ދިވެހިރާއްޖެއަށް ކަނޑައަޅުއްވާފައި ހުންނަވާ ބަންގުލަދޭޝްގެ ސަފީރު ޑރ. މުޙައްމަދު ނަޒްމުލް އިސްލާމް އަމިއްލަފުޅަށް ލިޔުއްވި ފޮތެއް ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އަށް އަންގާރަ ދުވަހު ހަދިޔާކުރައްވައިފިއެވެ.
މި ފޮތް ހަދިޔާކުރެއްވުމަށްޓަކައި އެމްއެންޔޫގައި ބޭއްވި ރަސްމިއްޔާތުގައި ސަފީރު ހަދިޔާ ކުރެއްވި ފޮތުގެ ނަމަކީ "ޕަވަރ އޮފް ބޮންޑިންގ އެންޑް ނަން-ވެސްޓަން ސޮފްޓް ޕަވަރ ސްޓްރެޓެޖީ އިން އީރާން: ކޮމްޕެއަރިންގ ޗައިނާ އެންޑް އިންޑިއާސް އެންގޭޖްމަންޓް" އެވެ. މި ފޮތުގައި ބައިނަލްއަޤުވާމީ ގުޅުންތަކާއި ޑިޕްލޮމަސީ އާއި ސޮފްޓް ޕަވަރ އާއި ސުލްޙައާއި ހަމަނުޖެހުންތަކުގެ ދިރާސާތަކާއި ދެކުނު އޭޝިޔާގެ ކަންކަމާ ބެހޭ ގޮތުން މުހިންމު މަޢުލޫމާތުތަކެއް ހިމަނާފައިވެއެވެ.
ސަފީރު ޑރ. މުޙައްމަދު ނަޒްމުލް އިސްލާމް އަކީ ބަންގުލަދޭޝުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރުކަމުގެ އިތުރުން ބައިނަލްއަޤުވާމީ ފެންވަރުގައި ފާހަގަކޮށްލެވޭ ސިޔާސީ ސައިންޓިސްޓެއް އެކަޑަމިކެއް ދިރާސާވެރިއެއް އަދި ގިނަ ފޮތްތަކެއް ލިޔުއްވާފައިވާ ބޭފުޅެއް ކަމުގައި ފާހަގަކުރެވެއެވެ.
ފޮތް ހަދިޔާކުރެއްވި ރަސްމިއްޔާތުގައި މި ފޮތް އެމްއެންޔޫގެ ލައިބްރަރީ ކަލެކްޝަނަށް ރަސްމީކޮށް އިތުރުކުރެވިފައިވާކަން ފާހަގަކުރެވިފައިވެއެވެ. މި ހަދިޔާއަށްޓަކައި ޔުނިވަރސިޓީން ޝުކުރު އަދާކުރައްވާފައިވާއިރު މި ފޮތަކީ ދަރިވަރުންނާއި އެކަޑަމިކުންނާއި ދިރާސާވެރިންނަށް ޚާއްޞަކޮށް ބައިނަލްއަޤުވާމީ ގުޅުންތަކާއި ސިޔާސީ ސައިންސާއި ޑިޕްލޮމަސީގެ ދާއިރާގައި ހަރަކާތްތެރިވާ ފަރާތްތަކަށް މުހިންމު މަޞްދަރެއް ކަމުގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
