މިސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ރާއްޖޭގެ ރަށްރަށުގަޔާއި މާލެ ސަރަހައްދުގައި ބޭންކު އޮފް މޯލްޑިވްސް (ބީއެމްއެލް)އިން އަޅާ ހައުސިން ޔުނިޓްތަކުގެ ޢަމަލީ މަސައްކަތް އަންނަ ޖުލައި މަހު ފެށޭނެ ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ، ރާއްޖޭގެ 13 ރަށެއްގައި ހައުސިންގ ޔުނިޓް އެޅުމަށް އެޑްވާންސް ޕޭމަންޓު ހަމަޖެހި، ޢަމަލީ މަސައްކަތް ފެށުމަށް ވާންޖެހޭ ތައްޔާރީތައް ވެ ނިމިފައިވާ ކަމަށެވެ.
އަދި ހުޅުމާލެއާއި ވިލިމާލޭގައި ބީއެމްއެލް އިން އަޅާ ހައުސިން ޔުނިޓްތަކުގެ ޢަމަލީ މަސައްކަތް ފެށުމަށް ވާންޖެހޭ ތައްޔާރީތައްވެސް ވެ ނިމިފައިވާ ކަމަށް ވިދާޅުވިއެވެ.
އިރާދަކުރެއްވިއްޔާ މި އަންނަ މަހުގެ ތެރޭގައި މީގެ ތެރެއިން އެއް ޕްރޮޖެކްޓެއް ފިޔަވައި، ނޫނިއްޔާ ހަމަ ހުރިހާ ޕްރޮޖެކްޓެއް ޢަމަލީ ގޮތުން ފައުންޑޭޝަނަށް އަޅަންޖެހޭ ކޮންކްރިޓް އެޅިގެން ފިޒިކަލް ވޯކް، މިހާރުވެސް މަސައްކަތް އެބަ ހިނގާ. ފައުންޑޭޝަން އެޅުމަށް ކުރަންޖެހޭ މަސައްކަތް އެބަދޭ ކުރިއަށް. އެހެންނަމަވެސް، ފައުންޑޭޝަން ކޮންކްރިޓިން ވޯކް މި އަންނަ ޖުލައި މަސް ތެރޭ ފެށިގެންދާނެ ކަމަށް މިއަދު ހެނދުނު އަޅުގަނޑަށް މައުލޫމާތު ލިބިފައި އޮތީ
ރައީސް މުޢިއްޒު
މީގެ އިތުރުން މި ވެރިކަން ފެށިގެން އައި އިރު ހުއްޓިފައިހުރި ވަރަށް ގިނަ ހައުސިން މަޝްރޫޢުތައް މިހާރުވެސް ފެށިގެން ކުރިއަށްދާ ކަމަށް ރައީސް ވިދާޅުވިއެވެ.
އަދި އިތުރު ހައުސިން މަޝްރޫޢުތައް ކުރިއަށް ހުޅުވާލި ފުރުސަތުގައި ޝައުގުވެރިކަން ފާޅުކުރި ފަރާތްތަކާ ވާހަކަދެކެވި، ޢަމަލީ ގޮތުން މަސައްކަތް ކުރިއަށް ގެންދިޔުމަށް ހަދަންޖެހޭ އެގްރީމަންޓް ހެދުމުގެ މަސައްކަތް ކުރިއަށްދާ ކަމަށް ރައީސް ވިދާޅުވިއެވެ.
ހަމަ އެހެންމެ އިންޑިޔާ އަދި ޗައިނާއާއެކު އޮންނަ ގާތް ގުޅުމުގެ ތެރެއިންވެސް ބޯހިޔާވަހިކަމުގެ މަޝްރޫޢު ކުރިއަށް ގެންދިޔުމަށް މަސައްކަތް ކުރެވެމުންދާ ކަމަށް ވިދާޅުވިއެވެ.
ރައީސް ވިދާޅުވީ، މި ސަރުކާރުގެ އަމާޒަކީ މި ދައުރުގައި ފަށާ ބޯހިޔާ ވަހިކަމުގެ މަޝްރޫޢު ދައުރު ނިމުމުގެ ކުރިން ނިންމަވައި، އެ ތަންތަނުގައި އުޅެވޭ ވަރަށް ނިންމަވައި ތަޅުދަނޑި ހަވާލުކުރެއްވުން ކަމަށެވެ.
އެގޮތުން، އަންނަ އަހަރު ނިމޭކޮޅު ބައެއް ހައުސިން މަޝްރޫޢުތައް ނިންމާލެވޭނެ ކަމަށާ، 2028 ވަނަ އަހަރުގެ މެދުތެރޭގައި އަނެއްބައި މަޝްރޫޢުތައް ނިންމާލެވޭނެކަން ރައީސް ފާހަގަކުރެއްވިއެވެ. އޭގެ ތެރޭގައި ކުޅުދުއްފުށީގައި ކުރިއަށް ގެންދާ މަޝްރޫޢުވެސް ހިމެނޭކަން ރައީސް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
