ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިންތިޒާމުކޮށްގެން ބާއްވާ ބައިނަލްއަޤުވާމީ ދިރާސާ މަހާސިންތާ ކަމަށްވާ ނުވަ ވަނަ ތެވެލި ކޮންފަރެންސް އިއްޔެ ރަސްމީކޮށް ފައްޓަވައިދެއްވައި އެ ޔުނިވަރސިޓީގެ ތާރީޚުގައި ފުރަތަމަ ފަހަރަށް ޕްރޮފެސަރު އަދި އެސޯސިއޭޓް ޕްރޮފެސަރު ކަމުގެ މަޤާމަށް ކުރިމަތިލުމުގެ ފުރުޞަތު ހުޅުވާލައިފިއެވެ.

މި އަހަރުގެ ކޮންފަރެންސް ޚާއްޞަކޮށްފައި ވަނީ "21 ވަނަ ޤަރުނުގެ ބަދަލުވަމުންދާ އީޖާދުތައް: ސައިންސް ޓެކްނޮލޮޖީ އަދި މުޖުތަމަޢު" މި ޝިޢާރުގެ މައްޗަށެވެ. ކޮންފަރެންސް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދެވެ. މި ރަސްމިއްޔާތުގައި ދައުލަތުގެ ވަޒީރުންނާއި އެމްއެންޔޫގެ ޗާންސެލަރ ޑޮކްޓަރ މުޙައްމަދު ޝައުގީއާއި ވައިސް ޗާންސެލަރާއި ޑެޕިއުޓީ ވައިސް ޗާންސެލަރުންނާއި ކައުންސިލް މެންބަރުންގެ އިތުރުން ރާއްޖެއާއި ރާއްޖެއިން ބޭރުގެ ޢިއްޒަތްތެރި މަންދޫބުންނާއި ކީނޯޓް ސްޕީކަރުން އަދި ދިރާސާވެރިން ބައިވެރިވެވަޑައިގެންނެވިއެވެ.

ރަސްމިއްޔާތުގައި ވާހަކަފުޅު ދައްކަވަމުން ޤައުމީ ޔުނިވަރސިޓީގެ ވައިސް ޗާންސެލަރ ވަނީ ޝަރަފުވެރި މެހެމާން މެޑަމް ސާޖިދާ މުޙައްމަދު ރަސްމިއްޔާތުގައި ބައިވެރިވެވަޑައިގަތުމަކީ ޔުނިވަރސިޓީގެ ޢާއިލާއަށް ލިބުނު ވަރަށް ބޮޑު ހިތްވަރެއް ކަމުގައި ފާހަގަކުރައްވައިފައެވެ. ވައިސް ޗާންސެލަރ ވިދާޅުވީ "ތެވެލި" ނަމުން ރަމްޒުކޮށްދޭ ފަދައިން އިރުގެ ދޯދިތައް ކަނޑުގެ ސަތަޙައަށް އެޅި ފެތުރިގެންދާ ބީދައިން ކޮންފަރެންސްގައި ހިއްސާކުރެވޭ ޢިލްމަކީ ރާއްޖެއާއި މުޅި ދުނިޔެއަށް ފައިދާކުރާނެ އަލިގަދަ ޢިލްމަކަށް ވާނެ ކަމަށް އުންމީދުކުރައްވާ ކަމަށެވެ.

އަދި އާޓިފިޝަލް އިންޓެލިޖެންސްގެ ސަބަބުން ދުނިޔެއަށް އަންނަ ބަދަލުތަކާއި ރާއްޖޭގެ ނާޒުކު ތިމާވެއްޓާއި ޖިއޮގްރަފީގެ ގޮންޖެހުންތަކަށް ޙައްލު ހޯދުމުގައި އަމިއްލަ ދިރާސާތަކުގެ މުހިންމުކަން ފާހަގަކުރައްވައި ދިރާސާކުރުމުގެ ދާއިރާއަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި ދިވެހި ސަރުކާރުން ދެއްވާ ޚާއްޞަ އަހައްމިއްޔަތަށްޓަކައި ޝުކުރު އަދާކުރެއްވިއެވެ.

ހަމައެއާ އެކު ޔުނިވަރސިޓީގެ ތާރީޚުގައި ފުރަތަމަ ފަހަރަށް ޕްރޮފެސަރު އަދި އެސޯސިއޭޓް ޕްރޮފެސަރު ކަމުގެ މަޤާމަށް ކުރިމަތިލުމުގެ ފުރުޞަތު މިއަދު ހުޅުވާލެވިފައިވާކަން އިޢުލާންކުރައްވައި 2027 ވަނަ އަހަރުގެ ނިޔަލަށް ކޮންމެ ފެކަލްޓީއެއްގައި މަދުވެގެން އެއް ޕީއެޗްޑީ ޕްރޮގްރާމް ހިންގުން އަމާޒެއް ކަމުގައި ވައިސް ޗާންސެލަރ ވިދާޅުވިއެވެ.

