އިގްތިސާދީ ގޮތުން ދަތިތަކެއް ހުރިނަމަވެސް ރައްޔިތުންނަށް ވެވަޑައިގެންނެވި ވައުދުތައް ފުއްދަވާނޭކަމަށް ރައީުސލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އއ އުކުޅަހަށް ކުރައްވަމުން ގެންދަވާ ޒިޔާރަތުގައި މިރޭ ވެރިކަންކުރާ ކޮންގްރެސް ޕާޓީގެ ޖަގަހަ ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ދިމާވެފައި އޮތް އިގްތިސާދީ ހާލަތު ހަމަޔަކަށް އެޅުވުމަށް ކުރަމުންގެންދާ މަސައްކަތްތަކާއެކުވެސް ވައުދުތައް ފުއްދަވާނޭކަމަށެވެ. އެގޮތުން ރައްޔިތުންނަށް ވީ ވައުދުތައް 2028 ވަނަ އަހަރުގެ ފުރަތަމަ ހަމަސްދުވަހުގެ ތެރޭގައި ފުއްދަވާނޭކަމަށް ރައީސް ވިދާޅުވިއެވެ.
ރައީސް ވިދާޅުވީ ކޮންމެރަށަކަށްވެސް ކުރުމަށް ނިންމާފައިވާނީ އެ ރަށްރަށަށް މުހިންމު މަޝްރޫޢުތައް ކަމަށާއި، މިނިވަންދުވަހުގެ ޖަލްސާގައި ވިދާޅުވިގޮތަށް މަސައްކަތްތައް ނިމިގެންދާނޭކަމަށެވެ.
ހުރިހާ ރަށެއްގަވެސް އެރަށެއްގެ ރައްޔިތުންގެ އުންމީދުތަކާ ގުޅިފަވާ އަޅުގަނޑު ރިޔާސީ އިންތިޚާބާ އަދި ފަހުންވެސް ރައްޔިތުންނާ އެކީގަ ބައްދަލުވި ފަހަރުތަކުގަވީ ވަޢުދުތަކުގެ ތެރޭގަ ހުރި އެންމެ މުހިންމު މަޝްރޫޢުތައް އިރާދަކުރެއްވިއްޔާ ހަމަ މި ދައުރުގެ ތެރޭގަ އަޅުގަނޑުމެން ނިންމާފަ ކޮށްދޭނަން
ރައީސް ޑރ.މުއިއްޒު
ޖަލްސާގައި ރައީސް މިރޭވެސް ވިދާޅުވީ މި ސަރުކާރުން ސިޔާސީވެރިން ހިފާ ހައްޔަރުނުކުރާނޭ ކަމަށާއި، ވީ ވައުދާ އެއްގޮތަށް އެކަމުގައި ދެމިހުންނަވާނޭކަމަށެވެ. މި ސަރުކާރުން ކަންކަން ކުރަމުންދާނީ ޤައުމީ ވިސްނުމުގައި ކަމަށާއި، ޤައުމަށް ހަމަޖެހުން ގެނައުމަކީ އަދުގެ ސަރުކާރުގެ އެންމެ ބޮޑު އެއް ވައުދުކަމަށެވެ.
އިދިކޮޅުން މަސައްކަތްކުރަނީ ގައުމު ހަލަބޮލިކުރަންކަން ފާހަގަކުރައްވައި ރައީސް ވިދާޅުވީ ޤައުމާމެދު އިދިކޮޅު ފަރާތްތަކުގެ އިހުލާސްތެރި ވިސްނުމެއް ނެތްކަމަށެވެ. ޤައުމީ ވިސްނުން ހުންނަކަމަށް ވަނީނަމަ، މަސައްކަތްކުރާނީ ޤައުމީ ވިސްނުމުގައި ޒިންމާދާރުކަމާއެކުގައިކަން ރައީސް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
