އާޖެންޓީނާ ކުޅުންތެރިން ފޯކްލޭންޑާ ގުޅޭގޮތުން ހިޔާލުފާޅުކުރުމަކީ ހަމަ އެއްވެސް މައްސަލައެއް ނޫންކަމަށް ވައިޓްހައުސްއިން ބުނެފިއެވެ.

ވަރލްޑްކަޕް ސެމީފައިނަލްގައި އިންގްލޭންޑާ ދެކޮޅަށް އަޖެންޓީނާ ކުޅެ މޮޅުވި މެޗަށްފަހު، ކުރިއަށްގެންދިޔަ އުފާފާޅު ކުރުންތަކުގައި އާޖެންޓީނާ ކުޅުންތެރިން ވަނީ ފޯކްލޭންޑާ ގުޅޭ ބެނާއެއް ބޭނުންކޮށްފައެވެ. އެ ބެނާގައި ވަނީ ފޯކްލޭންޑަކީ އާެޖންޓީނާގެ މިލްކެއްކަމަށެވެ.

ވަރލްޑްކަޕް ދަނޑުތެރެއިން އާޖެންޓީނާ ކުޅުންތެރިންގެ މި އަމަލާމެދު އެންމެބޮޑަށް ފާޑުކިޔާފައިވަނީ އިނގިރޭސިވިލާތުގެ މީޑިއާތަކުންނެވެ. މިކަމަކީ ސިޔާސީ ކަމެއްގެ ތެރެއިން ކުރި ކަމެއްކަމަށް ވާތީވެ، މި މައްސަލާގައި އާޖެންޓީނާ ޓީމްގެ ކުޅުންތެރިންނާ ދެކޮޅަށް ފީފާއިން ފިޔަވަޅު އެޅުމުގެ ފުރުސަތު އެބައޮތެވެ. 

ނަމަވެސް މި މައްސަލާގައި ވައިޓްހައުސްއިން ބުނެފައިވަނީ، ފޯކްލޭންޑާ ގުޅޭގޮތުން އާޖެންޓީނާ ކުޅުންތެރިން ފާޅުކުރި އެ ހިޔާލަކީ އެޓީމްގެ ކުޅުންތެރިންނަށް ލިބިގެންވާ ހައްގުގެ ތެރެއިން ކުރި ކަމެއްކަމަށެވެ. 

ކުޅުންތެރިން އަމަލުކުރީ ގޯސްކޮށްތޯ ސުވާލުކުރުމުން، ވައިޓް ހައުސްގެ ފީފާ ޓާސްކް ފޯހުގެ އިސްވެރިޔާ އެންޑްރޫ ގިއުލިއާނީ ހުކުރު ދުވަހު ވިދާޅުވީ، އެމެރިކާގައި އެފަދަ ޝުއޫރުތައް ފާޅުކުރުމުގެ ފުރުސަތާއި ގާބިލުކަން އެ ޓީމަށް ލިބިގެންވާ ކަމަށެވެ.

މިކަމާ ގުޅިގެން މީޑިއާގައި މި މައްސަލަ ހޫނުވެގެން ދާނޭކަމަށް ބެލެވޭއިރު، އިނގިރޭސިވިލާތުގެ ބޮޑުވަޒީރުގެ އޮފީހުން (ޑައުނިންގް ސްޓްރީޓުން) ވެސް ވަނީ މި މައްސަލަ ފީފާއިން ތަހުގީގު ކުރުމަށް ގޮވާލާ ގޮވާލުންތަކަށް ތާއީދުކޮށްފައެވެ.

އެޓްލާންޓިކް ކަނޑުގެ ދެކުނު ހުޅަނގުގައި އޮންނަ، އިނގިރޭސިވިލާތުގެ ބާރުގެ ދަށުގައިވާ ފޯކްލޭންޑް އައިލެންޑްސްއަކީ، އިނގިރޭސިވިލާތާއި އާޖެންޓީނާއާ ދެމެދު މިލްކުވެރިކަމުގެ ދަޢުވާ ކުރަމުންދާ ސަރަހައްދެކެވެ. ވަރލްޑްކަޕްގައި އާޖެންޓީނާ އާއި އިނގިރޭސިވިލާތް ބައްދަލުކުރާ މެޗްތަކުގައި އާއްމުކޮށް ކޮންމެ ފަހަރަކުވެސް ފޯކްލޭންޑް މައްސަލަ ބޮޑުވެގެންދާއިރު، މިއީ ޒަމާނުއްސުރެ ދެޓީމްގެ ތެރޭގައިވެސް އޮންނަ މައްސަލައެއްކަން ފާހަގަކޮށްލެވެއެވެ.