އަހަރަށް އެމްޑީޕީގެ އިދާރީ އެންމެ އިސް މަގާމު, ޗެއާޕާސަން ކަމަށް ބޭފުޅަކު އިންތިހާބު ކުރުމެވެ. މިއަދުގެ އިންތިހާބުގައި ވާދަކުރީ ކުރީގެ ރައީސް މުހައްމަދު ނަޝީދާއި އެ ޕާޓީގެ ޕީޖީ ގުރޫޕްގެ މެންބަރު މީކާއީލް އަހްމަދު ނަސީމެވެ.
މުޅި ރާއްޖޭގައި ކުރިއަށް ގެންދިޔަ އިންތިހާބުގެ ނަތީޖާ މިހާރު ވަނީ ގާތްގަނޑަކަށް ސާފުވެފަ އެވެ. ތަފާތު ބޮޑުކޮށް އިންތިހާބު ކާމިޔާބުކޮށް ޗެއާޕާސަން ކަމަށް އިންތިހާބުވީ ރައީސް މުހައްމަދު ނަޝީދެވެ.
މި ފަހަރުގެ އިންތިހާބުގައި ރައީިސް އިބްރާހިމް މުހައްމަދު ސޯލިހްގެ ތާއީދު އޮތީ މީކާއީލަށެވެ. މީކާއީލްގެ ކެމްޕެއިންގައި ރައީސް ސޯލިހް އަމަލީ ގޮތުން ބައިވެރިވި އެވެ. މީކާއީލަށް ވޯޓްދޭން ތަކުރާރުކޮށް އެދިވަޑައިގަތެވެ.
ރައީސް ސޯލިހް، މީކާއީލްގެ ކެމްޕެއިންގައި
އެހެން ކަމުން މި އިންތިހާބުގެ ވާދަވެރިކަން އޮތީ ވަރަށް ބޮޑުވެފަ އެވެ. އިންތިހާބު ބެލެވުނީ ރައީސް ސޯލިހާއި ރައީސް ނަޝީދާއި ދެ ބޭފުޅުންގެ އިންތިހާބެއްގެ ގޮތުގަ އެވެ. އެމްޑީޕީގެ ބާރު ދެން ފުރޮޅޭނީ ކޮން ރައީސެެއްގެ އަތްމައްޗަށްތޯ ބެލުމުގެ އިންތިހާބެއްގެ ގޮތުގަ އެވެ.
ސޯލިހަށް ދެމޮޅެއް ނުހޯއްދެވުނު, ނަޝީދު އަލުން ބާރުވެރިކަމަށް
ރައީސް ނަޝީދާއި ރައީސް ސޯލިހް, އެމްޑީޕީގެ އެތެރޭގެ އިންތިހާބުގައި ފުރަތަމަ ވާާދަކުރެއްވީ 2023 ވަނަ އަހަރެވެ. އެއީ އެ އަހަރު އޮތް ރިޔާސީ އިންތިހާބުގައި އެމްޑީޕީގެ ޓިކެޓް ހޯއްދެވުމަށެވެ. އޭރު ރައީސް ސޯލިހް ހުންނެވީ ރައީސުލްޖުމްހޫރިއްޔާގެ މަގާމުގަ އެވެ. އެ މަގާމުގައި ހުންނެވުމުން އެމްޑީޕީގެ ރައީސްކަން ވެސް އޮތީ އެމަނިކުފާނަށެވެ.
އިންތިހާބުގެ ނަތީޖާ އައީ ރައީސް ސޯލިހްގެ ކޮޅަށް ބުރަވެގެންނެވެ. އެ ފަހަރުގެ އިންތިހާބުގައި ނަތީޖާ ގަބޫލުކުރަން ނަޝީދު ދެކޮޅު ހެއްދެވި އެވެ. އިންތިހާބުން މޮޅުވީ އެމަނިކުފާނު ކަމަށް އިއުލާނުވެސް ކުރި އެވެ.
ނަޝީދުގެ ސަޕޯޓަރުން
ނަތީޖާއެއްގެ ގޮތުން ރިޔާސީ އިންތިހާބަށް ރައީސް ސޯލިހް ނިކުންނެވީ ރައީސް ނަޝީދުގެ ތާއީދު ނެތި އެވެ. އަދި ފަހުން ދަ ޑިމޮކްރެޓްސް ނަމުގައި ޕާޓީއެއް އުފެއްދެވި އެވެ. އެމްޑީޕީން ވަކިވެ ރައީސް ސޯލިހާއި ދެކޮޅަށް ކެންޑިޑޭޓަކު ވެސް ނެރުއްވި އެވެ. ދެވަނަ ބުރުގައިވެސް ރައީސް ސޯލިހަށް ތާއީދުކުރަން ދެކޮޅު ހެއްދެވި އެވެ.
