ބަންގްލަދޭޝްގެ ވެރިކަންކުރާ ނެޝަނަލިސްޓް ޕާޓީ (ބީއެންޕީ) ގެ ލީޑަރު މިރުޒާ ފަޚްރުލް އިސްލާމް އަލަމްގީރު އެގައުމުގެ ރައީސް ކަމަށް އިންތިޚާބު ކޮށްފިއެވެ. 

ބަންގްލަދޭޝްގެ ގާނުނު ހަދާ މަޖިލީހުން އަލަމްގީރު އެ މަގާމަށް އިންތިޚާބު ކުރީ، ކުރީގެ ރައީސް ޞިއްޙީ ސަބަބުތަކާ ހުރެ މުއްދަތު ހަމަނުވަނީސް އިސްތިޢުފާ ދެއްވުމާ ގުޅިގެންނެވެ. 

ޢުމުރުން 78 އަހަރުގެ އަލަމްގީރު ރައީސްކަމަށް ހޮވުނީ ޕާލަމެންޓުގެ 255 ވޯޓު ކާމިޔާބުކޮށްގެންނެވެ. ޖަމާޢަތެ އިސްލާމީ އިސްވެ އޮތް 11 ޕާޓީގެ އިދިކޮޅު އިއްތިހާދުގެ ކެންޑިޑޭޓު ލިބެރަލް ޑިމޮކްރެޓިކް ޕާޓީގެ ޗެއާމަން އަދި ރިޓަޔާޑް އާމީ ކާނަލް ޢުމުރުން 84 އަހަރުގެ ޢޮލީ އަޙްމަދަށް ލިބުނީ 88 ވޯޓެވެ.

ބީއެންޕީ ވެރިކަމަށް އައީ 2024 ވަނަ އަހަރު ޒުވާނުންގެ މުޒާހަރާތަކާ ގުޅިގެން ޝައިޚް ހަސީނާގެ އަވާމީ ލީގު ސަރުކާރު ވެއްޓުމަށް ފަހު ބޭއްވި ޢާންމު އިންތިޚާބުގައި ޕާލަމެންޓުގެ ތިންބައިކުޅަ ދެބައިގެ އަޣުލަބިއްޔަތު ހޯދައިގެންނެވެ. ފެބްރުއަރީ 12 ގައި ބޭއްވި އެ އިންތިޚާބަށް ފަހު ޠާރިޤް ރަޙުމާން ބޮޑުވަޒީރުކަމަށް އިންތިޚާބުކޮށްފައިވެއެވެ.

ކުރީގެ ރައީސް މުޙައްމަދު ޝަހާބުއްދީނު ޢުމުރުން 76 އަހަރުގައި ދައުރު ހަމަވުމުގެ ދެ އަހަރު ކުރިން ޖުލައި 24 ގައި އިސްތިޢުފާ ދިނީ ބޮޑު ބައްޔެއް ތަޙައްމަލު ކުރަމުންދާ ކަމަށް ބުނެއެވެ. ޤާނޫނުއަސާސީ ލާޒިމުކުރާ ގޮތުން 90 ދުވަހުގެ ތެރޭގައި އައު ރައީސަކު އިންތިޚާބުކުރަން ޖެހެއެވެ.

އަލަމްގީރު ބީއެންޕީ އާ ގުޅުނީ 1990 ގެ ކުރީކޮޅުއެވެ. ހަސީނާގެ ވެރިކަމުގެ ދުވަސްވަރު ޤައުމީ ފެންވަރުގައި އެންމެ ފާހަގަކޮށްލެވޭ ލީޑަރުންގެ ތެރޭގައި ހިމެނުނު އަލަމްގީރު ތަކުރާރުކޮށް ހައްޔަރުކުރެވުނެވެ. އެ ހައްޔަރުތަކަކީ ސިޔާސީ ބޭނުމުގައި ކުރި ކަންކަން ކަމަށް އޭނާ ބުނެފައިވެއެވެ. އެންމެ ފަހުން އޭނާ ހުރީ ލޯކަލް ގަވަމެންޓް ވަޒީރުގެ މަގާމުގައެވެ. އޭގެ ކުރިން ދަނޑުވެރިކަމާއި އޭވިއޭޝަނާއި ޓޫރިޒަމް ހިމެނޭ ގޮތަށް ގިނަ ވުޒާރާތަކެއް ބެލެހެއްޓެވެ.

ބަންގްލަދޭޝްގެ ރައީސްކަމަކީ ރަމްޒީ މަގާމެއް ކަމަށް ވިޔަސް ދައުލަތުގެ އެންމެ އިސްވެރިޔާ އަދި ޢަސްކަރިއްޔާގެ ކޮމާންޑާ އިން ޗީފްގެ ހައިސިއްޔަތު އެ މަގާމުގައި އޮވެއެވެ.