ބީއެމްއެލްގެ އެފޯޑަބަލް ހޯމް ލީސިން ކުންފުނިން ކުރިއަށްގެންދާ އެފޯޑަބަލް ހައުސިން މަޝްރޫޢު ތަކަކީ ރައްޔިތުންނަށް ބޯހިޔާވަހިކަން ހޯދައިދިނުމަށް ކުރިއަށްގެންދާ ވަރަށް އުއްމީދީ މަޝްރޫޢުއަކަށް ވެގެންދާނޭކަމަށް އެ ބޭންކުގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.
މިއަދު ބީއެމްއެލުން ބޭއްވި ހަފްލާއެއްގައި ސީއީއޯ ޝަރީފް ވަނީ އެ ބޭންކުން ކުރިއަށްގެންދާ ހައުސިން މަޝްރޫޢު އާ ބެހޭގޮތުން ވާހަކަދައްކަވާފައެވެ. ޝަރީފް ވިދާޅުވީ، 4،000 އެޕާޓްމަންޓަކީ ހަމައެކަނި ކަރުދާހުގައި އޮތް އަދަދެއް ނޫން ކަމަށެވެ. އެގޮތުން އެއީ ބޯހިޔާވަހިކަން ލިބޭ 4،000 އާއިލާ ކަމަށާއި، އެ ޔުނިޓްތައް ވުޖޫދަށް އަންނާނޭކަމުގެ ޔަގީންކަން ޝަރީފް ދެއްވިއެވެ.
އޭނާ ވިދާޅުވީ، ބޯހިޔާވަހިކަމަކީ މިއަދު ދިވެހިންނަށް ކުރިމަތިވެފައިވާ އިޖުތިމާއީ އެންމެ ބޮޑު މައްސަލަ ކަމަށެވެ. އެގޮތުން ބޯހިޔާވަހިކަމުގެ ޕްރޮޖެކްޓަށް ބީއެމްއެލުން އިންވެސްޓް ކުރުމުން އެކަމަށް ފާޑުކިޔާނަމަ ކޮންމެ ދުވަހަކު ވެސް އެ ފާޑުކިޔުންތައް ފަޚުރުވެރިކަމާ އެކު ބަލައިގަންނަކަމަށެވެ.
މިސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ރާއްޖޭގެ ރަށްރަށުގަޔާއި މާލެ ސަރަހައްދުގައި ބީއެމްއެލް އިން އަޅާ ހައުސިން ޔުނިޓްތަކުގެ ޢަމަލީ މަސައްކަތް މިމަހުގެ ތެރޭގައި ފެށުމަށް ވަނީ ތާވަލްކޮށްފައެވެ. މީގެ ތެރެއިން ބައެއް ސައިޓްތަކުގައި މިހާރުވެސް މަސައްކަތް ވަނީ ފަށާފައެވެ.
މި މަޝްރޫޢުތައް ކުރިއަށްގެންދަނީ ރާއްޖެއާއި ރާއްޖެއިން ބޭރުގެ ބައެއް ކުންފުނިތަކާ ހަވާލުކޮށްގެންނެވެ. ދިވެހި ކުންފުނިތަކުގެ ތެރޭގައި ހިމެނެނީ އަމިން ކޮންސްޓްރަކްޝަން، އެފްޑަބްލިއު ކޮންސްޓްރަކްޝަން، ރަޝީދު ކާޕެންޓްރީ އެންޑް ކޮންސްޓްރަކްޝަންއެވެ. ބޭރުގެ ކުންފުނިތަކުގެ ތެރޭގައި ހިމެނެނީ ބެއިޖިން އާބަން ކޮންސްޓްރަކްޝަން ގްރޫޕް އަދި ޗައިނާ މެޝިނަރީ އިންޖިނިއަރިންނެވެ.
ބީއެމްއެލުން ބުނީ މި މަޝްރޫޢުތައް ނިމުމުން ހުޅުމާލެ ފޭސް އެކެއް، ފޭއް 3 އަދި ވިލިމާލޭގައި 3،200 އަށްވުރެ ގިނަ ހައުސިން ޔުނިޓް ކުލިދައްކައި ހަލާސްކުރުމުން މިލްކުވާގޮތަށް ނިސްބަތުން ކުޑަ ކުއްޔަކަށް ދޫކުރާނޭކަމަށެވެ. މިއީ ރާއްޖޭގައި ގެދޮރު ހޯދުމުގައި އޮތް ޑިމާންޑަށް އެކަށީގެންވާ ލުޔެއް ގެނެސްދޭނެ މަޝްރޫޢު ތަކެއްކަމަށް ބީއެމްއެލުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
