ބަންގްލަދޭޝްގައި ހިމަބިހި ފެތުރުން ކޮންޓްރޯލް ނުވެ، މަރުވާ ކުދިންގެ ނިސްބަތް އިތުރުވެފައިވާކަމަށް އެޤައުމުގެ ކަމާބެހޭ ފަރާތްތަކުން ހާމަކޮށްފިއެވެ.

ބަންގްލަދޭޝްގެ ޑައިރެކްޓަރޭޓް ޖެނެރަލް އޮފް ހެލްތު ސަރވިސަސް އިން އާއްމުކުރި މައުލޫމާތުތަކަށް ބަލާއިރު، އާދިއްތަ ދުވަހުގެ ހެނދުނުން ފެށިގެން ހޯމަ ދުވަހުގެ ހެނދުނާ ހަމަޔަށް އިތުރު 5 ކުއްޖަކު މަރުވެފައިވާކަމަށެވެ. އެއާއެކު މިއަހަރު ހިމަބިހި ޖެހިގެން މަރުވި ކުދިންގެ އަދަދު ވަނީ 938 އަށް އަރާފައެވެ.

ޑައިރެކްޓަރޭޓް ޖެނެރަލް އޮފް ހެލްތު ސަރވިސަސް އިން ވަނީ އެންމެ ފަހުން މަރުވި 5 ކުދިން މަރުވީ ހިމަބިހި ޖެހިގެންކަމަށް ޝައްކުކުރެވޭކަމަށް ކަނޑައަޅާފައެވެ. މި މުއްދަތުގެ ތެރޭގައި ބަލި ޖެހިގެން އަލަށް ރިޕޯޓްކުރި މީހުންގެ އަދަދު 1149 އަށް އަރާއިރު، މިހާތަނަށް ބަލި ޖެހިފައިވާކަމަށް ރެކޯޑްކުރެވިފައިވަނީ 150 ހާހަށްވުރެ ގިނަ މީހުންނެވެ. ބައެއް މީހުން ބަލި ޖެހުނަސް ސިއްހީ ފަރުވާ ހޯދަން ނުގޮސް ތިބެދާނެކަމަށް ބެލެވޭތީ، މި އަދަދު މިއަށްވުރެ އިތުރުވުން ގާތްކަމަށް ރިޕޯޓްތައް ބުނެއެވެ.

ބަންގްލަދޭޝްގެ ސަރުކާރުގެ ތަފާސް ހިސާބުތައް ދައްކާ ގޮތުން ހިމަބިހި ޖެހިގެންނާއި ބަލި ޖެހުނުކަމަށް ޝައްކުވެގެން މިއަހަރުގެ މިހާތަނަށް 131 ހާހަށްވުރެ ގިނަ މީހުން ހޮސްޕިޓަލްތަކުގައި އެނދުމަތި ކުރެވުނެވެ.