ރ. އަލިފުށީގައި ތަރައްޤީކުރާ އެއާޕޯޓާއި 30 އެނދުގެ ހޮސްޕިޓަލްގެ މަސައްކަތް ނިންމައި މި ދައުރުގެ ތެރޭގައި ހުޅުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ނޫސްވެރިންނާއެކު ބާއްވަވާ ސިލްސިލާ ބައްދަލުވުމުގައި އަލިފުށީ ހޮސްޕިޓަލުގެ މަސައްކަތް ހުއްޓިފައިވާ ކަމަށް ބުނެ ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ.

ރައީސް ފާހަގަކުރެއްވި ގޮތުގައި ބައެއް މަޝްރޫޢުތައް ބޭނުންވާ ބާރުމިނުގައި ކުރިއަށް ނުދާ ކަމަށާއި ނަމަވެސް ސަރަޙައްދީ ތަރައްޤީގައި މުހިންމު ދައުރެއް އަދާކުރާ އަލިފުށީގެ މަޝްރޫޢުތައް ޚާއްޞަ ސަމާލުކަމެއް ދީގެން ކުރިއަށް ގެންދަވާނެ ކަމަށެވެ.

"ދެ މަސައްކަތްވެސް ހަވާލުކޮށްފައިވަނީ އެމްޓީސީސީއާއި. އެމްޓީސީސީއަށް ބޭނުންވާ ސާމަނު ގަތުމަށް ބޭނުންވާ ފައިނޭންސް ވަނީ ހަމަޖެހިފައި. މާ ލަސްތަކެއްނުވެ އެމްޓީސީސީގެ ފަރާތުން އެ މަޝްރޫއަށް ބޭނުންވާ ސާމާނު ހޯދާ މަސައްކަތް ފެށިގެންދާނެ. މި ދެ މަޝްރޫޢު މި ދައުރުގެ ތެރޭގައި ނިންމާ ހުޅުވާނަން." ރައީސް ވިދާޅުވިއެވެ.

ހޮސްޕިޓަލް މަޝްރޫޢަކީ 128 މިލިޔަން ރުފިޔާގެ މަޝްރޫޢެކެވެ. މި ހޮސްޕިޓަލްގައި ފްލޫ ކްލިނިކާއި އައިސޮލޭޝަން ފެސިލިޓީ ހިމެނޭ އިރު ހަކަތައިގެ ޚަރަދު ކުޑަކުރުމަށް ސޯލާ ޕީވީ ސިސްޓަމް ހަރުކުރުމަށް ވެސް ވަނީ ހަމަޖެހިފައެވެ. އެއާޕޯޓް މަޝްރޫޢަކީ ދައުލަތުގެ ބަޖެޓުން 426.05 މިލިޔަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.

އެއާޕޯޓުގައި 1200 މީޓަރުގެ ރަންވޭއަކާއި ޓާމިނަލް އިމާރާތާއި ފަޔާ ބިލްޑިންގާއި 655 މީޓަރުގެ ސެކިއުރިޓީ ފެންސެއް ހިމެނެއެވެ. އެއާޕޯޓަށް ބޭނުންވާ ބިން ހިއްކުމުގެ ގޮތުން 50.5 ހެކްޓަރުގެ ބިން މިހާރު ވަނީ ހިއްކައިފައެވެ.