މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ މާފުށީ ޖަލުގައި އަލަށް ބަހައްޓާ ބެގެޖް ސްކްރީނިންގ މެޝިން، ބޭނުންކުރަން ފަށައިފި އެވެ.
މިއަދު އޮތް ރަސްމިއްޔާތެއްގައި އެކަން އިފްތިތާހުކޮށް ދެއްވީ މިނިސްޓަރ އޮފް ހޯމްލޭންޑް ސެކިއުރިޓީ، ލޭބާ އެންޑް ޓެކްނޯލޮޖީ އަލީ އިހްސާން އެވެ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑްއިން ހަދިޔާކޮށްދެއްވި ބެގެޖް ސްކްރީނިންގ މެޝިނަކީ، ޖަލުގެ ސަލާމަތީ ކަންކަން ހަރުދަނާ ކުރުމަށް ބެހެއްޓުނު މެޝިނެކެވެ. އަދި މިއީ މާފުށި ޖަލުގައި ބެހެއްޓުނު މިފަދަ ފުރަތަމަ މެޝިނެވެ.
މި މެޝިން ބޭނުންކުރާގޮތުގެ ތަމްރީން މޯލްޑިވްސް އެއަރޕޯޓްސް ކޮމްޕެނީ ލިމިޓެޑްއިން ދޭނެ ކަމަށާ ބެގެޖް ސްކްރީންކުރުމަށް ބޭނުންވާ ޚާއްސަ ތަމްރީން، މޯލްޑިވްސް ކަސްޓަމްސް ސަރވިސްއިން ވަނީ ދޭނެ ކަމަށް ކަރެކްޝަނުން ބުނެ އެވެ.
ބެގެޖް ސްކްރީނިން މެޝިން، މާފުށީ ޖަލުގައި ބެހެއްޓުން --
މި މެޝިން މެދުވެރިކޮށް ޤައިދީންނާއި ބަންދުމީހުން ޖަލަށް އަލަށް އަންނަ އިރު ގެންނަ ތަކެތި، އެފަރާތްތަކަށް ޢާއިލާއިން ފޮނުވާ ތަކެތި އަދި ޢާއިލީ އާއި އެކަހެރި ބައްދަލުވުންތަކަށް ޖަލަށް ޒިޔާރަތްކުރައްވާ ފަރާތްތަކުގެ ތަކެތި ސްކްރީން ކުރެވިގެންދާނެ އެވެ.
ޖަލުތަކަށް މަނާ ތަކެތި ވެއްދުމުގެ މައްސަލައަކީ މިހާތަނަށް ހުއްޓުވިފައިނުވާ ބޮޑު މައްސަލަ އެކެވެ. ޖަލަށް ފޯނާއި މަސްތުވާތަކެއްޗާއި އެ ނޫން ތަކެތި ވައްދަ އެވެ. ފޯނު ވައްދައިގެން ސްކޭމް ހިންގުމުގެ އެތައް އަމަލެއް ދަނީ ހިންގަމުންނެވެ.
Advertisement
This content is created and paid for by advertisers and does not involve Voice Journalists
