ފަހިދިރިއުޅުން ކޯޕަރޭޝަނުގެ ޓަވަރުތަކުގައި ދިރިއުޅޭ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ކުރިއަށްގެންދާ  ސީސީޓީވީ ކެމެރާ ހަރުކުރުމުގެ މަސައްކަތުގެ ބޮޑުބައި މިހާރު ނިމިފައިވާކަމަށް އެ ކުންފުނިން ބުނެފިއެވެ.

އެފްޑީސީން ބުނީ ފަހިދިރިއުޅޫމުގެ ޓަވަރުތަކުގައި ކެމެރާ ހަރުކުރުމުގެ މަސައްކަތް ވަރަށް ބާރަށް ކުރިއަށްދާކަމަށެވެ. ފަހިދިރިއުޅުމަށް ދީފައިވަނީ އަމާން ދޯދި އަދި އަމާން އުދަރެސްގައި ހިމެނޭ ޓަވަރުތަކެވެ. 

މީގެ ތެރެއިން އަމާން ދޯދި ޓަވަރުތަކުގައި ސީސީޓީވީ ކެމެރާ ހަރުކުރުމުގެ 90 އިންސައްތަ މަސައްކަތް ވަނީ ނިމިފައެވެ. އަދި އަމާން އުދަރެސް ޓަވަރުތަކުގައި ކެމެރާ ހަރުކުރުމުގެ 95 އިންސައްތަ މަސައްކަތް ވަނީ ނިމިފައެވެ. ކެމެރާ ހަރުކުރުމުގެ މަސައްކަތް ނިމި ސީސީޓީވީ އޮޕަރޭޝަން މުޅިން ނިމުމުން އެ ސަރަހައްދުގެ ސަލާމަތީ ކަންކަންކަމާއި އެނޫންވެސް ކަންކަމުގައި ބޮޑެތި ފަސޭހަތަކެއް ލިބިގެންދާނޭކަމަށް އެފްޑީސީން ބުނެއެވެ.

ގެދޮރުވެރިޔާ ސްކީމްގެ ދަށުން ހުޅުމާލޭ ފޭސް ދޭއްގައި ފަހި ދިރިއުޅުން ކޯޕަރޭޝަނުން ތަރައްޤީކުރި 4،000 ހައުސިން ޔުނިޓްތައް އެ ތަންތަނުގެ ވެރިފަރާތްތަކާ ހަވާލުކުރުމުގެ މަސައްކަތް ފަށާފައިވަނީ މިދިޔަ އަހަރުގެ ސެޕްޓެމްބަރުމަހުގެ ތެރޭގައެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ތަރައްޤީކުރި އެ ޓަވަރުތަކުގެ ގިނަ އެޕާޓްމަންޓްތަކުގައި މީހުން ދިރިއުޅެން ފަށާފައިވާއިރު، އެ ސަރަހައްދުގައި ދިރިއުޅޭ ފަރާތްތަކަށް އެންމެ ދަތިވާ އެއްކަމަކީ ޕާކްކުރުމުގެ މައްސަލައާއި، އެތަންތަނުގައި ދިރިއުޅޭ ކުޑަކުދިން ކުޅެލާ ހަދާނެ ޕާކެއް ނެތުމުގެ މައްސަލައެވެ.