ބަންގްލަދޭޝްގައި ބޯކޮށް ވާރޭ ވެހި ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން މަދުވެގެން 51 މީހުން މަރުވެ 39 މީހުން ޒަޚަމްވެފައިވާ ކަމަށް އެ ޤައުމުގެ މީޑިއާތަކުން ބުނެފިއެވެ.

ވެރިރަށް ޑާކާ ހިމެނޭ ގޮތަށް ޤައުމުގެ ބޮޑެތި ސަރަޙައްދުތަކަށް ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތައް ދިމާވެ އެތައްހާސް ރައްޔިތުން ވަނީ ގެދޮރު ގެއްލިފައެވެ. މިހާތަނަށް ރިޕޯޓުކުރެވިފައިވާ މަރުތަކުގެ ދެބައިކުޅަ އެއްބައި ހިނގާފައި ވަނީ ބޮޑު ރޮހިންޔާ ރެފިއުޖީ އާބާދީއެއް ދިރިއުޅޭ ކޮކްސް ބާޒާރު ސަރަޙައްދުގައެވެ.

ފާއިތުވި ހަފުތާގައި އެ ސަރަޙައްދުގައި ސްކޫލެއްގެ ތެރޭ ބޮޑުވެގެން ދިއުމުން ދަރިވަރުންތަކަކާއި ޓީޗަރަކު ވަނީ މަރުވެފައެވެ. ބަންގްލަދޭޝްގެ ޑިޒާސްޓާ މެނޭޖްމަންޓް އެންޑް ރިލީފް މިނިސްޓްރީން ބުނެފައިވާ ގޮތުގައި މިހާތަނަށް 10 ލައްކައަށްވުރެ ގިނަ މީހުންނަށް ފެންބޮޑުވުމުގެ އަސަރުކޮށްފައިވާއިރު 267,918 އާއިލާ ފެނުގެ ތެރޭގައި ތާށިވެފައި ވެއެވެ. 44,457 މީހުން ވަނީ ހިޔާވަހިކަމުގެ މަރުކަޒުތަކަށް ދިއުމަށް ފުރުޞަތު ހޯދާފައެވެ.

ބަންގްލަދޭޝްގެ ބޮޑުވަޒީރު ތާރިޤް ރަޙްމާން ވަނީ ފެންބޮޑުވުމުގެ ސަބަބުން ދިމާވެފައިވާ ނުރައްކާތެރި ހާލަތުގައި ރައްޔިތުންގެ ފުރާނައާއި މުދާ ރައްކާތެރިކުރުމަށް ހުރިހާ ކަމާބެހޭ އިދާރާތަކާއި ދާއިރާތަކުގެ ފެންވަރުގައި ސަމާލުކަން އެންމެ މަތީ ދަރަޖައިގައި ބެހެއްޓުމަށާއި އަވަހަށް ރިލީފް ބަހައި ފަރުވާދިނުމުގެ ކަންކަން ކުރިއަށްދިއުމަށް އަމުރުކުރައްވައިފައެވެ. 

ބޮޑުވަޒީރު ރަޙްމާން ވިދާޅުވެފައި ވަނީ ނުރައްކާތެރި މި ހާލަތުގައި ރައްޔިތުންގެ ފުރާނައާއި މުދާ ރައްކާތެރިކުރުމަކީ ސަރުކާރުގެ އެންމެ މުހިންމު ވާޖިބުކަމަށެވެ.

އެގޮތުން، ކާނާ، ސާފު ބޯފެން، ކުޑަކުދިންގެ ކާނާ، މުހިންމު ބޭސްފަރުވާއާއި، ފަރުވާގެ ޚިދުމަތްތައް އަވަހަށް ބެހުމަށް ވެސް އޭނާ އަމުރުކުރެއްވިއެވެ. މީގެ އިތުރުން މި ނުރައްކާތެރި ހާލަތުގެ ފައިދާ ނަގައިގެން ވައްކަން ކުރުމާއި ސަރަކާރު ސާމާނު ފޮރުވުމާއި ރިލީފް ސާމާނުގައި ޚިޔާނާތްތެރިވުން ފަދަ ކުށްތައް ހުއްޓުވުމަށް ފުލުހުންނާއި ކަމާބެހޭ އިދާރާތައް އެންމެ މަތީ ސަމާލުކަމުގައި ބައިތިއްބުމަށް ވެސް އޭނާ އަމުރުކުރެއްވި ކަމަށް ޔޫއެންބީ ރިޕޯޓުގައި ވެއެވެ.

މިހާތަނަށް ރިޕޯޓުކުރެވިފައިވާ 51 މަރުގެ ތެރެއިން 28 މަރު ހިނގާފައި ވަނީ ކޮކްސް ބާޒާރުގައި ކަމަށާއި އެ ސަރަޙައްދަކީ ދުނިޔޭގެ އެންމެ ބޮޑު ރެފިއުޖީ ސެޓްލްމަންޓް ކަމަށްވާ 10 ލައްކައަށްވުރެ ގިނަ ރޮހިންޔާ ރެފިއުޖީން ދިރިއުޅޭ ސަރަޙައްދު ކަމަށެވެ.

ވެރިރަށް ޑާކާގައި ފެންބޮޑުވެ މަގުތަކުގައި ފެންހަރުވެފައިވާތީ ބައެއް ސަރަޙައްދުތަކުގައި ފެންގަނޑު ކަކުލާ ހަމައަށް އަރާފައިވާ ކަމަށާއި ދަތުރުފަތުރަށް ބުރޫއަރާފައިވާ ކަމަށް ބީބީސީ ބަންގްލައިން ރިޕޯޓުކޮށްފައި ވެއެވެ.