ދިވެހިރާއްޖޭގެ ގައުމީ އެއާލައިން، މޯލްޑިވިއަންއަށް ފުރަތަމަ ފަހަރަށް ގެނައި ވައިޑް ބޮޑީ އެއާކްރާފްޓުގައި މިހައިތަނަށް 67،000 ފަސިންޖަރުން އުފުލާފައިވާ ކަމަށާއި މިއަހަރުގެ ފަހުކޮޅު އިތުރު ބޯޓެއް ރާއްޖެ ގެންނާނެ ކަމަށް މަދަނީ އުދުހުންތަކާ ބެހޭ ވަޒީރު، މުހައްމަދު އަމީން ވިދާޅުވެއްޖެ އެވެ.

ވަޒީރު މިހެން ވިދާޅުވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ކުރެއްވި ސުވާލަކަށް ޖަވާބުދެއްވަމުންނެވެ.

ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް : ފޮޓޯ/ މަޖިލިސް

އަމީން ވިދާޅުވީ ވައިޑް ބޮޑީ އެއަރ ކްރާފްޓުގެ ޚިދުމަތް ތަޢާރަފުކުރި ފަހުން ހޭދަވީ 16 މަސް ދުވަހުގެ ތެރޭގައި 67000 މީހުން އެ ޚިދުމަތް ބޭނުންކޮށްފައިވާ ކަމަށެވެ.

އޭގެ ތެރެއިން 55000 މީހުންނަކީ ފަތުރުވެރިން ކަމަށްވާއިރު، ޙައްޖު ދަތުރުތަކާއި ޢުމްރާ ދަތުރުތަކުގެ އިތުރުން މުހިންމު އެހެން ހާލަތުތަކުގައި ވެސް ވައިޑް ބޮޑީ އެއަރ ކްރާފްޓުގެ ޚިދުމަތް ޗާޓަރުކޮށްގެން ހޯދާފައިވާ ކަމަށް ވަޒީރު ވިދާޅުވިއެވެ.

މީގެ އިތުރުން ވަޒީރު ވިދާޅުވީ، ރައީސް މުޢިއްޒުގެ ވަޢުދުފުޅާއެއްގޮތަށް އިތުރު ވައިޑް ބޮޑީ އެއާކްރާފްޓެއް ހޯދުމުގެ މަސައްކަތް މިހާރު ނިމުމަކާ ހިސާބަށް އައިސްފައިވާ ކަމަށެވެ. 

މިފަދަ ބޮޑެތި މަތިންދާބޯޓުތައް ހޯދުމުގައި ދުނިޔޭގެ ބާޒާރުގައި މިވަގުތު ގިނަ ގޮންޖެހުންތަކެއް އެބަހުރި ކަމަށާ، ޚާއްސަކޮށް މެދުއިރުމަތީގެ ހަނގުރާމައާއި ގުޅިގެން ދަތިތައް ހުރި ކަން ފާހަގަކުރެއްވިއެވެ. ނަމަވެސް، ސަރުކާރުން ކުރަމުންދާ މަސައްކަތުގެ ދަށުން، މިއަހަރު ދެވަނަ ވައިޑް-ބޮޑީ ބޯޓު ގެނެސް އަންނަ އަހަރު އޮޕަރޭޓް ކުރަން ފެށޭނެ ކަމަށް ވަޒީރު ވިދާޅުވިއެވެ. 

މީގެ އިތުރުން ވަޒީރު ވިދާޅުވީ، ހަނގުރާމައިގެ ހާލަތު ފަދަ ހާލަތެއް ދިމާވާއިރު ރާއްޖޭގެ އަމިއްލަ ކޮންޓްރޯލް އޮތް ވައިޑް ބޮޑީ އެއަރ ކްރާފްޓެއް މުހިންމު ކަމަށާ، ކޯވިޑުގެ ހާލަތުގައި ވެސް ރާއްޖޭގެ އެއަރބަސް އޮޕަރޭޝަން އޮތުމުން ޒަރޫރީ ބޭސް ގެނައުމަށް ފުރުސަތު ލިބިގެންދިޔަކަމަށެވެ. 

"އެނގިވަޑައިގަންނަވާނެ ކޯވިޑްގެ ހާލަތުގައި ވެސް ރާއްޖޭގެ އެއަރބަސް އޮޕަރޭޝަން އޮތީމަ ރާއްޖެއަށް ލިބިގެންދިޔަ ޒަރޫރީ ބޭސްގެނައުމަށް ފުރުސަތު." ވަޒީރު އަމީން ވިދާޅުވިއެވެ. 

މަޖިލީހުގެ މިއަދުގެ ޖަލްސާގެ ތެރެއިން: ފޮޓޯ/ މަޖިލިސް

ވައިޑް ބޮޑީ އެއާކްރާފްޓުގެ ދަތުރުތަކުގެ މައްޗަށް އަލިއަޅުވާލައްވަމުން ވަޒީރު ވިދާޅުވީ، ޗައިނާގެ ތިން މަންޒިލަކާއި އިންޑިއާ އާއި ބަންގްލަދޭޝްގެ އިތުރުން އޮސްޓްރޭލިއާއަށް ވެސް ދަތުރުތައް ފަށާފައިވާ ކަމަށެވެ. އަދި ޕީކް ސީޒަންގައި، އުމްރާވެރިން އަދި ހައްޖުވެރިން ސައުދީއަށް އުފުލުމުގައިވެސް އެ ބޭނުން ކުރަމުންދާކަން ފާހަގަކުރެއްވިއެވެ. 

"ޗައިނާ އިންޑިއާ އަދި މީގެ އިތުރުން އަޅުގަނޑުމެން، މި ދިމާވި މެދުއިރުމަތީގެ ހަނގުރާމައިގައި ރާއްޖޭގެ ޓޫރިޒަމަށް ދިމާވި މައްސަލަތަކާ ގުޅިގެން އަޅުގަނޑުމެން އޮސްޓްރޭލިއާއަށް މިހާރު ޝެޑިއުލް ދަތުރުތައް ފެށިފައި ވަނީ، އަދި ވަރަށް ކާމިޔާބުކަމާ އެކީގައި ވަރަށް ރަނގަޅު ލޯޑް ފެކްޓާއެއްގައި އެ އޮޕަރޭޓު ކުރަމުން އެ ދަނީ،" އަމީން ވިދާޅުވި އެވެ.