ހުޅުމާލޭ ފޭސް އެކެއްގައި ތަރައްޤީކުރަމުންދާ ކޭޕާކް ފްލެޓްތަކުގެ މައްސަލާގައި ހަމްބޯ ކުންފުނީގެ މައްޗަށް ސިވިލްކޯޓުން ހަމްބޯގެ މައްޗަށް އިތުރު ހުކުމެއް ކޮށްފިއެވެ.

މިފަހަރު ހަމްބޯގެ މައްޗަށް ކޮށްފައިވަނީ އެކުންފުނިން އަމިއްލަ ފަރާތަކަށް ފްލެޓް ވިއްކުމުގައި ހެދި އެއްބަސްވުމާ ހިލާފްވުމާ ވުމުންނެވެ. މި މައްސަލައަށް ބަލާއިރު ހަމްބޯއިން ވަނީ ފްލެޓް ވިއްކުމުގެ މުއާމަލާތުގައި 50،000 ރުފިޔާ އާއި އިދާރީ ފީގެ ގޮތުގައި 10،000 ރުފިޔާ ނަގާފައެވެ. ނަމަވެސް އެއްބަސްވުމުގައި އޮތް ތާރީހު ފަހަނަ އަޅައިދިޔައިރުވެސް އެއްބަސްވުމާއެއްގޮތަށް އަމަލުކޮށްފައި ނުވާކަން ބަޔާނުން ވަނީ ފާަހަގަވެފައެވެ. 

މި މައްސަލާގައި ސިވިލްކޯޓުން ހަމްބޯ ކުންފުނީގެ މައްޗަށް ވަނީ އެފަރާތަށް ވިއްކުމަށް ނިންމި ފްލެޓް ތިރީސް ދުވަހުގެ ތެރޭހައި ހަވާލުކުރުމަށް އަމުރުކޮށްފައެވެ. ނަމަވެސް ދައުވާކުރި ފަރާތުން ނަގައިދިނުމަށް އެދުނު މާލީ ބަދަލު ނަގައިދެވެން ނެތްކަމަށް ހުކުމްގައި ވަނީ ބަޔާންކޮށްފައެވެ.

ކޭޕާކް މައްސަލާގައި މީގެ ކުރިންވެސް ވަނީ އެޕާޓްމަންޓް ގަތުމަށް ފައިސާ ދެއްކި މީހަކަށް ދެ މިލިއަނަށްވުރެ ގިނަ ރުފިޔާ ދެއްކުމަށް ހުކުމްކޮށްފައެވެ.

ހަންބޯގެ މައްޗަށް މިފަދަ ބައިވަރު މައްސަލަތައް މިދިޔަ އަހަރުވެސް ނިމިފައި އެބަހުއްޓެވެ. ކޭޕާކު ފުލެޓުތައް އޮޅުވާލައިގެން ގިނަ އަދަދެއްގެ މީހުންނަށް ވިއްކި މައްސަލާގައި ތުހުމަތު ކުރެވޭ ހަސަން މަމްދޫހު (މަންޑޭ)ގެ މައްޗަށް 94 ދައުވާ ސާބިތުވުމާ ގުޅިގެން ކްރިމިނަލް ކޯޓުން ވަނީ އޭނާ 397 އަހަރަށް ޖަލަށް ލުމަށް ހުކުމްވެސް ކޮށްފައެވެ.