އޭގެ ފަހުން ދަ ޑިމޮކްރެޓްސް ދޫކޮށް ނަޝީދު އެމްޑީޕީއާ އަލުން ގުޅިވަޑައިގަތެވެ. އެހެން ކަމުން މިރޭގެ ތާރީހީ ކާމިޔާބީ އަކީ އެމްޑީޕީގައި ނަޝީދުގެ ބާރެއް ނެތި ތިން, ހަތަރު އަހަރެއް ފަހުން އަލުން ޕާޓީގެ ބާރުވެރިކަން އެމަނިކުފާނަށް ލިބުމެވެ.
ނަޝީދުގެ އަރިހުގައި ފައްޔަ
އަދި ރައީސް ސޯލިހަށް, ނަޝީދުގެ މައްޗަށް ދެވަނަ ފަހަރަށް މޮޅެއް ނުހޯއްދެވި އަލުން އެމަނިކުފާނުގެ މައްޗަށް ނަޝީދު މިވަނީ ކުރި ހޯއްދަވާފަ އެވެ. މިއާއެކު އެމްޑީޕީގެ ތަހުތު އަލުން ނަޝީދަށް ލިބިވަޑައިގަތީ އެވެ. އެ ޕާޓީގެ އިދާރީ އެންމެ އިސް މަގާމަށް ނަޝީދު ވަޑައިގެންނެވީ އެވެ.
ނަޝީދަށް ލިބުނު ކާމިޔާބީގެ ހަގީގީ ލީޑަރަކީ ފައްޔާޒް
މި ފަހަރުގެ އިންތިހާބަށް ނިކުންނެވުމުގައި ރައީސް ނަޝީދަށް އެންމެ ބޮޑު އިތުބާރަކަށްވީ އެމަނިކުފާނަށް, ކުރީގެ ޗެއާޕާސަން ފައްޔާޒް އިސްމާއީލް (ފައްޔަ) އެކީގައި ހުންނެވުމެވެ. ނަޝީދާއެކު ކެމްޕެއިނަށް ހުރިހާ ރަށަކަށް ވަޑައިގެންނެވި އެވެ.
ނަޝީދުގެ ވަފާތެރި ހުރިހާ މެންބަރުންގެ ނަޒަރުގައިވެސް އެމަނިކުފާނަށް ލިބުނު މި ބޮޑު ކާމިޔާބީގެ ހަގީގީ ލީޑަރަކީ ފައްޔާޒެވެ.
ބޮޑު ސުވާލަކީ އެމްޑީޕީއަށް ދެން ވާނީ ކިހިނެތްތޯ
މިރޭގެ އިންތިހާބުގެ ނަތީޖާއާއެކު އެމްޑީޕީއަށް ދެން ވާނެ ގޮތަކާމެދު އުފެދޭ ސުވާލު އިތުރުވީ އެވެ. އެންމެ ބޮޑު ސުވާލަކީ އިހު, އެންމެ ކުރީ އެމްޑީޕީ އޮތް ފަދައިން ވަރުގަދަ ބަދަހި ކަމަކާއެކު ދެ ފެކްޝަނުން ގުޅިގެން ކުރިއަށްދާނެތޯ އުފެދޭ ސުވާލެވެ.
އެ ސުވާލަކަށް ޖަވާބެއްދޭން އަދި މާ އަވަހަށެވެ. ނަމަވެސް ރައީސް ސޯލިހް ވަނީ ކޮންމެ ނަތީޖާއެއް ނިކުތް ނަމަވެސް އެމްޑީޕީގައި ގަދަކޮށް ހުންނަވާނެ ކަމުގައި ވިދާޅުވެފަ އެވެ.
އެހެން ސުވާލެއް ވެސް އެބަ އޮތެވެ. އެއީ ރައީސް ނަޝީދާއި ފައްޔާޒު އެކުގައި ނިކުންނަވާ އިއުލާނު ކުރެއްވި ގޮތަށް ކަންކަން ހިނގާނެތޯ އުފެދޭ ސުވާލެވެ. ރިޔާސީ ރޭހުގައި ފައްޔައަށް ތާއީދު ކުރައްވާ އޭނާގެ ފަހަތުގައި ނަޝީދު އެގޮތުގައި ހުންނަވާނެތޯ އުފެދޭ ސުވާލެވެ. މި ހުރިހާ ސުވާލަކަށް ޖަވާބު ލިބޭނީ އެކަމުގެ އަސްލު ވަގުތު ޖެހުންނެވެ. އޮތީ އިންތިޒާރު ކުރުމެވެ.
Advertisement
This content is created and paid for by advertisers and does not involve Voice Journalists
