ކުރީގެ ރައީސް އިބްރާހީމް މުޙައްމަދު ޞާލިޙް 2028 ގެ ރިޔާސީ އިންތިޚާބަށް އެމްޑީޕީގެ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ވާދަކުރައްވަން ނިންމަވައިފިއެވެ.
ޕްރައިމަރީއަށް ނުކުންނަވާނެކަން ރަސްމީކޮށް އެ މަނިކުފާނު އަދި އިއުލާނު ނުކުރެއްވި ނަމަވެސް ވާދަކުރައްވަން ނިންމަވާފައިވާ ކަމަށް މައުލޫމާތު ލިބެއެވެ.
މީގެ ކުރިން ދެއްވި ތަފާތު އިންޓަވިއުތަކުގައި ޞާލިޙް ވިދާޅުވެފައި ވަނީ ސިޔާސީ މުސްތަގުބަލާ މެދުގަޔާ، ރިޔާސީ ޕްރައިމަރީގައި ވާދަކުރުމާމެދު ނިންމަވާފައިވާ ނިންމެވުން ގާތްބޭފުޅުންނާ ހިއްސާކުރައްވާފައިވާ ކަމަށެވެ. އަދި ރިޔާސީ އިންތިޚާބުގައި ވާދަނުކުރައްވާނެ ކަމަށް ސީދާ ވިދާޅެއް ނުވެއެވެ.
ޞާލިޙް އެމްޑީޕީގެ ޕްރައިމަރީގައި ވާދަކުރައްވާއިރު، ކުރީގެ ރައީސް މުޙައްމަދު ނަޝީދު ވަނީ ޕްރައިމަރީގައި ވާދަނުކުރައްވާނެ ކަމަށް ވިދާޅުވެފައެވެ. އެމަނިކުފާނުގެ ތާއީދު އޮތީ ރިޔާސީ ޕްރައިމަރީގައި ވާދަކުރައްވާނެކަން އިއުލާން ކުރައްވާފައިވާ ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލަށެވެ.
މީގެ އިތުރުން އެމްޑީޕީގެ ރައީސް ޢަބްދުالله ޝާހިދު ވެސް އެ ރޭހަށް ޝައުގުވެރިކަން ފާޅުކުރައްވާފައިވާ ކަމަށް މައުލޫމާތު ލިބެއެވެ.
ރައީސް ޞާލިޙް ރިޔާސީ ޕްރައިމަރީގައި ވާދަކުރައްވަން ނިންމެވިއިރު، ފެބްރުއަރީ 2023 ގެ ރިޔާސީ އިންތިޚާބުގައި ދެވަނަ ދައުރެއް ކާމިޔާބު ނުކުރެއްވި ވެރިކަމާ ހަވާލުވެވަޑައިގެންނެވީ މިހާރުގެ ރައީސް މުޙައްމަދު މުޢިއްޒެވެ.
އެމްޑީޕީން ޕްރައިމަރީ ބާއްވާނެ ވަކި ތާރީޚެއް އަދި އިއުލާނުނުކުރެއެވެ.
Advertisement
This content is created and paid for by advertisers and does not involve Voice Journalists
