ސަރުކާރުގެ ތިން ވުޒާރާއެއް ހިންގަމުން ދިޔަ އިމާރާތުގައި ހިނގި އަލިފާނުގެ ހާދިސާއާ ގުޅޭގޮތުން ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމް ދެއްކެވި ވާހަކަފުޅުތަކާ ގުޅިގެން، އެމަނިކުފާނަށް އެނގިވަޑައިގަންނަވާ މަޢުލޫމާތު ސާފުކުރުމަށާއި އިތުރަށް ބަލަންޖެހޭ ކަންކަން ބެލުމަށް ދިވެހި ފުލުހުންގެ ޚިދުމަތަށް އަންގަވާފައިވާ ކަމަށް ދާޚިލީ ސަލާމަތާއި ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ޕީޕަލްސް ނެޝަނަލް ފްރޮންޓް (ޕީއެންއެފް) އިން ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވަނީ އެ އިމާރާތުގައި ރޯކޮށްލީ ހެކި ނައްތާލުމުގެ ގޮތުން ބަޔަކު ގަސްތުގައި ކަމަށް ތުހުމަތު ކުރައްވާފައެވެ. އަދި އެ ހާދިސާ ހިންގި ފަރާތްތަކުގެ ހެކި ފުލުހުންގެ އަތުގައި އެބަހުރި ކަމަށްވެސް އެމަނިކުފާނު ވިދާޅުވިއެވެ.
ފުލުހުންނަށް ރަނގަޅަށް އެނގޭ ތި ގްރީން ބިލްޑިން ރޯކޮށްލި، އެކަމުގައި އުޅުނީ ކާކުކަން އެނގޭ. މުއިއްޒާ ކިހާ ވަރެއްގެ ގާތް މީހެއްކަން އެނގޭ. ފުލުހުންގެ އަތުގައި އެބައޮތް އެ މައުލޫމާތު. ބޭނުމެއްނުވޭ ފިޔަވަޅު އަޅާކަށް.. އެހެން ނަމަވެސް ފުލުހުން ވެސް ގަބޫލުކުރަންވާނެ އެނގޭތޯ ހާލަތު ބަދަލުވަނީ މި. ހާލަތު ބަދަލުވެފައި ދެން ވެރިކަން ބަދަލުވެއްޖެއްޔާ ފުލުހުން އޭގެ ޒިންމާ ނަގަން ނުޖެހޭނެ ގޮތަކީ ނެތް ގޮތެއް. މިކަހަލަ ބޮޑެތި ކަންތައްކޮށްފައި މާލެ ހުޅުދާންކޮށްފައި މިކަމުގައި މައްސަލަ ހުރެގެން ފިޔަވަޅު ނާޅާ ދޫކޮށްފައި."
ރައީސް ޔާމީން
އެކަމާ ގުޅިގެން އެކްސްގައި ކުރެއްވި ޕޯސްޓެއްގައި އިހްސާން ވިދާޅުވީ، ސަރުކާރުގެ 3 ވުޒާރާއެއް ހިންގަމުންދިޔަ އިމާރާތްތައް އަންދައިގެން ގޮސްފައިވާ މައްސަލައާ ގުޅިގެން ދިވެހި ފުލުހުންނާއި އެކުވެރި ޤައުމުތަކުގެ މިފަދަ ކަންކަން ތަހުޤީގުކުރާ މާހިރުން ގުޅިގެން ކުރި ތަހުގީގުން ހޯދިފައިވަނީ އެ ހާދިސާ ހިނގާފައިވަނީ ކަރަންޓު ނަރުތަކުގައި ރޯވެގެންކަމަށް ކަމަށެވެ.
އަދި އެއްވެސް މީހަކަށް މިމައްސަލާގައި ޖިނާއީ ތުހުމަތެއް ކުރާނެ އެއްވެސް ހެއްކެއް ތަހުގީގަށް ލިބިފައިނުވާކަމަށް ފުލުހުން މައުލޫމާތު ދީފައިވާ ކަމަށްވެސް ވިދާޅުވިއެވެ.
ނަމަވެސް އެ އިމާރާތްތަކުގައި އަލިފާން ރޯކޮށްލާފައިވާ ކަމަށާއި އެކަން ކުރި މީހާވެސް ފުލުހުންނަށް އެނގޭކަމަށް މުތުލަގުކޮށް ރައީސް ޔާމީން ވިދާޅުވެފައިވާ ކަން ފާހަގަކުރައްވައި އިހްސާންވަނީ އެކަން ސާފުކުރެއްވުމަށް ފުލުހުންނަށް އެނގެވިކަމަށް ވިދާޅުވެފައެވެ.
”އެހެންކަމުން މިމައްސަލާގައި އެމަނިކުފާނަށް އެނގިވަޑައިގަންނަވާ މަޢުލޫމާތު ސާފުކުރައްވައި، ތަހުޤީގުގައި އިތުރަށް ބައްލަވަންޖެހޭ ކަމެއްހުރިނަމަ އެކަން ބެއްލެވުމަށް ދިވެހި ފުލުހުންގެ ޚިދުމަތަށް އަޅުގަނޑުވާނީ ދަންނަވާފައެވެ. އަދި ހަމަ އެއާއެކު ދިވެހި ފުލުހުންގެ މައްޗަށް ކުރީގެ ރައީސުލްޖުމްހޫރިއްޔާ ކުރެއްވި ތުހުމަތު ތަހުޤީގުކޮށް ދެއްވުމަށްއެދި ނޭޝަނަލް އިންޓެގްރިޓީ ކޮމިޝަނަށްވެސް އަޅުގަނޑުވާނީ ދަންނަވާފައެވެ.“ އިހްސާން ވިދާޅުވިއެވެ.
ހައުސިން މިނިސްޓްރީއާ އެކު ސަރުކާރުގެ ތިން ވުޒާރާއެއް ހިންގަމުންދިޔަ އޮފީސް އިމާރާތުގައި ރޯވީ 12 ޑިސެމްބަރު 2024ގައެވެ. މި އަލިފާނުގެ ހާދިސާގައި މުޅި އިމާރާތް އެއްކޮށް ވަނީ އަނދާފަ އެވެ.
Advertisement
This content is created and paid for by advertisers and does not involve Voice Journalists
