ހުޅުމާލޭގައި ތަރައްގީކޮށްފައިވާ އަމާން ޓަވަރުތަކުގެ އާއްމު ސަރަހައްދުތަކަށް އުކާލާފައިވާ ކުނިތައް ނައްތާލުމަށް މިހާތަނަށް 13.5 މިލިއަން ރުފިޔާ ހަރަދުވެފައިވާ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ހާމަކޮށްފިއެވެ.

އެފްޑީސީން އާއްމުކޮށްފައިވާ ތަފާސްހިސާބުތަކަށް ބަލާއިރު، އަމާން ޓަވަރުތަކުގެ އާއްމު ސަރަހައްދުތަކުން މިހާތަނަށް ޖުމްލަ 5,040 ޓަނުގެ ކުނި ވަނީ ނައްތާލެވިފައެވެ. މީގެ ތެރޭގައި ހިމެނެނީ އޮކްޓޯބަރު 2025 އިން މާރިޗު 2026 އަށް ނައްތާލެވުނު 3,178 ޓަނުގެ ކުނި އަދި މޭ 2026 އިން ޖޫން 2026 އަށް ނައްތާލެވުނު 1,862 ޓަނުގެ ކުނިއެވެ. އެފްޑީސީން ފާހަގަކުރި ގޮތުގައި އެއް ޓަނުގެ ކުނީގެ މިންވަރަކީ ގާތްގަނޑަކަށް 133 ކޮތަޅު ކުންޏެވެ.

މި މަސައްކަތަށް ކުރެވުނު ހަރަދުތަކުގެ ތަފްސީލަށް ބަލާއިރު:

އޮކްޓޯބަރު 2025 އިން މާރިޗު 2026 އަށް: 8.45 މިލިއަން ރުފިޔާ

އޭޕްރީލް 2026 ގައި: 7.51 މިލިއަން ރުފިޔާ

މޭ 2026 އިން ޖޫން 2026 އަށް: 4.95 މިލިއަން ރުފިޔާ

މިހާތަނަށް އާއްމު ސަރަހައްދުތައް ސާފުކުރުމަށާއި ކުނި ނައްތާލުމުގެ މަސައްކަތަށް ޖުމްލަ 13,481,557.15 (ތޭރަ މިލިއަން ހަތަރުލައްކަ އަށްޑިހަ އެއްހާސް ފަސްސަތޭކަ ފަންސަހަތެއް) ރުފިޔާ ވަނީ ހަރަދުވެފައެވެ.

އެފްޑީސީން ބުނީ މިހާ ބޮޑު ހޭދައެއް ކުރަންޖެހިފައިވަނީ ކަނޑައެޅިފައިވާ އުސޫލުތަކާ ހިލާފަށް އާއްމު ސަރަހައްދުތަކަށް އެކި ބާވަތުގެ ކުނި އެޅުމުގެ ސަބަބުން ކަމަށެވެ. މިފަދަ އިހުމާލުތަކުގެ ސަބަބުން އެ ތަންތަން ސާފުކޮށް ބެލެހެއްޓުމަށް ދައުލަތުގެ ބަޖެޓުންނާއި ކޯޕަރޭޝަނުން ކުރަންޖެހޭ ހޭދަ ނިސްބަތުން އިތުރުވެފައިވާކަން އެ ކޯޕަރޭޝަނުން ފާހަގަކުރެއެވެ.

އެހެންކަމުން، މިފަދަ ބޭކާރު ހަރަދުތައް ކުޑަކޮށް، އެންމެންނަށް ހިތްފަސޭހަ މާހައުލެއް ބިނާކުރުމަށްޓަކައި، ކުނި އުކާލުމުގައި މިހާރަށްވުރެ ބޮޑަށް ޒިންމާދާރުވުމަށް އެފްޑީސީން ވަނީ އާއްމުންގެ ކިބައިން އިލްތިމާސްކޮށްފައެވެ.