ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލީހުގެ މެންބަރުން އިންތިޚާބު ކުރުމަށްޓަކައި ހާމަ ވޯޓު ނެގުމަށް ނިންމާފައިވަނީ އެ ޕާޓީގެ އަސާސީ ޤަވާޢިދާ އެއްގޮތަށް ކަމަށް އެ ޕާޓީން ބުނެފިއެވެ.
ޕީއެންސީން ނެރުނު ނޫސް ބަޔާނެއްގައި ބުނެފައިވަނީ، ޕާޓީގެ މަތީ މަޖިލީހުގެ ބައްދަލުވުމުގައި ވޯޓުލުން ކުރިއަށްގެންދާ ގޮތާ ގުޅޭގޮތުން ބައެއް މީޑިއާތަކުން ފަތުރަމުންދާ ވާހަކަތަކަކީ ޙަޤީޤަތާ ޚިލާފު ވާހަކަތަކެއް ކަމަށެވެ.
ޕާޓީގެ އެކި ގުނަވަންތަކުގެ މަސައްކަތްތައް ތަރުތީބުކުރާނެ ގޮތާއި ކަންކަން ނިންމާނެ ގޮތް އިލެކްޝަންސް ކޮމިޝަނުގައި ރަޖިސްޓްރީކޮށްފައިވާ ޕާޓީގެ އަސާސީ ޤަވާޢިދުގައި ވަރަށް ސަރީޙަކޮށް ބަޔާންކޮށްފައިވާނެ ކަމަށް އެ ޕާޓީން ފާހަގަކުރެއެވެ.
އެ ބަޔާނުގައި ބުނެފައިވާ ގޮތުގައި، ޕާޓީގެ އަސާސީ ޤަވާޢިދުގެ ޗެޕްޓަރ 7 ގެ 69 ވަނަ މާއްދާގެ (ހ) ގައި ބަޔާންކޮށްފައިވަނީ މަތީ މަޖިލީހުގައި ކަންކަން ފާސްކުރުމަށް ވޯޓުދޭނީ އަތް އުފުލައިގެން ކަމަށެވެ. އަދި އެ މާއްދާގެ (ށ) ގައި، ޕާޓީގެ މެންބަރުންގެ މަޖިލީހަށް މެންބަރުން އިންތިޚާބުކުރުމަށް ނެގޭނީ "ހާމަ ވޯޓެއް" ކަމަށް ބަޔާންކޮށްފައިވާ ކަމަށްވެސް ޕީއެންސީން ބުނެއެވެ.
"މި ޕާޓީގެ މަތީ މަޖިލީހުގައި ޕާޓީގެ ނައިބުރައީސުންނާއި، ޕާޓީގެ މެންބަރުންގެ މަޖިލީހުގެ މެންބަރުން އިންތިޚާބުކުރުމަށް ހާމަ ވޯޓު ނެގުމަކީ ޕާޓީގެ އަސާސީ ޤަވާޢިދާ ޚިލާފަށް ހިންގާ ކަމެއް ނޫން،" ބަޔާނުގައިވެއެވެ.
މީގެ އިތުރުން، އަތް އުފުލައިގެން ވޯޓު ނެގުމަށް ނިންމީ މަތީ މަޖިލީހުގެ ކަންކަން ވިލަރެސްކުރާ ކޮމިޓީން ކަމަށް ބުނެ ފަތުރަމުންދާ ޚަބަރުތަކަކީ ކަނޑައެޅިގެން ދޮގު ވާހަކަތަކެއް ކަމަށާއި، އެއީ އަސާސީ ޤަވާޢިދުގައި އޮންނަ ގޮތް ކަމަށް ޕީއެންސީން ވަނީ ތަކުރާރުކޮށްފައެވެ.
ޕީއެންސީން އިތުރަށް ބުނެފައިވަނީ، ޕާޓީގެ އެތެރޭގެ ހިންގުމުގެ ހުރިހާ ކަމެއްވެސް ކުރިއަށްދާނީ ޑިމޮކްރެޓިކް އުސޫލުތަކުގެ ތެރެއިން، ދެފުށް ފެންނަ ގޮތެއްގައި ކަމުގެ ޔަޤީންކަން އެންމެހައި މެންބަރުންނަށް އަރުވާ ކަމަށެވެ. މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްވެ ހުންނަވައި ހިންގަވާ ޕީއެންސީގެ އަސާސީ ޤަވާޢިދަކީ ޕާޓީގެ ވެބްސައިޓުން ކޮންމެ މީހަކަށްވެސް ފެންނަން އޮންނާނެ ލިޔުމެއްކަން އެ ޕާޓީން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
