އުސް އިމާރާތެއްގެ މަތީން ވެއްޓި މަރުވި ވިފާގް އިބްރާހިމް އަދުދާނުގެ މަރުގައި ޝައްކުތަކެއް އުފެދޭ ގިނަ ކަންކަން އެބަހުރި ކަމަށާ އެކަންކަމަށް އިންސާފު ބޭނުންވާ ކަމަށް އޭނާގެ ބައްޕަ އިބްރާހިމް އަދުނާން އަނީސް ބުނެފި އެވެ.

އުމުރުން 25 އަހަރުގެ ވިފާގް މަރުވީ މީގެ ދެ އަހަރު ކުރީން 2024 ވަނަ އަހަރުގެ އޮގަސްޓް މަހުގެ 14 ވަނަ ދުވަހު އެވެ.

ދަރިފުޅުގެ މަރަށް ދެ އަހަރު ފުރުމާއި ގުޅިގެން އަނީސް އޭނާގެ ފޭސްބުކުގައި ކުރި ޕޯސްޓެއްގައި ބުނެފައިވަނީ ވިފާގް މަރުވި ހާދިސާގައި ކަން ހިގައިގެން ދިޔަ ގޮތުން ޝައްކު އުފެދޭ ގިނަ ކަންކަން ހުރި އިރު އިންޞާފު ލިބުން ލަސްވެއްޖެ ކަމަށެވެ.

އަދި ބުނީ ތުހުމަތު ކުރެވޭ މީހުން ތިބީ ސިޔާސީ ގޮތުން މަގާމުގެ ނާޖާއިޒު ބާރު ކޮށްގެން ސިޔާސީ ނާޗަރަންގީގަ ގާނޫންތަކަށް ގޮންޖަހާފަ އުފަލުގައި ކަމަށެވެ. އިންސާފު ހޯދުމަކީ ގާނޫންތަކުގެ ބާރު ކަނޑުވައިގެން ކަނޑުގެ އުސޫލުން ހިނގާ ކަމަކަށް ވެއްޖެނަމަ، އެއީ ނުރައްކަލެއްގެ ފެށުން ކަމުގައިވެސް އޭނާ ބުނެފައިވެ އެވެ.

"ބޮޑުމަގާމުގައި ހުރުމަކީ ތިމާ ހިންގާފައި ހުރި ބޮޑެތި ޖަރީމާތަކުން ރެކިގަތުމަށް ލިބޭ ލައިސަންސެއް ނޫންކަން ހަނދާން ކުރަން ޖެހޭ. ނުރައްކަލުގެ ރަނގަބީލުން ބާރު އަޑު ގުގުމާލުމަކީ ބަދަލް ހިފުމަށް އަޅާ ރަނގަބީލަކަށް ވެއްޖެނަމަ ހިގާފާނެ ޙާދިސާ ތަކަކީ ދެކެން ބޭނުންވާ ދުވަހެއް ނޫން," އަނީސްކުރި ޕޯސްޓްގައިވެ އެވެ.

އޭނާ ވަނީ ކަމާއި ގުޅުންހުރި އެންމެހައި އިދާރާ ތަކުގެ އެހީތެރިކަން ބޭނުންވާ ކަމަށާ ގާނޫނީ އިމުގެ ތެރެއިން އިންސާފު ބޭނުންވާ ކަމަށް ބުނެފަ އެވެ. އަދި ބުނީ އާއިލާ އޮތީ އިންސަފުގެ އިންތިޒާރުގައި ކަމަށާ އެ މަރަށް އިންސަާފު ބޭނުންވާ ކަމަށެވެ.

އަނީސް އަކީ ފުލުހުންގެ ވަޒީފާގައި އިސް މަގާމުތަކެއް ފުރާފައިވާ މީހެކެވެ.