ވެރިކަންކުރާ ކޮންގްރެސްޕާޓީ، ޕީޕަލްސް ނެޝަނަލް ކޮންގްރެސްގެ ނައިބުރައީސްކަމުގެ މަގާމަށް މިހާރުވެސް އެ މަގާމުގައި ހުންނެވި މުހައްމަދު ނިމާލް ކުރިމަތިލައިފިއެވެ.
ޕީއެންސީގެ ނައިބުރައީސްކަމުގެ މަގާމަށް ކުރިމަތި ލެއްވިކަން އިއުލާނުކުރަމުން ސޯޝަލް މީޑިއާގައި ނިމާލް ކުރެއްވި ޕޯސްޓެއްގައި ވިދާޅުވީ، މަގާމަށް ކުރިމަތިލުމުގެ އެންމެ މުހިންމު އަމާޒަކީ، ދިވެހިރާއްޖޭގެ ސުލްހަމަސަލަސްކަމާއި ތަރައްގީއަށާއި، އަދި ވެއްޓިފައިވާ އިގްތިސާދީ އަނދަވަޅުން ސަލާމަތްކުރުމަށްތަކައި ރައީސް ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅުގައި ޕާޓީގެ ފަރާތުންނާއި އަމިއްލަ ފަރުދީ ގޮތުން ދެވެން އޮތް އެންމެހައި އެހީތެރިކަމެއް ފޯރުކޮށްދިނުން ކަމަށެވެ.
މީގެ އިތުރުން 2028ގެ ރިޔާސީ އިންތިޚާބު، ރައީސް ޑރ. މުޢިއްޒަށް ކާމިޔާބުކޮށްދިނުމުގައި ޕާޓީގެ މެންބަރުންނާ އެކު މަސައްކަތްކުރުމަކީވެސް އެންމެ ބޮޑު އަމާޒުކަމަށާއި، އަދި އެއީ ހާސިލުކުރަން ބޭނުންވާ އެންމެ ބޮޑު ލަނޑުދަނޑި ކަމަށްވެސް ނިމާލް ވިދާޅުވިއެވެ.
ނިމާލްގެ ޕޯސްޓްގައި ވަނީ އިދިކޮޅުގައި ޕާޓީއެއްގެ ގޮތުގައި އޮވެމެ، ޕީއެންސީގެ ނައިބު ރައީސެއްގެ ހައިސިއްޔަތުން، އޭރުގެ ސަރުކާރުން ކުރިމަތިކުރުވި އެކިއެކި ފިއްތުންތަކާއި ގޮންޖެހުންތަކާ އެކު ވެސް ގިނަގުނަ މަސައްކަތްތަކެއް ކުރެވުނުކަން ފާހަގަ ކުރައްވާފައެވެ.
ނިމާލް މިހާރުވެސް ގެންދަވަނީ ޕީއެންސީގެ ނައިބުރައީސް ކަމުގެ މަގާމު ފުރުއްވަމުންނެވެ. އަދި އޭނާއަކީ މިހާރު އެލްޖީއޯގެ ސީއީއޯވެސް މެއެވެ. ރައީސް ޔާމީނުގެ ވެރިކަމުގައި ނިމާލް ފެނަކަ ހިންގެވިއިރު، ނިމާލް ވަނީ ޓޫރިޒަމް މިނިސްޓްރީގެ ޑެޕިއުޓީ މިނިސްޓަރުކަމުގެ އިތުރުންވެސް އެމްއާރުޑީސީގެ އެމްޑީކަމުގެ މަގާމުވެސް ފުރުއްވާފައެވެ.
Advertisement
This content is created and paid for by advertisers and does not involve Voice Journalists
