މާލެ ކޮމާޝަލް ހާބަރު މެދުވެރިކޮށް ކަނޑުމަގުން ރާއްޖެއަށް އެތެރެކުރަން މަސައްކަތްކުރި 3110 ގްރާމްގެ މަސްތުވާތަކެތި އިއްޔެ ކަސްޓަމްސްއިން އަތުލައިގެންފިއެވެ.
އަތުލައިގަނެވުނު ތަކެތީގެ މަގުމަތީ އަގު 5.6 މިލިއަން ދިވެހި ރުފިޔާއަށްވުރެ އިތުރު ކަމަށް ކަސްޓަމްސްއިން ހާމަކޮށްފައިވެއެވެ.
މި މައްސަލައިގައި އަތުލައިގަނެވުނު މަސްތުވާތަކެތި ތަހުލީލު ކުރިއިރު، އެ ތަކެތި މަސްތުވާތަކެތީގެ ބާވަތެއް ކަމަށްވާ ސިންތެޓިކް ކެތިނޯން އަށް ޕޮޒިޓިވް ވެފައިވާ ކަމަށް ކަސްޓަމްސްއިން މައުލޫމާތު ދެއެވެ.
މިމަހު 18 ވަނަ ދުވަހު ވެސް މަސްތުވާތަކެތީގެ ބޮޑު ޝިޕްމަންޓެއްވަނީ އަތުލައިގެންފައެވެ. އެ ފަހަރު ސ. ގަން އިންޓަނޭޝަނަލް އެއާޕޯޓުން ވައިގެ މަގުން ރާއްޖެއަށް އެތެރެކުރަން މަސައްކަތްކުރި 5.5 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން ހިފަހައްޓާފައިވެއެވެ.
ވައިގެ މަގުން އެތެރެކުރަން އުޅުނު ތަކެތި ފެނިފައިވަނީ އިންޑިއާއިން ރާއްޖެ އައި އިންޑިއާގެ ދެ ފަސިންޖަރެއްގެ ލަގެޖުންނެވެ.
ގަން އެއާޕޯޓުގެ މައްސަލައިގައި އަތުލައިގަނެވުނު މަސްތުވާތަކެއްޗާއި އެ ތަކެތި ރާއްޖެ ވައްދަން މަސައްކަތްކުރި ދެ ފަސިންޖަރުން ވަނީ ތަހުގީގު ކުރުމަށްޓަކައި ދިވެހި ފުލުހުންގެ ޚިދުމަތާ ހަވާލުކޮށްފައެވެ.
އެހެންކަމުން ފާއިތުވި ހަފުތާއެއްހައި ދުވަހުގެ ތެރޭގައި ކަނޑުމަގާއި ވައިގެ މަގުން ޖުމްލަ 8.6 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން ވަނީ ހިފަހައްޓާފައެވެ.
Advertisement
This content is created and paid for by advertisers and does not involve Voice Journalists
