މާލެ ވޯޓަރ އެންޑް ސުވަރޭޖް ކޮމްޕެނީ ލިމިޓެޑް، އެމްޑަބްލިޔުއެސްސީން ކަނޑު އަޑީގައި ފެން ޕްލާންޓް ބަހައްޓައިގެން ފެން އުފެއްދުމުގެ މަޝްރޫއުއެއް ފެށުމަށް ތައްޔާރުވަމުން އަންނަކަމަށް އެކުންފުނިން ހާމަކޮށްފިއެވެ.
ދިވެހިރާއްޖޭގެ އަޑާއި ޓީވީއެމް ގުޅިގެން ގެނެސްދޭ "އަހާށޭ ބުނާނަން" ޕްރޮގްރާމްގައި ވާހަކަދައްކަވަމުން ޤައުމީ ފެންކުންފުނީގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވީ ފެން އުފެއްދުމުގެ މަސައްކަތުގެ އައު އީޖާދުތަކާ ކުރިމަތިލުމަށް އެކުންފުނިން ތައްޔާރުވަމުންދާކަމަށެވެ. އެގޮތުން ކަނޑުގެ 500 މީޓަރު އަޑީގައި ފެން ޕްލާންޓް ބަހައްޓައިގެން ފެން އުފެއްދުމުގެ މަސައްކަތް ފެށުމަށް ތައްޔާރުވަމުން އަންނަކަން ފަހްމީ ވިދާޅުވިއެވެ. މި މަޝްރޫޢުގެ މަސައްކަތް ފަށާނީ އަންނަ އަހަރުގެ މެދުތެރޭގައި ކަމަށްވެސް ފަހްމީ ވިދާޅުވިއެވެ.
އޭނާ ވިދާޅުވީ މި މަސައްކަތް ކުރިއަށްދާނީ ނޯވޭގެ ކަމާބެހޭ ތަޖުރިބާކާރުންނާ ގުޅިގެންކަމަށެވެ. އެގޮތުން އެ ފަރާތްތަކަކީ މިކަމުގައި ފާހަގަކޮށްލެވޭ ފަދަ ކާމިޔާބީތަކެއް ހޯދާފައިވާ ބައެއްކަން ފަހްމީ ފާހަގަކުރެއްވިއެވެ.
ފީސިބިލިޓީ، ޓެކްނިކަލީ އަދިއެންވަޔަރުމަންޓަލް ސްޓަޑީ ހަދާ، ހަދާ މިހުރިހާކަމެއް އަޅުގަނޑުމެން މިހާރު އެބަ ގެންދަން. އޭގެ ޢަމަލީ މަސައްކަތް ފެށޭވަރުވާނެ ގައިގަނޑަކަށް އަންނަ އަހަރުގެ ތެރޭގައި. ފުރަތަމަ އަޅުގަނޑުމެން މިހަދަނީ ފައިނޭންޝަލް ފީސިބިލިޓީ ކިހާވަރެއްގެ އިންވެސްޓްމަންޓެއްތޯ ދާނީ
ފެން ކުންފުނީގެ އެމްޑީ ފަހްމީ
ފަހްމީ ވިދާޅުވީ މި މަސައްކަތް ވެގެންދާނީ މިރޮނގުން ރާއްޖޜގައި ކުރެވޭ ނަމޫނާ އަދި ބިޔަ މަޝްރޫޢުއަކަށް ކަމަށެވެ. ކަނޑުގެ 500 މީޓަރު އަޑިން ނަގާ ލޮނަކީ ބޯހޯލް މެދުވެރިކޮށް ނަގާ ލޮނުފެނަށްބވުރެ މީރު އަދި އުފެއްދުމުގެ ހަރަދުތައްވެސް ކުޑަކަމަށް ފަހްމީގެ ވާހަކާގައި ފާހަގަކުރެއްވިއެވެ.
މި މަޝްރޫޢުގެ އިތުރުންވެސް އިތުރު މަސައްކަތްތައް ކުރަން ހުރިކަން ފާހަގަކުރައްވަމުން، ސާފު ބޯފެން ރައްކާކުރުމާއި ތިލަމާލެ ބްރިޖް މެދުވެރިކޮށް މާލެ އަދި ހުޅުމާލޭގެ ފެނުގެ ވިއުގަ އިތުރަށް ތަރައްޤީކުރުމުގެ މަސައްކަތްތައްވެސް ކުރިއަށް އޮތްތަނުގައި ފެނިގެންދާނޭކަމަށް ފަހްމީ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
