ހުޅުމާލޭގެ ދެވަނަ ފިޔަވަހީގައި ދިރިއުޅޭ ކޮންމެ މީހަކަށްވެސް މިހާރު އެންމެ އާންމުކޮށް ފެންނަ އެއް މަންޒަރަކީ، މަގުތަކުގެ ޓްރެފިކަށް ބެލުމެއްނެތި، ހިތުހުރި ތަނަކަށް އުޅަނދުތައް މަޑުކޮށްގެން މުދާ ބާލާ މަންޒަރެވެ. ފިހާރަތަކަށް މުދާ ހިފައިގެން އަންނަ އުޅަނދުތަކާއި، ގޭގެއަށް އެކި ބޭނުންތަކުގައި ސާމާނު އުފުލާ ވޭނާއި ޕިކަޕު ފަދަ އުޅަނދުތައް މަގުމައްޗަށް ހުއްޓައިގެން ތިބުމަކީ މިއަދު އާދައިގެ ކަމަކަށް ވެއްޖެއެވެ.

ޚާއްޞަކޮށް ހެނދުނު ހެނދުނާ ސްކޫލަށް ކުދިން ގެންދާ ވަގުތުތަކުގައްޔާއި، އޮފީސްތަކަށް މީހުން ދާ ބާރުބޮޑު ގަޑިތަކުގައި ފިހާރަތަކަށް ޕާން ފަދަ ތަކެތި ހިފައިގެން އަންނަ ޕިކަޕުތައް، ޑްރޮޕް އޯފް ޒޯން ހުސްކޮށް އޮންނައިރުވެސް މަގުގެ އެއްފަރާތުގައި ބާއްވައިގެން މުދާ ބޭލުމަކީ ނުހަނު ކަންބޮޑުވާންޖެހޭ ކަމެކެވެ. ހުޅުމާލެ ފޭސް ދޭއްގެ ހަލުވިކަމާއެކު އިތުރުވަމުންދާ އާބާދީއާއި، މަގުތަކުގައި ދުއްވާ އަދި ޕާކުކޮށްފައިވާ އުޅަނދުތަކާއި، އުސް އިމާރާތްތަކަށް ބަލާއިރު، މި މަގުތަކަކީ އެކަށީގެންވާ ފުޅާމިނެއް ހުރި މަގުތަކެއްތޯ މިއީ މިއަދު އެންމެންގެ ސުވާލު އުފައްދަމުންދާ ކަމެކެވެ.

މަގުގެ އެއްފަރާތުގައި ޕިކަޕެއް ބާއްވައިގެން މުދާ ބާލަނީ... ފޮޓޯ: ވޮއިސް

މަގުތަކުގެ ހަލަބޮލިކަން ކުޑަކޮށް، އަމާންކަން ޤާއިމުކުރުމަށްޓަކައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ ފޭސް ދޭއްގެ ޓަވަރުތައް ކައިރީ މީހުން އަރާ ފޭބުމަށާއި މުދާ ބޭލުމަށް ޚާއްޞަ "ޑްރޮޕް އޯފް" ޒޯންތަކެއް ކަނޑައަޅައި، ބޮޑެތި އަކުރުން ލިޔެ ފާހަގަކޮށްފައެވެ. ނަމަވެސް، ހިތާމައަކީ މި ތަންތަނުގެ ބޭނުން އެންމެ އެދެވޭ ގޮތުގައި ނުހިފޭ ކަމެވެ.

ގިނަ ބަޔަކު ފާހަގަކުރާ ގޮތުގައި މި ޒޯންތަކުގެ ބޭނުން އެންމެ ބޮޑަށް ހިފަނީ ހަމައެކަނި ވެމްކޯގެ ކުނި އުކާލަން އަންނަ އުޅަނދުތަކެވެ. ފިހާރަތަކަށް މުދާ ހިފައިގެން އަންނަ ގިނަ އުޅަނދުތަކާއި ޓެކްސީތަކުން އަދިވެސް އިޚްތިޔާރު ކުރަނީ ހިތުހުރި ތަނަކަށް މަޑުކުރުމެވެ. މިފަދަ ޢަމަލުތަކުގެ ސަބަބުން ނުރައްކާތެރި ހާދިސާތަކަށް މަގުފަހިވެގެންދެއެވެ.

ޑްރޮޕް އޯފް ޒޯނެއް... ފޮޓޯ: ވޮއިސް

ފޭސް ދޭއްގެ މަގުތައް ނިސްބަތުން ހަނިކޮށް ހުރުމާއެކު، މަގުގެ އެއްފަރާތުގައި އުޅަނދެއް ހުއްޓާފައި އޮންނަނަމަ، ޖެހިގެން އޮންނަ ލޭނަށް ނާރައި ކުރިއަށް ދިއުމަކީ ނުހަނު އުނދަގޫ އަދި ނުރައްކާތެރި ކަމެކެވެ. ހުޅުމާލޭގައި މިހާތަނަށް ހިނގާފައިވާ ނުރައްކާތެރި އެކްސިޑެންޓްތަކުގެ މައިގަނޑު ސަބަބުތަކުގެ ތެރޭގައި، ބާރަށް ދުއްވުމުގެ އިތުރުން، މަގުމަތީގެ ޤަވާއިދުތަކަށް ނުބަލައި ހިތުހުރި ތަންތަނުގައި އުޅަނދު މަޑުކުރުން ހިމެނެއެވެ. އެހެންކަމުން، ޑްރޮޕް އޯފް ޒޯން ބޭނުންކުރުމަކީ މަގުމަތީގެ ލުއިފަސޭހަކަމުގެ އިތުރުން، ފުރާނައާއި މުދަލުގެ ރައްކާތެރިކަމާ ގުޅިފައިވާ ވަރަށް މުހިންމު ކަމެކެވެ.

އެޗްޑީސީން މިފަދަ ޒޯންތަކެއް ކަނޑައަޅާފައިވަނީ މަގުން ދަތުރުކުރާ އާންމުންގެ ސަލާމަތާއި، މުދާ ބާލާ އަދި ވެހިކަލްތަކުން އަރާ ފައިބާ މީހުންގެވެސް ރައްކާތެރިކަމަށްޓަކައެވެ. ސާފުކޮށް ފެންނަން އޮންނަ ޑްރޮޕް އޯފް ޒޯންތައް ދޫކޮށްލުމަށްފަހު، ކަންފަސޭހަކޮށްލައި މަގުމައްޗަށް އުޅަނދުތައް ހުއްޓުމަކީ މަގުމަތީގެ ރައްކާތެރިކަމަށް އެޅިގެންދާ ވަރަށްބޮޑު ހުރަހެކެވެ. އެހެންކަމުން، މަގުތަކަކީ އެންމެންނަށްވެސް އަމާން، ރައްކާތެރި ތަނަކަށް ހެދުމަށްޓަކައި ކަނޑައެޅިފައިވާ ޤަވާއިދުތަކަށް އިޙްތިރާމްކޮށް، ޑްރޮޕް އޯފް ޒޯންތަކުގެ ބޭނުން ފުރިހަމައަށް ހިފުމަކީ ކޮންމެ ފަރުދެއްގެވެސް ޒިންމާއެކެވެ.