މި ޖީލުގެ ބައެއް ކުދިން ދިވެހި ބަހުން ވާހަކަދެއްކުމަށް ފަސްޖެހޭ ކަމީ ސީރިއަސް މައްސަލައެއް ކަމަށް ވިދާޅުވެ ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ކަންބޮޑުވުން ފާޅުކުރައްވައިފިއެވެ.
39 ވަނަ ޤައުމީ ވާހަކަދެއްކުމުގެ މުބާރާތް ހުޅުވައިދެއްވަމުން ވަޒީރު ދެއްކެވި ވާހަކަފުޅުގައި ވާހަކަދެއްކުންތެރިކަމުގެ ހުނަރަކީ ކުރިއަށް އޮތް ޖީލުތަކުގެ ކިބައިގައި ހަރުލެއްވުން ވަރަށް މުހިންމު ސިފައެއް ކަމަށް ވިދާޅުވެފައިވެއެވެ. ދިރިއުޅުމުގައި ކާމިޔާބީ ހޯދުމަށް އެހެން މީހުންނާ މުޢާމަލާތުކުރުމުގެ ޤާބިލުކަން ލިބިފައި ހުރުމަކީ ކޮންމެހެން ބޭނުންތެރި ކަމެއް ކަމަށް ވެސް ހީނާ ވިދާޅުވެފައިވެއެވެ.
ފޯނު މެދުވެރިކޮށް މުވާސަލާތުކުރުން ޢާންމުވެފައިވާ މި ދުވަސްވަރު ކުދިންނަށް ކުރިމަތިލައިގެން ސީދާ ވާހަކަދެއްކުމުގައި ދަތިތައް ހުންނަ މަންޒަރު ފެނިވަޑައިގަންނަވާ ކަމަށް ވަޒީރު ފާހަގަކުރެއްވިއެވެ. އަދި ވާހަކަދެއްކުމުގެ މުބާރާތްތަކުގެ ޒަރީއާއިން ދަރިވަރުންގެ ހިތްވަރު އާވެ ގިނަ ބައެއްގެ ކުރިމަތީ ބަސް ބުނުމުގެ ޤާބިލުކަން ބިނާވެ ދިވެހި ބަހުން މުޢާމަލާތުކުރުމަށް ކުރިމަތިވާ ހުރަސްތައް ނައްތައިލެވޭ ކަމަށް ވެސް ވިދާޅުވެފައިވެއެވެ.
މީގެ އިތުރުން ވަޒީފާގެ މާހައުލުގައި އެންމެ ބޭނުންތެރި ހުނަރަކީ މުޢާމަލާތުކުރުމުގެ ހުނަރު ކަމަށާއި އެ ހުނަރު ލިބިފައި ހުންނަ ކުއްޖަކަށް ކޮންމެ ދާއިރާއަކުންވެސް ކުރިއަށް ދެވޭނެ ކަމަށް ހީނާ ވިދާޅުވެފައިވެއެވެ. ވާހަކަފުޅު ނިންމަވައިލައްވަމުން ދަރިވަރުންގެ އަޑަކީ މުސްތަޤުބަލުގެ އަޑު ކަމަށާއި ދުލުން ބޭރުކުރާ ބަސްތަކަކީ އަޚުލާޤީ މިންގަނޑާ އެއްގޮތް ޢިލްމީ ބަސްތަކަކަށް ހެއްދެވުމަށް އަޒުމް ކަނޑައެޅުމަށް ދަރިވަރުންނަށް ނަސޭހަތްތެރިވެވަޑައިގެންނެވިއެވެ.
ޤައުމީ ވާހަކަދެއްކުމުގެ މުބާރާތަކީ ދިވެހި ބަހުން ވާހަކަދެއްކުންތެރިކަމުގެ ހުނަރު ދަރިވަރުންގެ ކިބައިގައި އާލާކުރުމުގެ މަޤުޞަދުގައި ކޮންމެ އަހަރަކު ބާއްވަމުން އަންނަ މުބާރާތެކެވެ.
Advertisement
This content is created and paid for by advertisers and does not involve Voice Journalists
