އަލީބާބާގެ ޕްލެޓްފޯމްތައް މެދުވެރިކޮށް ޣައިރުޤާނޫނީ ބޭހާއި، ބޭސް އުފައްދާ ސާމާނާއި، އަދި އެހެނިހެން މަނާ ތަކެތި ވިއްކުން ހުއްޓުވުމުގައި އިހުމާލުވެފައިވާ މައްސަލަ ހައްލުކުރުމަށް ބޮޑު ޖޫރިމަނާއެއް އެމެރިކާއަށް ދައްކަން އެކުންފުނިން އެއްބަސްވެއްޖެއެވެ.

އެމެރިކާގެ ޖަސްޓިސް ޑިޕާޓްމަންޓުން ހާމަކޮށްފައިވާ ގޮތުގައި، ޗައިނާގެ އީ-ކޮމާސް ކުންފުނި އަލީބާބާ ގްރޫޕް އަދި އެ ކުންފުނީގެ ޕޭމަންޓް ޕްރޮސެސާ ކަމަށްވާ އޭޔޫއެސް މާޗަންޓް ސާވިސަސް (އިން ޖުމްލަ 600 މިލިއަން އެމެރިކާ ޑޮލަރު ދެއްކުމަށް ވަނީ އެއްބަސްވެފައެވެ.

އެމެރިކާގެ ކަމާބެހޭ އިދާރާތަކުން ބުނާ ގޮތުގައި، 2016 އިން 2024 އާ ދެމެދު އަލީބާބާގެ ޕްލެޓްފޯމްތައް މެދުވެރިކޮށް 80،000 އަށްވުރެ ގިނަ ޣައިރުޤާނޫނީ މުއާމަލާތް ހިންގާފައިވާ އިރު، މި މުއާމަލާތްތަކުގެ ޖުމްލަ އަގު 200 މިލިއަން ޑޮލަރަށްވުރެ މައްޗަށް އަރައެވެ.

މި އެއްބަސްވުމުގެ ދަށުން އަލީބާބާ އިން 125 މިލިއަން ޑޮލަރުގެ ޖޫރިމަނާއެއް ދައްކަންޖެހޭ އިރު، ޣައިރުޤާނޫނީ ވިޔަފާރިން ލިބުނު ފައިދާގެ ތެރެއިން 200 މިލިއަން ޑޮލަރު ދޫކޮށްލަން ޖެހޭނެއެވެ. އަދި އޭޔޫއެސް މާޗަންޓް ސާވިސަސް އިން 85 މިލިއަން ޑޮލަރުގެ ޖޫރިމަނާއެއް ދައްކަންޖެހޭ އިރު، 190 މިލިއަން ޑޮލަރު ދޫކޮށްލަން ޖެހޭނެއެވެ. މީގެ އިތުރުން، ދެ ކުންފުނިން ވެސް ކުރިއަށް އޮތް ތަނުގައި މިފަދަ ކަންކަން ހުއްޓުވުމަށްޓަކައި އެ ކުންފުނިތަކުގެ ސަލާމަތީ އަދި ޤާނޫނީ ގަވާއިދުތަކަށް ބޯލަނބާތޯ ކަށަވަރުކުރާ ނިޒާމުތައް އިތުރަށް ވަރުގަދަކުރުމަށް ވަނީ އެއްބަސްވެފައެވެ.