މިރޭ ކުޅުމަށް ހަމަޖެހިފައިވާ ވަރލްޑްކަޕް ފައިނަލްމެޗާ ގުޅިގެން އުފާފާޅުކުރުން ކުރިއަށްގެންދާއިރު، އާއްމު އިޖުތިމާއީ މިންގަނޑުން ބޭރުނުވުމަށް ފުލުހުން އިލްތިމާސްކޮށްފިއެވެ.

ފުލުހުން އާއްމުކުރި އިލްތިމާސެއްގައި ބުނެފައިވަނީ، މިރޭގެ މެޗާއި ގުޅިގެން އުފާފާޅުކުރުމުގައި ޒިންމާދާރުވުމަށާއި އެހެން މީހުންގެ ހައްގުތަކަށް އިހުތިރާމްކުރުމަށް އިލްތިމާސްކުރާކަމަށެވެ.

މެޗު ކުޅޭ ވަގުތަކީ ދަންވަރުގެ ވަގުތަކަށް ވެފައި، ގިނަ ބަޔަކު އަރާމުކުރަމުންދާނެ ވަގުތަކަށް ވާތީ، މީހުން ދިރިއުޅޭ ސަރަހައްދުތަކާއި އާންމު މަގުތަކުގައި ބާރަށް ހަޅޭއްލެވުމާއި، ބާރަށް ލަވަ ނުވަތަ މިއުޒިކް ޖެހުމާއި އަދި އުޅަނދުފަހަރުގެ ބަަރުގޮނު އެޅުން ފަދަ، އާންމުންނަށް އުނދަގޫވާނެ ފަދަ ކަންކަމުން ދުރުހެލިވުމަށް ފުލުހުން ވަނީ އެދިފައެވެ.

އަދި އާންމު ތަންތަނުގައި ސްކްރީން ބަހައްޓައިގެން މެޗު ބަލާ ފަރާތްތަކުން، މަގުތައް ބަންދުނުވާނެހެން އަދި މަގު ބޭނުންކުރާ އެހެން ފަރާތްތަކަށް ދަތިނުވާނެހެން އުޅަނދުފަހަރު ޕާކުކުރުމަށް ސަމާލުކަން ދިނުމާއި މެޗު ނިމުމަށްފަހު، ގިނަ މީހުން އެއްވެ އުޅުމާއި، ސައިކަލު ބުރުތައް ބޭއްވުމަކީ ކައިރީގައި ދިރިއުޅޭ މީހުންނަށް އުނދަގޫވެ، ޓްރެފިކަށް ބާރުބޮޑުވާނެ ކަމެއް ކަމަށްވާތީ އެފަދަ ކަންކަން ނުކުރުމަށް ވަނީ އިލްތިމާސްކޮށްފައެވެ.

ހަމަ އެހެންމެ ކުޑަކުދިންނާއި، އުމުރުން ދުވަސްވީ މީހުންނާއި، އަވަށްޓެރިންގެ އިތުރުން މުޅި މުޖުތަމައުގެ ހަމަޖެހުމަށް އިސްކަންދީގެން މެޗް ބެލުމުގެ ކަންކަން ކުރިއަށްގެންދިއުމަށްވެސް ފުލުހުން ވަނީ އެދިފައެވެ.

ވަރލްޑްކަޕް ފައިނަލް މެޗްގައި މިރޭ އާޖެންޓީނާ އާއި ސްޕެއިން ބައްދަލުކުރާއިރު، މި ދެޓީމަށް ސަޕޯޓްކުރާ ގިނަ އަދަދެއްގެ ސަޕޯޓަރުން ރާއްޖޭގައި އުޅެއެވެ. ހާއްސަ ގޮތެއްގައި ރާއްޖޭގައި މަސައްކަތްކުރާ ބަންގްލަދޭޝްގެ ސަޕޯޓަރުގެ އެއްވަނަ ޓީމަކީ އާޖެންޓީނާއެވެ.