ރަޝިޔާއިން ރޭ ޔޫކްރެއިނަށް ދިން ވައިގެ ހަމަލާތަކުގައި މަދުވެގެން 12 މީހުން މަރުވެ އެތައް ބަޔަކު ޒަޚަމްވެފައިވާ ކަމަށާއި، އެ ހަމަލާތަކުގައި އުތުރު ކޮރެއާގެ މިސައިލް ބޭނުންކޮށްފައިވާ ކަމަށް ޔޫކްރެއިނުން ތުހުމަތުކޮށްފިއެވެ.

ރަޝިޔާގެ ހަމަލާތަކުގައި އެންމެ ބޮޑު ގެއްލުމެއް ލިބުނީ ދެކުނު އިރުމަތީ ސިޓީއެއް ކަމަށްވާ ޒަޕޮރީޜިއާއަށެވެ. އެ ސިޓީއަށް ދިން ހަމަލާތަކުގައި ހަ މީހުން މަރުވެ 19 މީހުން ޒަޚަމްވި ކަމަށް ޔޫކްރެއިނުގެ ރައީސް ވޮލޮޑީމީރް ޒެލެންސްކީ ވިދާޅުވިއެވެ.

މަރުވި ހުރިހާ އެންމެނަކީ ޒަޕޮރީޜްސްޓާލް ދަގަނޑު ކާރުޚާނާގެ މުވައްޒަފުންނެވެ. އެ ކާރުޚާނާއިން ނެރުނު ބަޔާނެއްގައި ބުނެފައިވާ ގޮތުގައި، ވައިގެ ހަމަލާގެ އިންޒާރު އިޢުލާނުކުރި ވަގުތު ހިޔާވައްސަށް ދިޔަ މަގުމަތީގައި މުވައްޒަފުންނަށް ބެލިސްޓިކް މިސައިލް ހަމަލާ އެރީ ކަމަށާއި، އިތުރު 21 މުވައްޒަފަކު ޒަޚަމްވެފައިވެއެވެ. ޒަޕޮރީޜިއާގެ މިލިޓަރީ އެޑްމިނިސްޓްރޭޝަންގެ ވެރިޔާ އިވާން ފެޑޮރޮފް ވަނީ ޢިމާރާތްތަކާއި އުޅަނދުތަކުގައި ރޯވެފައިވާ ފޮޓޯ ސޯޝަލް މީޑިއާގައި ޢާންމުކޮށްފައެވެ.

ޒެލެންސްކީ ވިދާޅުވީ ޒަޕޮރީޜިއާ ސިޓީއަށް ހަމަލާ ދީފައިވަނީ އުތުރު ކޮރެއާގެ ބެލިސްޓިކް މިސައިލާއި ޒިރްކޮން މިސައިލާއި ގައިޑެޑް އޭރިއަލް ބޮމުން ކަމަށާއި، އެއީ ޚާއްޞަކޮށް މަދަނީ ޢުމްރާނީ ވަސީލަތްތަކަށް އެންމެ ބޮޑު ގެއްލުމެއް ދިނުމަށް ރާވައިގެން ދިން ނުރައްކާތެރި ހަމަލާއެއްކަމަށް ޒެލެންސްކީ ވިދާޅުވިއެވެ.

ރަޝިޔާގެ ދިފާޢީ ވުޒާރާއިން ބުނީ ރޭ ދިން ހަމަލާތައް އަމާޒުކުރީ ކީވް އާއި ޒަޕޮރީޜިއާގައި ހުރި ދިފާޢީ ސިނާޢީ ވަސީލަތްތަކާއި ދަތުރުފަތުރާއި ލޮޖިސްޓިކް މަރުކަޒުތަކަށް ކަމަށެވެ.

ފާއިތުވި ހަފުތާތަކުގައި ރަޝިޔާއިން ޔޫކްރެއިނުގެ ސިޓީތަކަށް ބެލިސްޓިކް މިސައިލް ހަމަލާތައް ވަރުގަދަކޮށްފައިވާ އިރު، ޔޫކްރެއިނުން ވެސް ވަނީ ރަޝިޔާގެ ސަރަޙައްދުތަކަށް ހަމަލާތައް އިތުރުކޮށްފައެވެ.