އަތޮޅުތަކުގެ ރަށްތަކާއި މާލެއާ ތަފާތު ކުރުން ގެންގުޅޭ ވާހަކަ އަކީ ޒަމާންވީ ވާހަކަ އެކެވެ. އެކަމަކު އަދިވެސް ނިމުމެއް ނެތް ވާހަކަ އެކެވެ. ބައެއް ދުވަސްވަރު އެ ތަފާތުކުރުންތައް އިތުރަށް ބޮޑު ކަމަށް ގަބޫލުކުރެވެ އެވެ. ބައެއް ވެރީން, ބައެއް ވަޒީރުން އެ ތަފާތުކުރުންތައް އަދި މާބޮޑަށް ގެންގުޅޭ ކަމަށް ވެސް ދެކެވެ އެވެ.

އެ ތަފާތުކުރުން އެންމެ ބޮޑަށް ފެންނަ އެއް ދާއިރާއަކީ ތައުލީމީ ދާއިރާ އެވެ. އަތޮޅުތެރޭގެ ސުކޫލެއްގައި ކިތަންމެ ކުލަގަދަ ހަފްލާއެއް އޮތަސް މިނިސްޓަރަކަށް ވަޑައިގެންނެވޭ ގޮތެއް ނުވެ އެވެ. އަބަދުވެސް ވާ ވަރަކީ މިނިސްޓަރުގެ މަންދޫބެއްގެ ގޮތުގައި ސްޓޭޓް މިނިސްޓަރު ނުވަތަ ކޮންމެވެސް ނައިބަކު ފޮނުއްވުމެވެ. އެއީ ތައުލީމީ ދާއިރާގެ ކިތަންމެ ހާއްސަ މުނާސަބަކަށްވިޔަސް ވެހެވެ.

ރެ އަކީ އެފަދަ ރެ އެކެވެ. ތުޅާދޫ ސުކޫލަށް 90 އަހަރު ފުރުމުގެ މުނާސާބާ ފާހަގަކުރުން އޮތީ ރެ އެވެ. ތުޅާދޫ ސުކޫލުގައި ކުލަގަދަ ރަސްމިއްޔާތެއް އޮތެވެ. ޖަލްސާއަށް މުޅި ރައްޔަތް ޖަމާވެފައި އޮތެވެ. ސުކޫލުން ބޭނުންވީ އެޑިއުކޭޝަން މިނިސްޓަރު އިސްމާއީލް ޝަފީއު އެ ރަސްމިއްޔާތު ޝަރަފުވެރިކޮށް ދެއްވުމެވެ. ތުޅާދޫގެ އެދުމަކީ ވެސް އެއީ އެވެ.

ނަމަވެސް ތުޅާދޫއަށް ލިބުނީ މިނިސްޓަރުގެ ބަދަލު ބޭފުޅެކެވެ. ސްޓޭޓް މިނިސްޓަރެކެވެ. މިނިސްޓަރުގެ މަސައްކަތްޕުޅު ބުރަވެ ތުޅާދޫއަށް ވަޑައިގެންނެވުމަށް ދަތިފުޅުވީ އެވެ. ނަމަވެސް މަސައްކަތްޕުޅު ބުރަވެ ތުޅާދޫއަށް ވަޑައިގެންނެވުމަށް ދަތިފުޅުވީ މިނިސްޓަރު ރޭ އިންނެވީ ހިރިޔާ ސުކޫލުގެ އަހަރީ އިނާމު ދިނުމުގެ ޖަލްސާގެ ޝަރަފުވެރި މެހެމާނަކަށް ވަޑައިގެންނެވެ. ދެން އެ މިނިސްޓްރީގައި ތިއްބެވިނަމަ ތިއްބެވިހާ ސްޓޭޓް މިނިސްޓަރުންނާއި ނާއިބުންނާ އެކު އެވެ.

ޝަފީއު، ރޭ ހިރިޔާަގައި އޮތް ރަސްމިއްޔާތުގައި

މާލޭގެ ސުކޫލަކަށް ވަޑައިގަންނަވަން ވީމަ މަސައްކަތްޕުޅު ލުއިވީ އެެވެ. 

