ރައީސުލްޖުމްހޫރިއްޔާ ޑރ. މުހައަމަދު މުއިއްޒާ ވެރިކަމަށް ވަޑައިގެންނެވިތާ އަދި ފަސް އަހަރު ހަމަ ނުވާ ކަމަށާ އެހެންކަމުން މިސަރުކާރަށް ފާޑުކިޔުމުގެ ޖާގަ ވާދަވެރި ފަރާތަކަށް އަދި ނޯންނާކަމަށް ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله ވިދާޅުވެއްޖެއެވެ.
ޕީއެންސީން ރޭ ބޭއްވި ޖަގަހަ ޖަލްސާގައި ވާހަކަދައްކަވަމުން އަބްދުއްރަޙީމް ވަނީ، ކުރީގެ ރައީސް އަބްދުالله ޔާމީން އަބްދުލްޤައްޔޫން ސަރުކާރަށް ފާޑުވިދާޅުވެ ދައްކަވަމުންދާ ވާހަކަތަކަށް ވަރުގަދަ ރައްދުތަކެއް ދެއްވާފައެވެ.
އެގޮތުން ވިދާޅުވީ، އަދުގެ ސަރުކާރު ގެނެވުނީ އެތައް ބަޔަކު އެތަކެއް ޤުރުބާނީ ތަކެއް ވެގެން ކަމަށާ، ރައީސް ޔާމީން މިވަގުތު ގޭގައި އިންނެވީވެސް އެ ގުރުބާނީތައް އެބޭފުޅުން ވުމުން ކަމަށެވެ.
ރައީސް ޔާމީންއަކީ ހަމަ ބުއްދި ހުރި މީހެއް ނަމަ، ރައީސް މުޢިއްޒާއެކުގައި ރައީސް މުޢިއްޒުގެ ސަރުކާރު ދަމަހައްޓަން ހުންނާނީ. ބަލަ ރައީސް މުޢިއްޒު ވެރިކަމަށް ވަޑައިގަތީމައޭ ގޭގައި އިންނެވެނީ…
އަބްދުއްރަޙީމް ވިދާޅުވީ، ރައީސް މުޢިއްޒު ކޯޓުތަކަށް ނުފޫޒު ނުފޯރުވާކަން ރައީސް ޔާމީންގެ މައްސަލައިންވެސް އެނގިގެންދާ ކަމަށާަ، މިހާރު މި ގައުމުގައި އަދުލު އިންސާފު ގާއިމުކުރާތަން ފެންނަމުންދާ ކަމަށެވެ.
”މަގުމަތި އަމާންވެއްޖެއޭ، ރައްޔިތުން ތިބީ ހަމަޖެހިގެންނޭ، ތަރައްގީއަކީ ހަމައެކަނި ބުރިޖެއް ނޫން، ހަގީގީ ތަރައްގީއަކީ ހަރުދަނާ އިންސާނީ މުޖުތަމައެއް ބިނާކުރުން، އެމަސައްކަތް ކުރަމުން މި ދަނީ، ފަސް އަހަރެއް ނުނިމެއޭ، އަދި ނެތޭ ފާޑުކިޔޭކަށް ޖާގައެއް، އަޅުގަނޑުމެންގެ ސަރުކާރުން ނެގި ދަރަންޏެއް ނޫނޭ ދެއްކީކީ،"
އަބްދުއްރަޙީމް އިތުރަށް ވިދާޅުވީ މި ސަރުކާރުން ދައްކަމުންދަނީ ރައީސް ޑރ މުޙައްމަދު ނެންގެވި ދަރަނި ނޫން ކަމަށާ، އެއީ ކުރީގެ ރައީސް އިބްރާހިމް މުޙައްމަދު ޞާލިޙް އާއި ރައީސް ޔާމީން ނެންގެވި ދަރަނި ކަމަށެވެ. އަދި އެ ދަރަނި ދައްކަވަމުންދަނީ އިތުރު ދަރަންޏެއް ނުނަންގަވާ ކަމަށާ، ތަރައްގީގެ މަޝްރޫޢުތައް ކުރިއަށް ގެންދަވަނީ ދަރަނި ދައްކަވަމުން ކަމަށެވެ.
މިއަދު ރައީސް މުއިއްޒު ގައުމު ކުރިއަށް ގެންދަވަނީ އެ ދަރަނި ދައްކަމުންކަމަށްވާތީ ސިޔާސީ މައިދާނުގައި އޮތް ބިނާކުރަނިވި ފިކުރު އޮތީ ރައީސް މުއިއްޒުގެ ފަހަތްޕުޅުގައިކަމަށް ވިދާޅުވިއެވެ.
މިއާއެކު އަބުދުއްރަހީމް ވިދާޅުވީ މަތީ މަޖިލިސް ނިމޭއިރު 2028 އަށް އެކުލަވާލާ ރައީސް މުއިއްޒުގެ ކެމްޕެއިން ޓީމް އެކުލަވާލާ ނިންމާނެކަމަށާ، ޕީއެންސީ އޮތީ 2028 ވަނަ އަހަރު ރައީސް މުއިއްޒަށް ކާމިޔާބު ކޮށްދިނުމަށް އެމަނިކުފާނާއެކު ގަދަކޮށް ކަމަށެވެ.
އަދި ރައްޔިތުންގެ މަޖިލިސް ބައިބައި ނުކުރެވޭނެކަމަށާއި މަޖިލިސް އޮތީ ”އެއްކޮށް ބަނދެވިފައިވާ ދަރުބޮނޑިއެއްހެން“ އެކުގައި ރައީސް މުޢިއްޒާއެކު ކަމަށްވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
