ބަންގްލަދޭޝްގެ ރައީސް މުޙައްމަދު ޝަހާބުއްދީން ރައީސްކަމުގެ މަގާމުން މިއަދު އިސްތިއުފާދެއްވައިފިއެވެ.

ރައީސް މުޙައްމަދު ޝަހާބުއްދީން، މިއަދު ވަނީ އެ ޤައުމުގެ ޤާނޫނު ހަދާ މަޖިލީހުގެ ރައީސް ޙާފިޒުއްދީން އަޙްމަށް އިސްތިއުފާގެ ސިޓީފުޅު ފޮނުއްވާފައެވެ. އިސްތިޢުފާގެ ސިޓީގައި ޝަހާބުއްދީން ވިދާޅުވެފައިވަނީ، ސިއްޙީ ގޮތުން ދިމާވެފައިވާ ގިނަގުނަ އުނދަގޫތަކުގެ ސަބަބުން، ދުސްތޫރީ އެންމެ މަތީ މަޤާމުގެ މަސްއޫލިއްޔަތުތައް އަދާކުރުމުގެ ޖިސްމާނީ އަދި ނަފްސާނީ ޤާބިލުކަން މިހާރު އެމަނިކުފާނުގެ ކިބައިގައި ނެތް ކަމަށެވެ.

އެގޮތުން ޝަހާބުއްދީން ވަނީ އެމަނިކްފާނަށް ހިތުގެ ބައްޔާއި، ލޭމަތީވުމާއި، ހަކުރުބަލީގެ އިތުރުން ކިޑްނީގެ މައްސަލަތަކަށް ފަރުވާ ހޯއްދަވަމުންދާކަމަށް ވިދާޅުވެފައެވެ. ޝަހާބުއްދީން މަޖިލީހުގެ ރައީސްއަށް ފޮނުއްވެވި ސިޓީގައި ވިދާޅުވެފައިވަނީ، އެމަނިކްފާނު ހިތުގެ ބައިޕާސް ސާޖަރީއެއްވެސް ހައްދަވާފައިވާކަމަށެވެ. އަދި އެންމެ ފަހުން ހެދި މެޑިކަލް ޓެސްޓުތަކުން ދައްކާގޮތުން 'އޮޓޯނޮމިކް ނިއުރޯޕަތީ' ކިޔާ ބައްޔެއް ޖެހިފައިވާކަންވެސް ވަނީ ވިދާޅުވެފައެވެ. މި ބަލީގެ ބާވަތުން ބައެއް ފަހަރު ކުޑަވަގުތުކޮޅަކަށް ހޭނެތޭ ގޮތްވެއެވެ.

" ވީމާ، މި ހާލަތަށް ރިއާޔަތްކޮށް، ޤާނޫނުއަސާސީގެ 50 ވަނަ މާއްދާގެ (3) ވަނަ ނަންބަރުގައިވާ ގޮތުގެ މަތިން، އަޅުގަނޑު ރައީސުލްޖުމްހޫރިއްޔާގެ މަޤާމުން އިސްތިޢުފާ ދެމެވެ" ޝަހާބުއްދީންގެ ސިޓީ ނިންމަވާލައްވަމުން ވިދާޅުވެފައި ވެއެވެ.

ބަންގްލަދޭޝްގެ ރައީސް މުޙައްމަދު ޝަހާބުއްދީން މަގާމުން އިސްތިއުފާ ދެއްވުމާއެކު އިންތިޤާލީ ރައީސަކު އައްޔަންކުރުމުގެ ދުސްތޫރީ މަރުޙަލާ ފެށިފައިވާއިރު، އެ މަސައްކަތް ކުރިއަށްދާކަމަށް ބަންގްލަދޭޝް ސަރުކާރުން ވަނީ ބުނެފައެވެ.

ބަންގްލަދޭޝްގެ ޤާނޫނު އަސާސީގެ 54 ވަނަ މާއްދާގައިވާ ގޮތުގެ މަތިން، ރައީސަކު ނެތް ހާލަތެއްގައި އައު ރައީސަކު އިންތިޚާބު ކުރެވެންދެން ރައީސުލްޖުމްހޫރިއްޔާގެ މަސްއޫލިއްޔަތުތައް އަދާކުރައްވާނީ މަޖިލީހުގެ ރައީސެވެ. އެ މާއްދާގައި ބުނެފައިވަނީ ރައީސްގެ މަޤާމު ހުސްވެއްޖެނަމަ، ނުވަތަ ބަލިވެގެން ނުވަތަ އެނޫންވެސް ސަބަބަކާ ހުރެ މަޤާމުގެ ވާޖިބުތައް އަދާނުކުރެވޭ ހާލަތެއް މެދުވެރިވެއްޖެނަމަ، އައު ރައީސަކު އިންތިޚާބު ކުރެވެންދެން އެ މަޤާމުގެ މަސްއޫލިއްޔަތުތައް އަދާކުރަންވާނީ މަޖިލީހުގެ ރައީސް ކަމަށެވެ.

މީގެ އިތުރުން ޤާނޫނުއަސާސީގެ 123 ވަނަ މާއްދާގެ (2) ވަނަ ނަންބަރުގައި ބަޔާންކޮށްފައިވަނީ، ރައީސް އަވަހާރަވުމުގެ ސަބަބުން ނުވަތަ އިސްތިޢުފާ ދެއްވުމުން ނުވަތަ މަޤާމުން ވަކިކުރުމުގެ ސަބަބުން މަޤާމު ހުސްވެއްޖެނަމަ، 90 ދުވަހުގެ ތެރޭގައި އައު ރައީސަކު އިންތިޚާބު ކުރަންޖެހޭނެ ކަމަށެވެ.

މުޙައްމަދު ޝަހާބުއްދީނަކީ 2011 އިން 2016 އަށް އެންޓި-ކޮރަޕްޝަން ކޮމިޝަން (އޭ.ސީ.ސީ) ގެ ކޮމިޝަނަރެއްގެ މަޤާމު އަދާކުރެއްވި ބޭފުޅެކެވެ. އެމަނިކުފާނު ބަންގްލަދޭޝްގެ 22 ވަނަ ރައީސްގެ ގޮތުގައި މަޤާމާ ހަވާލުވެވަޑައިގަތީ ޢަވާމީ ލީގު ސަރުކާރުގައި، 24 އޭޕްރީލް 2023 ގައެވެ. 5 އަހަރުގެ ދައުރެއް ފުރިހަމަކުރައްވަން އޮތް ނަމަވެސް، މިއަދު އެމަނިކްފާނު މަގާމުން އިސްތިއުފާދެއްވިއިރު ދައުރު ހަމަވާން 2 އަހަރު އެބައޮތެވެ.

ބަންގްލަދޭޝްގެ ރައީސް މުހައްމަދު ޝަހާބުއްދީން އިސްތިއުފާ ދެއްވާފައިމިވަނީ، އެޤައުމުގެ ނޭޝަނަލިސްޓް ޕާޓީ (ބީ.އެން.ޕީ) އިން ސަރުކާރު އެކުލަވާލުމާއެކު، ރައީސް ބަދަލުކުރުމުގެ ވާހަކަތަކެއް ދެކެވިފައިވަނިކޮށެވެ.