ރާއްޖޭގެ ސުކޫލަކަށް 90 އަހަރު ފުރުމަކީ އާދައިގެ ކަމެއް ނޫނެވެ. ރާއްޖޭގެ އެންމެ ދޮށީ ސުކޫލަށް އަދި 100 އަހަރު ނުފުރެ އެވެ. މަޖީދިއްޔާއަށް އެ ދަނީ 100 އަހަރު ފުރޭށެވެ. އެކަމުގެ މުނާސަބާ ފާހަގަކުރުން ދެތީން އަހަރު ކުރީން އެ ވަނީ ފެށިފަ އެވެ. 100 އަހަރު ވަންދެން އެކި ހަރަކާތްތައް އޮތީ ރޭވިފަ އެވެ. އެއީ އެކަން ހާއްސަވީމަ އެވެ. ހާއްސަ ވާން ވެސް ޖެހެ އެވެ. 

ނަމަވެސް ތުޅާދޫ ސުކޫލަށް 90 އަހަރު ފުރުން އެވަރަށް ހާއްސައެއް ނުވި އެވެ. ހާއްސަވީނަމަ އެވަރުގެ އަހަންމިއްޔަތު ކަމެއް އެޑިއުކޭޝަން މިނިސްޓަރާއި އެ މިނިސްޓްރީން ދިނީހެވެ. ހަގީގަތަކީ މިއީ ހުރިހާ މަސައްކަތް އެއްކައިރިކޮށް ވަގުތު ހޯއްދަވައިގެން މިނިސްޓަރު ޝަފީއު ވަޑައިގަންނަވަން ޖެހޭ ރަސްމިއްޔާތެއް ކަމެވެ. އެވަރުގެ ވިސްނުންތެރިކަމާއި އެ އަހަންމިއްޔަތުކަން ދެވެން ނެތް ބޭފުޅަކު އެޑިއުކޭޝަން މިނިސްޓަރަކަށް ތަސައްރަފު ފުދޭއޭ ބުނެވޭނެ ހަމައެއް ނެތެވެ.

ޝަފީއު، ރޭ ހިރިޔާަގައި އޮތް ރަސްމިއްޔާތުގައި

އަނެއްކޮޅުން މިއީ ލަދުވެތި ވެސް ކަމެކެވެ. ތައުލީމީ މުއައްސަސާއަކަށް 90 އަހަރު ފުރުމުގެ ރަސްމިއްޔާތު ޝަރަފުވެރިކޮށްދެއްވަން ވަޑައިނުގެން އެހެން ސުކޫލެއްގެ އަހަރީ އިނާމު ދިނުމުގެ ޖަލްސާއަށް ވަޑައިގަތުމަކީ އެޑިއުކޭޝަން މިނިސްޓަރު ލަދުވެތިވާން ޖެހޭނެ ކަމެކެވެ. ސާފު ބަހުން ވިދާޅުނުވި ނަމަވެސް އަމަލުން އެ ދައްކައިދެވުނީ މާލެއާ އަތޮޅުތެރެ ތަފާތު ކުރުމުގެ މިސާލެކެވެ. އެކަން އެގޮތުގައި ދެމި އޮތް ކަމެވެ. 

މިއީ ނިމުމަކަށް އަންނަން ޖެހޭ ކަމެކެވެ. ހާއްސަވާންވީ މާލެ ނޫނީ އަތޮޅުތެރެ ވެގެނެއް ނޫނެވެ. ހާއްސަ ވާންވީ ފާހަގަކުރެވޭ މުނާސަބަތެކެވެ. އެއީ ހާއްސަ މުނާސަބަތެއް ނަމަ ކޮންމެ ތާކު އޮތްނަމަވެސް އިސްކަން އޮންނަން ޖެހެ އެވެ. މާލެ ވެގެން އަތޮޅުތެރެ ވެގެން ތަފާތު ކުރެވިގެން ނުވާނެ އެވެ. ހަމައެކަނި ރައީސުލްޖުމްހޫރިއްޔާ ވަޑައިގަންނަވާ ރަސްމިއްޔާތުތަކަށް އެކަނި ވަޑައިގަންނަވާ ނޫންނަމަ ނުފޫޒުގަދަ މަޖިލީސް މެންބަރަކު ނޫނީ ވިޔަފާރިވެރިއަކު ނޫނީ ސިޔާސީ ވެރިއަކު ދަންނަވައިގެން ނޫނީ އަތޮޅުތެރޭގެ ސުކޫލެއްގައި އޮންނަ ރަސްމިއްޔާތަކަށް ވަޑައިގެންނެވޭ އެޑިއުކޭޝަން މިނިސްޓަރެއްްގެ ބޭނުމެއް މުޅި ރާއްޖެއަކަށް ނެތެވެ. އެފަދަ މިނިސްޓަރަކު ރަނގަޅީ މާލެއަށް އެކަނި ހާއްސަކޮށް ބެހެެއްޓެވުމެވެ.