ސަރުކާރު ކުންފުނިތަކުގެ ބަލަދުވެރިފަރާތް، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ކުންފުނިތަކަށް ތިން މަސްދުވަހުގެ މުހުލަތެއް ދީފިއެވެ.
ދައުލަތުގެ ހިންގުމުގެ ހަރަދުތައް އިސްލާހުކޮށް ހަމަމަގަށް އެޅުވުމަށް ކުރަމުންގެންދާ މަސައްކަތްތަކުގެ ތެރެއިން ޕީސީބީން ވަނީ ސަރުކާރު ކުންފުނިތަކުގައި މަސައްކަތްކުރާ މުއައްޒަފުންގެ އަދަދު އުފެއްދުންތެރި މިންގަނޑެއްގައި ބެހެއްޓުމަށް އެދިފައެވެ. އެގޮތުން ޕީސީބީން ވަނީ ސަރުކާރު ހިއްސާވާ ކުންފުނިތަކުގެ މުއައްޒަފުންގެ އަދަދު 33 އިންސައްތައަށް ކުޑަކުރުމުގެ މަސައްކަތް ފަށާފައެވެ.
މިކަމާ ގުޅޭގޮތުން ޕީސީބީން މިމަހުގެ 12 ވަނަ ދުަވހު ކުންފުނިތަކަށް ފޮނުވާފައިވާ ސާކިއުލާއެއްގައި ބުނެފައިވަނީ، ކުރިއަށްއޮތް ތިން މަސްދުވަހުގެ ތެރޭގައި ހަމަޖެހިފައިވާ އުސޫލްތަކުގެ ތެރެއިން މުއައްޒަފުން މަދުކޮށް ނިންމަން ޖެހޭނޭކަމަށެވެ. އަދި އެ ނިންމުމާ އެއްގޮތަށް ކުންފުނިތަކުން އަމަލުކުރަމުންދާ ގޮތް ބެލުމަށްޓަކައި ހިއްސާކޮށްފައިވާ ފޯމް އަދާހަމަކުރުމަށްފަހު ކޮންމެ ހަފްތާއެއްގެ އާދިއްތަދުވަހު ފޮނުވުމަށް ވަނީ އެދިފައެވެ.
ޕީސީބީން ވަނީ، އެސްއޯއީތަކުގެ ހަރަދުތައް ކުޑަކުރުމުގެ މަސައްކަތް މިދިޔަ އަހަރުގެ ތެރޭގައި ފަށާފައެވެ. އެގޮތުން މިދިޔަ އަހަރުން ފެށިގެން ހަަރަދުކުޑަކުރުމަށް އަންގައި ބައެއް ފިޔަވަޅުތައް އެޅުމަށް ވަނީ އެދިފައެވެ.
ޚަރަދުތައް ކުޑަކުރުމަށް އަޅަން ލަފާދީފައިވާ ފިޔަވަޅުތައް:
- ރާއްޖެއިން ބޭރަށާއި އަތޮޅުތެރެއަށް ކޮންމެހެން ކުރަންޖެހިއްޖެ ދަތުރެއް ނޫނީ ނުކުރުން
- ރާއްޖެއިން ބޭރަށް ކުރާ ދަތުރުތައް މަދުކޮށް، ކުރަންޖެހޭ މުއާމަލާތްތައް އޮންލައިނުކޮށް ކުރިއަށްގެންދިއުން
- ރާއްޖެއިން ބޭރަށް ކޮންމެހެން ކުރަންޖެހޭ ދަތުރުތަކުގައި ފަސްޓްކްލާސް އަދި ބިޒްނަސް ކްލާހުން ދަތުރުނުކުރުން
- ދަތުރުގެ ހުރިހާ ހަރަދެއް ބޭރުގެ ފަރާތްތަކުންދޭ ދަތުރުތަކުގައި ކުންފުނިން ކުރާ ޚަރަދު ވީހާވެސް ކުޑަކުރުން
- ފެރީގެ ހިދުމަތް ލިބޭ ރަށްރަށަށް ކުރަންޖެހޭ ދަތުރުތައް ފެރީ މެދުވެރިކޮސް ކުރުން
- އަތޮޅުތެރެއަށް ކުރާ ދަތުރުތަކުގައި ކެއުމާ ހުރުމުގެ ޚަރަދުތައް އެންމެ ކުޑަވާނެހެން އިންތިޒާމުކުރުން
- ކުންފުންޏަށް ސީދާގޮތުން ފައިދާވާ ބޭރުގެ މަހާސިންތާތަކާއި، ފެއާތަކުގައި ނޫނީ ބައިވެރިނުވުން
އެސްއޯއީތަކުގެ ހަރަދުތައް ކުޑަކުރުމުގެ މަސައްކަތް އެންމެބޮޑަށް ފަށާފައިވަނީ އީރާން ހަނގުރާމައާ ގުޅިގެންނެވެ.
އެސްއޯއީތަކުގެ ހަރަދުތައް ކުންފުންޏާ އެކަށީގެންވާ މިންގަނޑުގައި ބެހެއްޓުމަށް މިފަހުން އަންގާފައިވަނީ، އީރާން ހަނގުރާމައާ ގުޅިގެން މުޅި ދުނިޔޭގެ އިގްތިސާދަށްވެސް އަދިފައިވާ ނުތަނަވަސްކަމުގެ ތެރެއިންކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
