މާލޭގެ ލޯކަލް މާރުކޭޓް ތަރައްގީ ކުރުމުގެ މަޝްރޫއުގެ ދަށުން، އެ މާރުކޭޓުން ހުސްކުރަންޖެހޭ ގޮޅިތައް ބަދަލުކުރުމަށްޓަކައި ވަގުތީ މާރުކޭޓެއް ތަރައްގީ ކޮށްދޭނެ ފަރާތެއް ހޯދުމަށް މާލެ ސިޓީ ކައުންސިލުން މިއަދު އިއުލާން ކޮށްފި އެވެ.
މިކަމާ ގުޅޭ ބީލަމުގައި ވާގޮތުން، މި މަސައްކަތަކީ ލޯކަލް މާރުކޭޓް އާބާތުރަ ފިލުވައި ތަރައްގީ ކުރުމަށް ކުރިއަށް ގެންދާ މަޝްރޫއުގެ މުހިންމު ބައެކެވެ. މި މަސައްކަތަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު މިހާރު ވަނީ ހުޅުވާލެވިފައެވެ.
މައުލޫމާތު ސާފުކުރުން އޮންނާނީ އަންނަ ބުރާސްފަތި ދުވަހުގެ ހެނދުނު 10:00 ގައި މާލެ ސިޓީ ކައުންސިލްގެ އިދާރާގަ އެވެ. މަސައްކަތަށް ކުރިމަތިލާ ފަރާތްތަކުން މައުލޫމާތު ސާފުކުރުމަށް ކަނޑައެޅިފައިވާ ގަޑިއަށް ހާޒިރުވުމަށް ކައުންސިލުން އެދެ އެވެ.
ބީލަން ހުށަހެޅުމާއި އަގު ހުށަހެޅުން އޮންނާނީ މި މަހުގެ 23 ވާ އާދިއްތަ ދުވަހުގެ ހެނދުނު 11:00 ގައި މާލެ ސިޓީ ކައުންސިލްގައެވެ. މި މަސައްކަތް ހަވާލުކުރާނެ ފަރާތެއް ހޮވުމުގައި ބަލާނީ ކަނޑައެޅިފައިވާ އުސޫލުތަކުގެ މަތިން އެންމެ އެކަށީގެންވާ ހުށަހެޅުމެއް ހުށަހަޅާ ފަރާތަކަށް ކަމަށް ކައުންސިލުން ބުނެ އެވެ.
ވަގުތީ މާރުކޭޓެއް ހަދައިދޭނެ ބަޔަކު ހޯދަން ކައުންސިލުން އިއުލާނު ކޮށްފައިމިވަނީ މާލޭގެ ލޯކަލް މާރުކޭޓް ތަރައްގީ ކުރުމުގެ މަޝްރޫއު ކުރިއަށް ގެންދަން އެ ބިން ސަރުކާރާ ހަވާލުކުރުމަށް ގަރާރެއް ފާސްކުރުމަށް ފަހު އެވެ. މިފަދަ ގަރާރެއް މި ފާސްކުރީ އެ ބިން ހަވާލުކުރަން ސަރުކާރުން ތަކުރާރުކޮށް އެދެމުން ވެސް އެކަމަށް އިޖާބަނުދީ ތިބުމަށް ފަހު އެވެ.
Advertisement
This content is created and paid for by advertisers and does not involve Voice Journalists
