ތޫނު އެއްޗަކުން ހަމަލާދީ އަނިޔާވެރިގޮތަކަށް މަރާލާފައި އޮއްވާ ފެނުނު ޝިއާއު މުހައްމަދު ސައީދު، މަރާލި މައްސަލައިގައި ފ. ނިލަންދޫ, ފިނިފެންމާގެ, ޢަލީ ސާހިލްގެ މައްޗަށް ކުރާ ދައުވާތަކުގެ ތެރެއިން ބައެއް ދައުވާތައް ސާބިތުގެ އޭނާގެ މައްޗަށް އިއްވި ތިން އަހަރުގެ ޖަލު ހުކުމް އިސްތިއުނާފް ކޮށްފިއެވެ.

ކްރިމިނަލް ކޯޓުން މި މައްސަލައިގެ ޝަރީއަތް ގެންދަނީ ސިއްރުކޮށްގެންނެވެ. އެގޮތުން މިމަހު 14 ވަނަ ދުވަހު އެ ކޯޓުން ވަނީ ސާހިލްގެ މައްޗަށް ކޮށްފައިވާ ދެ ދައުވާއެއް ސާބިތުވާތީވެ އޭނާ ތިން އަހަރާއި، އެއް މަހާއި ހަ ދުވަހަށް ޖަލަށްލުމަށް ހުކުމްކޮށްފައެވެ.

ސާހިލްގެ މައްޗަށް ކުރާ އިތުރު ދައުވާތަކުގެ އަޑުއެހުންތައް ކުރިއަށްހުރިއިރު، މީގެ ތެރޭގައި ގަސްދުގައި މީހަކު މެރުމުގެ ދައުވާ ހިމެނެއެވެ.

ޝިއާއު މުހައްމަދު މަރާލާފައިވަނީ 06 އޮގަސްޓު 2022 ދުވަހުގެ ރޭ، ހ. ޝީރީންވިލާގޭގައެވެ. މި މައްސަލައާ ބެހޭ ގޮތުން ޕީޖީ އޮފީހުން މީގެ ކުރިން ބުނެފައިވަނީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު ގެ 5 ވަނަ މާއްދާގެ ދަށުން ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ އާއި އިތުރު 4 ދަޢުވާއާއެކު, އެކު ޖުމްލަ 5 ދަޢުވާއެއް ސާހިލްގެ މައްޗަށް ކުރުމަށް 28 ޑިސެންބަރު 2022 ދުވަހު ކްރިމިނަލް ކޯޓަށް ހުށަހަޅައިފައިވާކަމަށެވެ.

އެގޮތުން، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާގެ އިތުރުން ސާހިލްގެ މައްޗަށް ދެން ކޮށްފައިވަނީ އޮރިޔާން ކާޑު ގެންގުޅުމުގެ ދައުވާ އާއި، ކެނެބިސް ބޭނުންކުރުމުގެ ދައުވާ ހިމެނެއެވެ.

ޝިއާއު މަރާލައި ހަށިގަނޑަށް ބޮޑެތި ގެއްލުންތަކެއް ދީފައި އޮއްވައި ފެނުނު މައްސަލައިގައި ޝާހިލް ހައްޔަރުކުރީ ކުށުގެ ވެށިންނެވެ.