ޝަރަފުވެރި މެހެމާން މެޑަމް ސާޖިދާ މުޙައްމަދު ވިދާޅުވީ ޓެކްނޮލޮޖީގެ ކުރިއެރުމާ އެކު އީޖާދުތަކުގެ އަސްލު މަޤްޞަދަކަށް ވާންވާނީ މުޖުތަމަޢަށް ހެޔޮ ބަދަލުތައް ގެނެސްދިނުން ކަމަށެވެ. ޒުވާނުންނަކީ ހަމައެކަނި ޓެކްނޮލޮޖީ ބޭނުންކުރާ ބައެއްގެ ބަދަލުގައި އެ ތަކެތި އަމިއްލައަށް އުފައްދާ ބަޔަކަށް ވުމަށާއި މި ދާއިރާގައި އަންހެނުންގެ ޙިއްޞާ އިތުރުކުރުމަށް އެކަމަނާ ގޮވާލެއްވިއެވެ. ހަމައެހެންމެ ދިރާސާތައް ހަމައެކަނި ކަރުދާހެއްގެ ގޮތުގައި ނުބާއްވައި ޢަމަލީ މައިދާނުގައި މީހުންގެ ދިރިއުޅުމަށް ފައިދާކުރާ އެއްޗަކަށް ހެދުމުގެ މުހިންމުކަން އެކަމަނާ ފާހަގަކުރެއްވިއެވެ.

ރަސްމިއްޔާތުގައި ޑެޕިއުޓީ ވައިސް ޗާންސެލަރ (ރިސާރޗް އެންޑް އެންޓަރޕްރައިސް) ޑޮކްޓަރ ރަޙީމާ ޢަބްދުއްރަޙީމް ދެއްކެވި ވާހަކަފުޅުގައި މިއަދު އިންސާނިއްޔަތަށް ކުރިމަތިވެފައިވާ ގޮންޖެހުންތައް ޙައްލުކުރުމަށްޓަކައި އެކި ދާއިރާތަކުގެ ތަޖުރިބާކާރުން ގުޅިގެން މަސައްކަތްކުރުމުގެ މުހިންމުކަން ފާހަގަކުރައްވައި ކޮންފަރެންސް އިންތިޒާމުކުރުމުގައި ޙިއްޞާވި އެންމެހައި ފަރާތްތަކަށް ޝުކުރު އަދާކުރެއްވިއެވެ.

ކޮންފަރެންސްގެ މަޢުލޫމާތު ދެއްވަމުން ޑީން އޮފް ރިސާރޗް ޑޮކްޓަރ މަރިޔަމް ޝަހުނީޒާ ނަސީރު ވިދާޅުވީ މި އަހަރުގެ މަހާސިންތާއަށް 364 ދިރާސާ ކަރުދާސް ހުށަހެޅުނު ކަމަށާއި އޭގެ ތެރެއިން 208 ކަރުދާސް ބަލައިގެންފައިވާ ކަމަށެވެ. ދުނިޔޭގެ ފަސް ބައްރުގެ 23 ޤައުމަކުން 70 ކަރުދާސް ހުށަހެޅި އިރު ޖުމްލަ 435 ފަރާތަކުން ކޮންފަރެންސްގައި ބައިވެރިވެފައިވެއެވެ. މަލްޓި ޑިސިޕްލިނަރީ 11 ސަބް ތީމެއް ހިމެނޭ މި ކޮންފަރެންސްގައި އަންޑަރގްރެޖުއޭޓް ދަރިވަރުންގެ ދިރާސާ ސިމްޕޯޒިއަމަށް ފުރިހަމަ އެއް ދުވަސް ޚާއްޞަކޮށްފައިވެއެވެ.

މި މަހާސިންތާގެ ކީނޯޓް ސްޕީކަރުންގެ ގޮތުގައި ޑޮކްޓަރ ޝޯން މެކްމިން އާއި ޕްރޮފެސަރ ޑޮކްޓަރ މުޙައްމަދު މިޒާން އަސްލަމް އާއި ޕްރޮފެސަރ އެލިސްޓާ ޖޯންސް އާއި އެސޯސިއޭޓް ޕްރޮފެސަރ ޑޮކްޓަރ ސަކްތީ އަޤްލީމާ އަޙްމަދު އަދި ޑޮކްޓަރ ޙަސަން ޝަފީޢު ހިމެނިވަޑައިގެންނެވިއެވެ. ކޮންފަރެންސްގައި ދިރާސާވެރިންނާއި ދަރިވަރުންގެ މަސައްކަތް އަގުވަޒަންކޮށް އެވޯޑު ދީފައިވެއެވެ.