ބަންގްލަދޭޝްއަށް ކުރިމަތިވި މޫސުމީ ވިއްސާރާގެ ސަބަބުން ހާލުގައި ޖެހުނު ފަރާތްތަކަށް އެހީވުމަށް ރާއްޖޭގެ އިންޓަރނޭޝަނަލް އެއިޑް ކެމްޕެއިނުން އެހީގެ ތަކެތި ފޯރުކޮށްދިނުމުގެ މަސައްކަތް ފުޅާކޮށްފިއެވެ.

ބަންގްލަދޭޝްއަށް ކުރިމަތިވި މޫސުމީ ވިއްސާރައިގެ ސަބަބުން ފެންބޮޑުވެ ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމުގެ މަޝްރޫޢުގެ ދެވަނަ ދުވަހު، އައިއޭސީން ވަނީ ކާބޯތަކެތީގެ 300 ޕެކޭޖް ބަހާފައެވެ.

ބަންގްލަދޭޝްއަށް ކުރިމަތިވި މޫސުމީ ވިއްސާރާގައި ގެއްލުން ލިބުނު ފަރާތްތަކަށް އެހީވުމަށް އައިއޭސީން މިމަހުގެ 22 ވަނަ ދުވަހު އެހީގެ ތަކެތި ބަހަން ފެށިއިރު، މި އެހީ ބެހުމުގެ ހަރަކާތް ކުރިއަށް ގެންގޮސްފައިވަނީ ކޮކްސް ބާޒާރު ސަދަރުގެ އެސް.އެމް ޕާރާ ގާލްސް މަދްރަސާ ދަނޑުގައެވެ.

އައިއޭސީން އެހީގެ ތަކެތި ބެހުން...

މި މަސައްކަތް ކުރިއަށް ދިޔައީ ބަންގްލަދޭޝްގެ ޤާނޫނު ހަދާ މަޖިލީހުގެ މެންބަރު ލުތުފުއްރަހްމާން ކާޖޮލް އާއި ކޮކްސް ބާޒާރު ސަދަރުގެ އުޕަޒިލާ ނިރްބާހީ އޮފިސަރު (ޔޫ.އެން.އޯ) ތަހްމީނާ އަކްތަރުގެ ބެއްލެވުމުގެ ދަށުން، އެބޭފުޅުންގެ ފުރިހަމަ އެއްބާރުލުމާއެކުގައިކަމަށް އައިއޭސީން ބުނެއެވެ.

މި އެހީގެ ދަށުން ކޮކްސް ބާޒާރު ސަދަރު، ރާމޫ އަދި އީދުގާއޯ ސަރަހައްދުގެ ހާލުގައި ޖެހިފައިވާ އާއިލާތަކަށް ބޭނުންވާ ތަކެތި ވަނީ ފޯރުކޮށްދީފައެވެ.

އައިއޭސީން އެހީގެ ތަކެތި ބެހުން...

އައިއޭސީން ބަންގްލަދެޝްގައި އެހީގެ ތަކެތި ބަހަމުންދާއިރު، އެ ޖަމިއްޔާއިން ދަނީ މޫސުމީ ވިއްސާރާގައި އަފްޢާނުސްތާނުގައި ހާލުގައި ޖެހުނު ފަރާތްތަކަށްވެސް އެހީގެ ތަކެތި ފޯރުކޮށްދެމުންނެވެ.

ބަންގްލަދޭޝްގެ އިރުދެކުނުގެ ހަތް ޑިސްޓްރިކްޓެއް ކަމަށްވާ ޗިޓަގޮންގް، ކޮކްސް ބާޒާރު، ބަންޑަރުބަން، ރަންގަމަތީ، ޚަގްރަޗާރީ، މޯލްވީބާޒާރު އަދި ހަބީގަންޖްގައި ފެންބޮޑުވުމުގެ ސަބަބުން މިހާތަނަށް 44 މީހަކު މަރުވެ، މިލިއަނަކަށްވުރެ ގިނަ މީހުންވަނީ ހާލުގައި ޖެހިފައެވެ. މީގެ އިތުރުން 267,918 އާއިލާއެއް ވަނީ އެކަހެރިވެ، ކާބޯތަކެއްޗާއި ބޯފެނަށް ޖެހިފައެވެ.

އަވައްޓެރި ބަންގްލަދޭޝްގައި ހާލުގައި ޖެހިފައިވާ އާއިލާތަކަށް އެހީވުމުގެ ފުރުސަތު މިހާރު ވަނީ އާންމުކޮށް ހުޅުވާލާފައެވެ. އެހީތެރިކަން ފޯރުކޮށްދޭން ބޭނުންވާ ފަރާތްތަކުން ތިރީގައިވާ އެކައުންޓްތަކަށް ފައިސާ ޖަމާކުރުމަށް އައިއޭސީން އެދެއެވެ.

ބީއެމްއެލް އިސްލާމިކް: 7770000062744

އެމްއައިބީ: 90101555002111003

އެކައުންޓް ނަން: International Aid Campaign

އައިއޭސީން އިތުރަށް ބުނީ، އެ ޖަމިއްޔާގެ މަޝްރޫއުތަކުގެ އަގުތައް ކަނޑައެޅިފައިވަނީ މަޝްރޫއު ހިންގުމާއި، ބެލެހެއްޓުމާއި، އިދާރީ ހިންގުމުގެ ޚަރަދުތަކަށް އެވްރެޖްކޮށް 12.5 އިންސައްތަ ހިމެނޭ ގޮތަށް ކަމަށެވެ.