ތިލަމާލެ ބްރިޖު މަޝްރޫއުއަކީ މި ސަރުކާރުގައި ސުމަކުން ފެށި މަޝްރޫއުއެކޭ ބުނެވިދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.

ސިލްސިލާ ޕޮޑްކާސްޓް "ދަ ޕަލްސް"ގެ 6 ވަނަ އެޕިސޯޑްގައި ވާހަކަފުޅުދައްކަވަމުން ރައީސް ވިދާޅުވީ ތިލަމާލެ ބްރިޖް މަޝްރޫއުއަކީ ކުރީ ސަރުކާރުގައި ހަމަޖެހި ފެށުނު މަޝްރޫއުއެއް ނަމަވެސް ދެ އަހަރު ފާއިތުވެދިޔައިރު އެކަށީގެންވާވަރުގެ އެއްވެސް މަސައްކަތެއް ކުރެވިފައި ނެތް ކަމަށެވެ.

އަދި މާޒީ ބަލާލުމުން ފެންނަން އޮތް ކަމެއް ކަމަށް ވެސް ވިދާޅުވި އެވެ.

"އަޅުގަނޑުމެންނަށް މި މަޝްރޫއުގެ މަސައްކަތް ކުރަން ހަވާލުވެގެންދިޔައިރު, މާލެއާ ވިލިގިއްޔާ ދޭތެރޭ މިސާލަކަށް ހަމަ ގާތްގަނޑަކަށް އެއްވެސް ކަމެއް ނެތޭ ދެންނެވިދާނެ. ވަރަށް މަދު މަސައްކަތްތަކެއް ހުރީ [ކުރެވިފައި] ތަނބުތަކެއް ޖެހި އެކަހަލަ ކަންތައްތަކެއްވެސް ކުރެވިފައެއް ނެތް," ރައީސް ވިދާޅުވި އެވެ.

ތިލަމާލެ ބްރިޖުގެ މަސައްކަތް ކުރިއަށް ދަނީ

ރައީސް ވިދާޅުވީ މަޝްރޫއު ފެށުމަށް ފަހު ކުރީ ސަރުކާރަށް ދެ އަހަރުގެ މުއްދަތެއް ލިބުނު ނަމަވެސް މަސައްކަތް ދިޔައީ ވަރަށް ލަސް ދުވެއްޔެއްގައި ކަމަށެވެ. 

"ގާތްގަނޑަކަށް ސުމަކުން ފެށި މަޝްރޫއުއެކޭ ވެސް ދެންނެވިދާނެ, އަމަލީ މަސައްކަތް,"

ރައީސް ވިދާޅުވީ ސަރުކާރުގެ އަމާޒަކީ ވީއެންމެ އަވަހަކަށް އެ މަޝްރޫއު ނިންމުން ކަމަށެވެ. އެކަމަށް އިންޑިއާގެ ފުރިހަމަ އެހީތެރިކަން ލިބެމުންދާ ކަމަށާ ދެ ގައުމުގެ މެދުގައި އޮތް ގުޅުމާއެކު ތިލަމާލެ ބްރިޖް މަޝްރޫއު ހަލުވި ސްޕީޑްގައި ކުރިއަށްދާ ކަމަށް ވިދާޅުވި އެވެ.

މި މަޝްރޫއުގައި މާލެއިން ގުޅީފަޅަށް އަޅާ ބްރިޖުގެ މަސައްކަތް ނިމޭ ތާރީހަކަށް މީގެ ކުރިން ދީފައި އޮތީ 31 މާޗް 2026 އެވެ. އަދި ގުޅީފަޅުން ތިލަފުއްޓަށް އެ މަސައްކަތް ނިމޭނެ ތާރީހަކަށް ދީފައި އޮތީ 30 ސެޕްޓެމްބަރ 2026 އެވެ.