މޫސުމީ ވިއްސާރައިގެ ސަބަބުން ބަންގްލަދޭޝްގެ އެކި ސަރަހައްދުތަކުގައި ފެންބޮޑުވެ، ބޮޑެތި ގެއްލުންތަކެއް ލިބިފައިވާތީ އެ ގައުމުގެ ރައްޔިތުންނަށް އެހީތެރިކަން ފޯރުކޮށްދިނުމަށް އިންޓަރނޭޝަނަލް އެއިޑް ކެމްޕޭން (އައިއޭސީ) އިން "ކްރައިސިސް އެމެޖެންސީ ރިލީފް ފަންޑް" ހުޅުވައިފިއެވެ.

ބަންގްލަދޭޝްގެ އިރުދެކުނުގެ ހަތް ޑިސްޓްރިކްޓެއް ކަމަށްވާ ޗިޓަގޮންގް، ކޮކްސް ބާޒާރު، ބަންޑަރުބަން، ރަންގަމަތީ، ޚަގްރަޗާރީ، މޯލްވީބާޒާރު އަދި ހަބީގަންޖްގައި ފެންބޮޑުވުމުގެ ސަބަބުން މިހާތަނަށް 44 މީހަކު މަރުވެ، މިލިއަނަކަށްވުރެ ގިނަ މީހުންވަނީ ހާލުގައި ޖެހިފައެވެ. މީގެ އިތުރުން 267,918 އާއިލާއެއް ވަނީ އެކަހެރިވެ، ކާބޯތަކެއްޗާއި ބޯފެނަށް ޖެހިފައެވެ.

އައިއޭސީން ބުނި ގޮތުގައި މި ވަގުތު އެންމެ ބޮޑަށް ބޭނުންވަނީ އެމަރޖެންސީ އެހީތެރިކަމެވެ. އޭގެ ތެރޭގައި ކައްކައިގެން ކެވޭނެ ގޮތެއް ނެތް އާއިލާތަކަށް ބޭނުންވާ ކެއިންބުއިމުގެ ސާމާނާއި، ހިފާގެންގުޅޭ ސާމާނުގެ އިތުރުން ބޭސްފަރުވާގެ ސާމާނު ހިމެނެއެވެ.

ފެންބޮޑުވުމުގެ ސަބަބުން ގިނަ ބައެއްގެ ބަދިގެތައް ބޭނުންނުކުރެވޭވަރުވެފައި ވާއިރު، ގިނަ ބަޔަކު މިހާރު ބަރޯސާވަމުންދަނީ ހިކި ކާނާއަށެވެ.

އަވައްޓެރި ބަންގްލަދޭޝްގައި ހާލުގައި ޖެހިފައިވާ އާއިލާތަކަށް އެހީވުމުގެ ފުރުސަތު މިހާރު ވަނީ އާންމުކޮށް ހުޅުވާލާފައެވެ. އެހީތެރިކަން ފޯރުކޮށްދޭން ބޭނުންވާ ފަރާތްތަކުން ތިރީގައިވާ އެކައުންޓްތަކަށް ފައިސާ ޖަމާކުރުމަށް އައިއޭސީން އެދެއެވެ.

ބީއެމްއެލް އިސްލާމިކް: 7770000062744

އެމްއައިބީ: 90101555002111003

އެކައުންޓް ނަން: International Aid Campaign

އައިއޭސީން އިތުރަށް ބުނީ، އެ ޖަމިއްޔާގެ މަޝްރޫއުތަކުގެ އަގުތައް ކަނޑައެޅިފައިވަނީ މަޝްރޫއު ހިންގުމާއި، ބެލެހެއްޓުމާއި، އިދާރީ ހިންގުމުގެ ޚަރަދުތަކަށް އެވްރެޖްކޮށް 12.5 އިންސައްތަ ހިމެނޭ ގޮތަށް ކަމަށެވެ.

ބަންގްލަދޭޝްގައި ހުރި ރޯހިންޔާ ރެފިއުޖީ ކޭމްޕުތަކަށްވެސް މި ވިއްސާރައިގެ ސަބަބުން ބޮޑެތި ގެއްލުންތަކެއް ލިބިފައިވާއިރު، ބޯކޮށް ވާރޭވެހި ބިންގަނޑު ކަނޑައިގެން ދިއުމުގެ ސަބަބުން ކޭމްޕުތަކުންވެސް 16 މީހަކު ވަނީ މަރުވެފައެވެ. އެހީ ފޯރުކޮށްދިނުމުގައި ބަންގްލަދޭޝްގެ އަސްކަރިއްޔާއިންވެސް ދަނީ ހަރަކާތްތެރިވަމުންނެވެ.