ވެރިކަންކުރާ މައި ޕާޓީ، ޕީޕަލްސް ނެޝަނަލް ކޮންގްރެސް ޕާޓީ އެތެރޭގެ އިންތިހާބު ގައި 33,000 މެންބަރުން ވޯޓްލާފައިވާ ކަމަށް އެ ޕާޓީން ބުނެފި އެވެ.

މިއަދު ހެނދުނު 9:00 އިން ހަވީރު 4:00 އަށް އޮތް އިންތިހާބަކީ ޕާޓީގެ ސްޓިއަރިން ކޮމިޓީތަކުގެ ރައީސުންނާއި ނައިބުރައީސުންނާއި އެކި މަގާމުތަކަށް މެމްބަރުން އައްޔަނުކުރަން ބޭއްވި އިންތިހާބެކެވެ.

އިންތިހާބަށް ފަހު ނޫސްވެެރީންނަށް މައުލޫމާތު ދެއްވަމުން ކޮންގްރެސް ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ ރާއްޖޭގެ އެކި ކަންކޮޅުތަކުގައި ބެހެއްޓި 119 ވޯޓް ފޮއްޓަށް 32,000 އާއި 33,000 ދެމެދުގެ އަދަދެއްގެ މެންބަރުން ވޯޓްލާފައިވާ ކަމަށެވެ.

މިއަދު އޮތް ކޮންގްރެސް ޕާޓީގެ އެތެރޭގެ އިންތިހާބު --

މި އިންތިހާބުގައި ވޯޓްލުމުގެ ހައްގު އެ ޕާޓީގެ 69,000 މެންބަރުންގެ ތެރެއިން 40,000 މެންބަރުންނަށް ލިބިފައި އޮތެވެ. ޢަބްދުއްރަހީމް ވިދާޅުވި ގޮތުގައި ހިސާބުތައް ދައްކާ ގޮތުން މިއަދުގެ އިންތިހާބުގައި 85 އިންސައްތަ މެންބަރުން ވަނީ ވޯޓްލާފަ އެވެ.

މިއީ ޕާޓީގެ ރައީސް ޑރ. މުހައްމަދު މުޢިއްޒުއާ ސަރުކާރަށް އަދި ކޮންގްރެސްއަށް އޮތް އިތުބާރާއި ތާއީދު ދައްކައިދޭ ނަތީޖާއެއް ކަމުގައި އަބްދުއްރަހީމް ވިދާޅުވި އެވެ.

މިއަދު އޮތް ކޮންގްރެސް ޕާޓީގެ އެތެރޭގެ އިންތިހާބު --

މިއަދު އޮތް އިންތިހާބުގައި ޖުމްލަ 2,400 މަގާމަށް މެންބަރުން އިންތިހާބު ކުރާނެ އެވެ. އަދި އިންތިހާބީ މަގާމުތަކުގައި މިހާރު ތިއްބެވި އެ ޕާޓީގެ މެންބަރުން ހިމެނޭހެން ކޮންގްރެސް ޕާޓީގެ މަގާމުތަކުގައި 3,000 ވުރެ ގިނަ މެންބަރުން ހަމަޖެހިގެންދާނެ އެވެ.

މިއީ މި ފަހުން ޕާޓީއަކުން ބޭއްވި އެންމެ ބޮޑު އެތެރޭގެ އިންތިހާބު ކަމަށް ވެސް އެ ޕާޓީން ބުނެ އެވެ. މިއަދުގެ އިންތިހާބުގައި އެއްވެސް ހަމަނުޖެހުމެއް ނުހިނގަ އެެވެ.