ސޫރިއާއާއި އީރާނާއި ދެމެދު މަޝްވަރާތަކުގެ މެދުވެރިއެއްގެ ދައުރު ޕާކިސްތާނުން އަދާކުރުމުގެ ބޭނުމެއް މިވަގުތަށް ނެތްކަމަށް ސޫރިޔާގެ ޚާރިޖީ ވަޒީރު އަސާދް ހަސަން އަލްޝައިބާނީ ވިދާޅުވެއްޖެއެވެ.

ޝައިބާނީ މިހެން ވިދާޅުވީ ޕާކިސްތާނަށް ކުރެއްވި ރަސްމީ ދަތުރުފުޅު ނިންމަވާލައްވަމުންނެވެ. ޝައިބާނީ ވިދާޅުވީ މެދުވެރިއެއްގެ ރޯލު އަދާކުރާނެ ފަރާތެއް ހޯދަން ޖެހިއްޖެ ޙާލަތެއް އައުމުން، ދިމިޝްޤުން އެކަމާ ވިސްނާނެކަމަށެވެ. އަދި އީރާނާއި އެމެރިކާއާ ދެމެދު މެދުވެރިއެއްގެ ރޯލު އަދާކުރުމަށް ޕާކިސްތާނުން ކުރި މަސައްކަތަށް ތައުރީފްކުރައްވައި، ޝައިބާނީ ވިދާޅުވީ ޕާކިސްތާނުން އަދި މިހާތަނަށް ސޫރިޔާއަށް އެފަދަ ހުށަހެޅުމެއްވެސް ހުށަހަޅާފައި ނުވާކަމަށެވެ.

ޝައިބާނީ ވިދާޅުވީ، އިރާނުން ސޫރިޔާގެ ދައުލަތަށާއި އެ ޤައުމުގެ ރައްޔިތުންނަށް ދީފައިވާ ގެއްލުންތަކަށް އެންމެ ފުރަތަމަ އިއުތިރާފް ވާންޖެހޭނެ ކަމަށެވެ. މި ދަތުރުފުޅަކީ ކާމިޔާބު ދަތުރުފުޅެއްގެ ގޮތުގައި ސިފަކުރައްވަމުން ޝައިބާނީ ވިދާޅުވީ، ޕާކިސްތާނާއި ސޫރިޔާއާ ދެމެދު އޮތް ގުޅުން އިތުރަށް ބަދަހިކުރުމަށް ދެ ޤައުމުންވެސް އެއްބަސްވެފައިވާ ކަމަށެވެ. އެގޮތުން، ދެ ޤައުމުގެ ގުޅުނު މިނިސްޓްރީތަކުގެ ކޮމިޝަން އަލުން ހިންގުމަށާއި، ސީދާ ދަތުރުތައް ފެށުމަށާއި، ބިޒްނަސް ކައުންސިލެއް އުފެއްދުމުގެ އިތުރުން އިންވެސްޓްމަންޓް ފޯރަމެއް ބޭއްވުމަށް އެއްބަސްވެވުނު ކަމަށް ވިދާޅުވިއެވެ. މީގެއިތުރުން، ސޫރިޔާއިން ޕާކިސްތާނުގައި ބަހައްޓާ ސަފީރުގެ ފެންވަރު އޭގެ އެންމެ މަތީ ދަރަޖައަށް މަތިކުރުމަށް ނިންމާފައިވާކަންވެސް އޭނާ ހާމަކުރެއްވިއެވެ.

ޕާކިސްތާން، ސާޢޫދީ އަރަބިއްޔާ އަދި ތުރުކީ ގުޅިގެން ހަދާފައިވާ "މައްކާ ޖޮއިންޓް ޑިފެންސް އެގްރީމަންޓް" އާ ބެހޭގޮތުން ސުވާލުކުރުމުން، ސޫރިޔާއިން އެ އެއްބަސްވުން ދިރާސާކުރަމުންދާ ކަމަށާއި، އެ އިއްތިހާދާ ގުޅުމާމެދު އަދި ވަކި ގޮތެއް ނުނިންމާ ކަމަށް ވިދާޅުވިއެވެ. ނަމަވެސް ސޫރިޔާ އަލުން އާރާސްތުކުރުމުގައި ތުރުކީއަކީ މުހިންމު ބައިވެރިއެއްގެ ގޮތުގައި އޭނާ ސިފަކުރެއްވިއެވެ. އިސްރާއީލާ މެދު ވާހަކަދައްކަވަމުން، އިސްރާއީލުން ދެމުންދާ ހަމަލާތައް ހުއްޓުވުމަކީ ސޫރިޔާގެ އެންމެ އިސް އިސްކަންދޭ ކަންތައް ކަމަށާއި، ސޫރިޔާއަކީ މިނިވަން މުސްތަޤިއްލު ޤައުމެއް ކަމަށްވާތީ އެހެން ޤައުމުތަކާއެކު ބާއްވާ ގުޅުންތައް އިސްރާއީލަށް ނިންމުމުގެ ހައްޤެއް ނޯންނާނެ ކަމަށްވެސް ޝައިބާނީ ވިދާޅުވިއެވެ.