ދިވެހިރާއްޖެއާއި އިތިއޯޕިއާއާ ދެމެދު ސީދާ ވައިގެ ދަތުރުތައް ފެށުމުގެ މަގު ފަހިކުރުމަށްޓަކައި އެއާ ސާވިސަސް އެގްރީމަންޓެއްގައި މިއަދު ސޮއިކޮށްފިއެވެ.

ޓޫރިޒަމް އެންޑް ސިވިލް އޭވިއޭޝަން ވުޒާރާގައި ބޭއްވި ރަސްމިއްޔާތުގައި ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޓޫރިޒަމް މިނިސްޓަރު މުޙައްމަދު އަމީނެވެ. އިތިއޯޕިއާ ސަރުކާރު ތަމްސީލުކުރެއްވީ އެ ޤައުމުގެ ސިވިލް އޭވިއޭޝަން އޮތޯރިޓީގެ ޑައިރެކްޓަރ ޖެނެރަލް ޔޯހަނެސް އަބޭރާ ބެލެޓޭއެވެ. މި އެއްބަސްވުމުން ދެ ޤައުމުގެ ދެމެދުގައި ސީދާ ދަތުރުތައް ހިންގުމަށް ބޭނުންވާ ޤާނޫނީ އަދި އޮޕަރޭޝަނަލް އޮނިގަނޑު އެކުލަވައިލެވޭނެއެވެ.

މިނިސްޓަރު އަމީން ވިދާޅުވީ އިތިއޯޕިއާއަކީ ވައިގެ ދަތުރުފަތުރުގެ އެއްބަސްވުމެއް ރާއްޖެއިން ޤާއިމުކުރި އެފްރިކާގެ ހަވަނަ ޤައުމު ކަމަށެވެ. އަދި މި އެއްބަސްވުމުގެ ސަބަބުން ދެ ޤައުމުގެ ދެމެދުގައި ފަތުރުވެރިކަމާއި ވިޔަފާރީގެ އާ ފުރުޞަތުތައް ތަނަވަސްވާނެ ކަމަށް މިނިސްޓަރު ފާހަގަކުރެއްވިއެވެ.

"މި އެއްބަސްވުމުގެ ސަބަބުން ދެ ޤައުމުގެ އެއަރލައިންތަކުގެ މެދުގައި ސީދާ ޝެޑިއުލް ދަތުރުތައް ފެށުމުގެ މަގުފަހިވެގެންދާނެ. ދިވެހިރާއްޖެއާއި އިތިޔޯޕިއާއާ ދެމެދު ވައިގެ ދަތުރުފަތުރުގެ އެއްބަސްވުމެއް ޤާއިމުކުރެވިފައިމިވަނީ، އިތިއޯޕިއާގެ ޤައުމީ އެއަރލައިން، "އިތިޔޯޕިއަން އެއަރލައިންސް"އިން އެ ޤައުމުގެ އެޑިސް އަބާބާއިން ރާއްޖެއަށް ސީދާ ދަތުރުތައް ފެށުމުގެ ޝައުޤުވެރިކަން ފާޅުކޮށްފައިވާ ދަނޑިވަޅެއްގައި. އިތިޔޯޕިއާއަކީ އެފްރިކާ ބައްރުގައި އެންމެ ހަލުވިކަމާއެކު އިޤްތިސާދު ކުރިއަރަމުން އަންނަ އެއް ޤައުމު. އަދި އިތިޔޯޕިއަން އެއަރލައިންސްއަކީ އެފްރިކާ ބައްރުގެ އެންމެ ބޮޑު އެއަރލައިން. އަދި ވައިގެ ދަތުރުފަތުރުގެ އެންމެ ފުޅާ ވިއުގައެއް ޤާއިމުކޮށްފައިވާ އެއަރލައިން" މިނިސްޓަރ އަމީން ވިދާޅުވިއެވެ.

މީގެ ކުރިން މި ސަރަހައްދުތަކުގެ ފަތުރުވެރިން ރާއްޖެ އައުމަށް ޓްރާންސިޓް ޑެސްޓިނޭޝަނެއްގެ ގޮތުގައި މެދުއިރުމަތި ބޭނުންކުރި ނަމަވެސް ހަނގުރާމައިގެ ސަބަބުން އެ ދަތުރުތަކަށް ބޮޑެތި ދަތިތައް ކުރިމަތިވެފައިވެއެވެ.