ޑިއުޓީގައި ހުއްޓާ މަސްތުވާތަކެއްޗަށް ޕޮޒިޓިވްވެގެން ވަޒީފާއިން ވަކިކުރި ފުލުހަކަށް ބަދަލުގެ ގޮތުގައި ދޭ މިންވަރު ހަ މަހުން އެއް މަހަށް ކުޑަކުރަން ހައިކޯޓުން ނިންމި ނިންމުން އެ ފުލުސް މީހާގެ ފަރާތުން ސުޕްރީމް ކޯޓުގައި އިސްތިއުނާފުކޮށްފިއެވެ.

މެރިން ޕޮލިސް ޑިޕާޓްމަންޓްގެ ކުރީގެ ޗީފް ސްޓޭޝަން އިންސްޕެކްޓަރެއްގެ ގޮތުގައި ވަޒީފާ އަދާކުރި މި މީހާ ވަޒީފާއިން ވަކިކޮށްފައިވަނީ 2017 ވަނަ އަހަރުގެ ފެބްރުއަރީ މަހު ޑިއުޓީގައި ހުއްޓައި މަސްތުވާތަކެއްޗަށް ޕޮޒިޓިވްވި ކަމަށް ބުނެ 2018 ވަނަ އަހަރުގެ ފެބްރުއަރީ މަހުއެވެ. ވަޒީފާ އިޢާދަކޮށްދީ މުސާރައާއި ޢިނާޔަތްތައް ހޯދުމަށް އެދި އޭނާ ސިވިލް ކޯޓަށް މައްސަލަ ހުށަހެޅިއެވެ.

ސިވިލް ކޯޓުން ކަނޑައެޅީ ވަކިކުރީ އެކަށީގެންވާ ސަބަބެއް އޮވެގެން ކަމުން ވަޒީފާ އަނބުރާ ދޭން ނުޖެހޭ ކަމަށެވެ. އެހެންނަމަވެސް ވަޒީފާއިން ވަކިކުރިކަން އަންގާ ލިޔުން ޙަވާލުކުރިކަން ސާބިތު ނުވާތީ ބަދަލެއްގެ ގޮތުގައި ހަ މަސް ދުވަހުގެ މުސާރައާއި ޢިނާޔަތަށް ޖެހޭ 126,934.80 ރުފިޔާ ދައުލަތުން ދިނުމަށް އެ ކޯޓުން އެންގިއެވެ.

ދައުލަތުގެ ފަރާތުން ހައިކޯޓުގައި މައްސަލަ އިސްތިއުނާފު ކުރުމުން ފަނޑިޔާރުންގެ އިއްތިފާޤުން ނިންމީ މައުޟޫޢީ ޢަދުލުވެރިކަން ޤާއިމުވެފައި އޮތް ޙާލަތެއްގައި ހަމައެކަނި އިޖުރާއީ ޚިލާފެއް ހުރި ނަމަ ދޭންޖެހޭނީ ސުޕްރީމް ކޯޓުގެ އުސޫލުތަކާ އެއްގޮތަށް ރަމްޒީ ބަދަލެއް ކަމަށެވެ.

އެހެންކަމުން ހަ މަހުގެ މުސާރައިގެ ބައި ބާޠިލުކޮށް ވަކިކުރި އިރު ލިބެމުންދިޔަ މުސާރައިގެ ނިސްބަތުން އެއް މަސް ދުވަހުގެ އަދަދެއް ދިނުމަށް ހައިކޯޓުން ޙުކުމް ކުރިއެވެ.

ހައިކޯޓުގެ ނިންމުމަށް ދެ އަހަރު ފާއިތުވި ފަހުން މި މައްސަލަ މިހާރު  ސުޕްރީމް ކޯޓަށް ހުށަހެޅާފައިވާއިރު، ޢާންމު އުސޫލުން ސުޕްރީމް ކޯޓަށް މައްސަލަ ހުށަހެޅުމުގެ މުއްދަތަކީ 30 ދުވަސްކަން ފާހަގަކޮށްލަންޖެހެއެވެ.