ފަތުރުވެރިކަން އެންމެ ބޮޑަށް ފުޅާކޮށް ހިންގަމުން އަންނަ މާލެ އަތޮޅު މާފުށީގައި މިއަދު ޕެރެސެއިލިންނެއް ފަލައިގެން ދިއުމުގެ ހާދިސާއެއް ހިނގައިފިއެވެ.

މި ހާދިސާ ހިނގާފައިވަނީ މިއަދު ހެދުނު ހިނގި މި ހާދިސާގައި ޕެރެސެއިލިން ކުޑަ ފަޅައިގެން ދިޔައިރު އޭގައި ޗައިނާއަށް ނިސްބަތްވާ ދެ ފަތުރުވެރިން ތިއްބެވެ. މާފުށިން ވާހަކަދެއްކި ބައެއް މީހުން ބުނެފައިވަނީ އޭތި ފަޅައިގެން ގޮސްފައިވަ, ވައިގަނޑުގަދަވެ ތިރިކުރަން އުޅުމުގެ ތެރޭގައެވެ. މި ހާދިސާގައި ވަތްމާފުއްޓާއި މާފުއްޓާ ދެމެދު އަޅާފައި އޮތް ޒިޕްލައިނުގައި ޕެރެސެއިލިން އަޅައިގަތްއިރު، އެކަކު ވަނީ އޭގައި އަޅައިގަތުމުގެ ކުރިން މޫދަށް ފުންމާލާފައެވެ. 

މޫދަށް ވެއްޓުނު މީހާ ޖެޓްސްކީގައި ގޮސް ސަލާމަތްކުރިއިރު، ޒިޕްލައިނުގައި ޕެރެސެއިލިންނާއެކު އޮތް މީހާވެސް ވަނީ މާގިނައިރުތަކެއްނުވެ ސަލާމަތްކޮށްފައެވެ. މި ހާދިސާގައި މޫދަށް ވެއްޓުނު މީހާއަށް މާބޮޑެތި އަނިޔާތަކެއް ނުވިނަމަވެސް މާފުށި ސިއްހީ މަރުކަޒުން ފަރުވާ ހޯދިކަމަށް އެރަށުން ވާހަކަދެއްކި މީހަކު ވަނީ ބުނެފައެވެ.

މިކަމާ ބެހޭގޮތުން ކަމާބެހޭ އިދާރާއަކުން އަދި ވަކިއެއްޗެއް ބުނެފައެއް ނުވެއެވެ.

ރާއްޖޭގެ ބޮޑު ސަރަހައްދުތަކަށް މޫސުން ގޯވެފައިވާއިރު، ކަމާ ބެހޭ އިދާރާތަކުން ވަނީ މޫދުކުޅިވަރުތަކާއި އަދި ދަތުރުފަތުރުކުރު ކުރުމުގައި މޫސުމަށް ބަލައިގެން ކަންކަން ރޭވުމަށް އިލްތިމާސްކޮށްފައެވެ.