މާލެސިޓީ ކައުންސިލް އިދާރާއިން 2020 ވަނަ އަހަރު މުއާމަލާތްތައް ހިންގުމުގައި އުސޫލާ ހިލާފް އެތައްކަމެއް ހިނގާފައިވާކަމަށް އެ ކައުންސިލުން ނެރުނު އެ އަހަރުގެ އޮޑިޓް ރިޕޯޓްގައި ބުނެފިއެވެ.

މާލެސިޓީ ކައުންސިލުން ވަނީ އެ ކައުންސިލުގެ 2020 ވަނަ އަހަރު އޮޑިޓް ފާމަކާ ހަވާލުކޮށްގެން ކުރި އޮޑިޓް ނެރެ އާއްމުކޮށްފައެވެ. މި އޮޑިޓްގައިވާގޮތުން މާލެސިޓީ ކައުންސިލަށް ބޭނުންވާ ހިދުމަތްތައް ހޯދުމާއި، ރަޖިސްތްރީ ހައްދައިދިނުމާއި އަދި ހަރުމުދާ ބެލެހެއްޓުމުގައި އޮޅުވާލުންތަކެއް ހިނގާފައިވާކަން ވަނީ ފާހަގަކޮށްފައެވެ. މީގެ އިތުރުން ކައުންސިލަށް ލިބޭ އާމްދަނީގެ މުއާމަލާތްތައް ބެލެހެއްޓުމާއި، އެނޫންވެސް ގިނަ ކަންތައްތަކެއް ވަނީ ފާަހަގަކޮށްފައެވެ.

ކައުންސިލަށް ބޭނުންވާ ހިދުމަތްތައް ހޯދުމުގައި އޮޑިޓްގައިވާ ކަންތައްތަކަށް ބަލާއިރު، ކޯޓޭޝަންތައް ހޯދާފައިވަނީ ވަކިބަޔަކަށް މަންފާލިބޭގޮތަށް ކަމަށް ވަނީ ފާހަގަކޮށްފައެވެ. އެގޮތުން ތަކެތި ހޯދުމާއި، މަސައްކަތް ހަވާލުކުރުމުގައި ކޯޓޭޝަންތައް ހޯދާފައިވަނީ ވަކި ވިޔަފާރިތަކަކުންކަން ވަނީ ފާހަގަކޮށްފައެވެ. އެގޮތުްނ އޮޑިޓަށް މައުލޫމާތު ނެގުނު 46 ޕޭމަންޓް ވައުޗަރުގެ ތެރެއިން 27 ވައުޗަރު ހޯދާފައިވަނީ ގުޅުންހުރި ވިޔަފާރިތަކުންނެވެ. އެ ވައުޗަރުތަކަށް އެކަނިވެސް 7 ލައްކައަށްވުރެ ގިނަ ރުފިޔާ ވަނީ ދޫކޮށްފައެވެ.

އޮޑިޓަރު ވަނީ އެކަން އެގޮތަށް ނުކޮށް ވާދަވެރި މާހައުލެއްގެ ތެރެއިން އެބާވަތުގެ ކަންކަން ކުރުމަށް ލަފާދީފައެވެ.

2020 ވަނަ އަހަރު ހެއްދި ރަޖިސްޓްރީތައް ގެއްލުނު މައްސަލައާ ގުލޭގޮތުން އޮޑިޓްގައި ބުނެފައިވަނީ، އޮޑިޓަށް ފޯމުތައް ނަގައި ރަޖިސްޓްރީ ހޯދަން ބެލިއިރު ހޯދަން އެދުނު ފޯމަތަކުގެ ދެބައިކުޅަ އެއްބައިވެސް ނެތްކަމަށެވެ.

ކައުންސިލަށް ލިބޭ އާމްދަނީގެ މައުލޫމާތު ހޯދަން އެދުނުއިރު، ބިންތަކާ ގުޅޭ ލިޔެކިޔުންތަކުގައި ހިނަމަންޖެހޭ ނަމްބަރުތަކާއި، ބިމުގެ ސަރަހައްދުވެސް އެނގެން ނެތްކަމަށެވެ. 

މާލެސިޓީ ކައުްނސިލްގައި 2020 ވަނަ އަހަރު މޭޔަރެއްގެ ގޮތުގައި ހުންނެވީ އެމްޑީޕީއަށް ނިސްބަތްވާ ޝިފާ މުހައްމަދެވެ. މޭޔަރަކަށް ހުންނެވި ދުަވސްވަރު ކޮރަޕްޝަނަށް މަގުފަހިވާގޮތަށް ކަންކަން ކުރުމުގެ ތުހުމަތު މީގެ ކުރިންވެސް ޝިފާގެ މައްޗަށް ވަނީ ކޮށްފައެވެ.