ފޮޓޯގްރަފީ އާއި ކޮންޓެންޓް ކްރިއޭޝަންގެ ޢަމަލީ ތަމްރީނު ޕްރޮގްރާމުތައް އަތޮޅުތެރޭގެ ރަށްރަށުގައި ކުރިއަށް ގެންދިޔުމުގެ ފުރުޞަތު އިންފިނިކާ އެކަޑަމީން ކައުންސިލްތަކާއި ޖަމިއްޔާތަކަށް ހުޅުވާލައިފިއެވެ.

މި ސިލްސިލާގެ އެންމެ ފުރަތަމަ ވޯކްޝޮޕް ބާއްވަން ރާވާފައި އޮތީ މި މަހުގެ 28 އިން 31 އަށް ގއ. ކޮނޑޭގައެވެ. އެ ވޯކްޝޮޕަކީ ކޮނޑޭގެ މުޖުތަމަޢަށް ޚާއްޞަކޮށްގެން ފޮޓޯ ނެގުމުގެ ފަންނީ އުކުޅުތަކާއި ޑިޖިޓަލް ކޮންޓެންޓް އުފެއްދުމާ ގުޅޭ ޢިލްމީ ސެޝަންތައް ހިމެނޭ ގޮތަށް ކުރިއަށް ގެންދާ ހަރަކާތެކެވެ.

ެއިންފިނިކާގެ ތަމްރީން ޕްރޮގްރާމެއްގެ ތެރެއިން..

ފޮޓޯގެ ފެންވަރު ރަނގަޅު ކުރުމުގެ ތަމްރީނުތަކުގެ އިތުރުން މީސްމީޑިއާގައި މުޢާމަލާތް ހަރުދަނާ ކުރުމާ ގުޅޭ ސެޝަނެއް ވެސް ހިމެނޭ އިރު އެ ސެޝަން ނަގައިދޭނީ އެ ދާއިރާގެ ތަޖުރިބާކާރެއް ކަމަށް އެ އެކަޑަމީން ބުނެފައިވެއެވެ. މުއައްސަސާތަކާއި ވިޔަފާރިތަކުގެ އިތުރުން ވަކިވަކި ފަރުދުންނަށް ވެސް މި ފުރުޞަތުގެ ބޭނުން ހިފޭނެއެވެ.

ެއިންފިނިކާގެ ތަމްރީން ޕްރޮގްރާމެއްގެ ތެރެއިން..

ޝީޝާ މޯލްޑިވްސް އާއި ރަންފައުންގެ ޕާޓްނާޝިޕާ އެކު ކުރިއަށް ގެންދާ މި ޕްރޮގްރާމުގައި ކޮނޑޭ ކައުންސިލުގެ އެއްބާރުލުން ބޮޑުކަން އިންފިނިކާ އެކަޑަމީން ފާހަގަކޮށްފައިވެއެވެ. ފާއިތުވި ދެ އަހަރު ތެރޭ ރާއްޖޭގެ އެކި ރަށްރަށުގައި މިފަދަ ވޯކްޝޮޕްތައް ކާމިޔާބުކަމާ އެކު ހިންގާފައިވާ އިރު ރަށު ކައުންސިލްތަކާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކާއި ޖަމިއްޔާ ޖަމާޢަތްތަކުގެ ބޮޑު އެހީތެރިކަމެއް ލިބެމުންދާ ކަމަށް އެ އެކަޑަމީން ބުނެފައިވެއެވެ. މާލެއަށް ދަތުރުކޮށް ބޮޑު ޚަރަދެއް ކުރުމުގެ ބަދަލުގައި އަމިއްލަ ރަށުގައި ތިބެގެން ފަންނީ ހުނަރު ލިބިގަތުމުގެ މަގު މި ހަރަކާތްތަކުން ފަހިވެގެންދާ ކަމަށް ވެސް އެ ފަރާތުން ބުނެފައިވެއެވެ.

މި ވޯކްޝޮޕްތަކާ ގުޅޭ އިތުރު ތަފުޞީލު ބޭނުންވާ ފަރާތްތަކުން އިންފިނިކާ އެކަޑަމީގެ ނަންބަރު 7464640 އަށް ގުޅައިގެން މަޢުލޫމާތު ސާފު ކުރެވޭނެއެވެ.