މީސްމީޑިއާ ޕްލެޓްފޯމް "ތްރެޑްސް" ގައި އެންމެ ގިނަ ބައެއްގެ ތާއީދު ލިބޭ ކޮމެންޓެއް އެ ޓީމުގެ ބަޔޯ އަށް ބަދަލުކުރާނެ ކަމަށް ބުނެ ވީ ވައުދާ ޚިލާފުވެ، ޕަލަސްތީނަށް ތާއީދުކޮށް ލިޔުނު ކޮމެންޓަކާ ގުޅިގެން މުޅި ޕޯސްޓް ޑިލީޓްކޮށްލުމުން ޗެލްސީގެ އަންހެން ފުޓްބޯޅަ ޓީމަށް ބޮޑެތި ފާޑުކިޔުންތަކެއް އަމާޒުވެއްޖެއެވެ.

މި ހަފުތާގެ ކުރީކޮޅު ޗެލްސީ ވިމެންސް ޓީމުގެ ރަސްމީ ތްރެޑްސް އެކައުންޓުން ކުރި ޕޯސްޓެއްގައި ބުނެފައިވަނީ، އެ ޕޯސްޓަށް ލިބޭ އެންމެ މަގުބޫލު ކޮމެންޓުގައި ވާ އެއްޗެއް އެ ޓީމުގެ ޕްރޮފައިލް ބަޔޯއަށް ލާނެ ކަމަށެވެ. މި ޕޯސްޓަށް އެންމެ ގިނަ ލައިކް ލިބި، އެއްވަނައަށް އެރީ މީސްމީޑިއާ ބޭނުންކުރާ ފަރާތެއް ކަމަށްވާ "relthesinger@" ކޮށްފައިވާ "ފްރީ ޕަލަސްތީން" (ޕަލަސްތީން މިނިވަންކުރޭ) މި ކޮމެންޓެވެ.

ނަމަވެސް، ވީ ވައުދާ އެއްގޮތަށް ބަޔޯ ބަދަލުކުރުމުގެ ބަދަލުގައި، ޗެލްސީން ވަނީ އެ މުޅި ޕޯސްޓް އެއްކޮށް ޑިލީޓްކޮށްލާފައެވެ.

މިކަމާ ގުޅިގެން އެ ކޮމެންޓް ކުރި ފަރާތުން ބުނެފައިވަނީ، ޗެލްސީން ޕޯސްޓް ޑިލީޓްކޮށްލިއިރު އެ ކޮމެންޓަށް 136،000 އަށް ވުރެ ގިނަ ލައިކްސް ލިބިފައިވާ ކަމަށެވެ. އަދި އޭގެ އިތުރުން 324 އަށް ވުރެ ގިނަ ރިޕްލައި، 1،900 އަށް ވުރެ ގިނަ ރީޕޯސްޓް އަދި 316 ޝެއަރ ލިބިފައިވާ ކަމަށްވެސް އޭނާ ހާމަކޮށްފައިވެއެވެ. ވައުދު ފުއްދުމުގެ ބަދަލުގައި ޕޯސްޓް ފޮހެލުމުން އޭނާ ވަނީ ޗެލްސީގެ މި އަމަލު ވަރަށް ބޮޑަށް ކުށްވެރިކޮށްފައެވެ.

މި މައްސަލައިގައި ގިނަ އަދަދެއްގެ އާންމުން ދަނީ ޗެލްސީއަށް ވަރަށް ބޮޑަށް ފާޑުކިޔަމުންނެވެ. އެގޮތުން ބައެއް މީހުން ވަނީ، އަމިއްލަ ބަހުގެ އިތުބާރު ނުހިފެހެއްޓުނު ކަމަށް ބުނެ، މިއީ ވަރަށް ލަދުވެތި އަމަލެއް ކަމަށް ފާހަގަކޮށްފައެވެ. އަދި ސުލްހައަށާއި މިނިވަންކަމަށް ގޮވާލާ ގޮވާލުންތައް ސެންސަރުކުރުމަށްފަހު، އަޚުލާގީ މިންގަނޑުތަކާ ބެހޭގޮތުން ދުނިޔެއަށް ނަސޭހަތް ނުދިނުމަށާއި، ޗެލްސީ އަންހެން ޓީމު ބޮއިކޮޓް ކުރުމަށްވެސް ބައެއް ސަޕޯޓަރުން ވަނީ ގޮވާލާފައެވެ.

މި ފާޑުކިޔުންތަކާއި ތުހުމަތުތަކާ ގުޅިގެން ޗެލްސީ ފުޓްބޯޅަ ކްލަބުން މިހާތަނަށް އެއްވެސް ރަސްމީ ބަޔާނެއް ނެރެފައެއް ނުވެއެވެ.