ހުޅުމާލޭގައި އިމާރާތްކުރުން ހުއްޓިފައި އޮތް ކޭޕާކް ރެޒިޑެންސްއިން ޔުނިޓް ގަނެ ގެއްލުން ލިބުނު ފަރާތްތަކުން އިންސާފު ހޯދުމަށް ސިވިލް ކޯޓަށް މިއަދު މައްސަލަ ހުށަހަޅައިފިއެވެ.

ގެއްލުން ލިބުނު މީހުންގެ ޤާނޫނީ ވަކީލުންގެ ގޮތުގައި ޙަރަކާތްތެރިވާ އެޑްވޮކެސީ ޗެމްބާޒްގެ ވަކީލް ހަސަން ފަލާހު ވިދާޅުވީ ކޯޓަށް ދިޔަ ނަމަވެސް ރައްޔިތުންނަށް ލިބުނު ގެއްލުމަށް ދައުލަތުގެ ފަރާތުން އަވަސް ހައްލެއް ލިބުން އެއީ އެންމެ ބޮޑު އެދުން ކަމަށެވެ. އެގޮތުން، ޔުނިޓް ގަތް ފަރާތްތަކުން ހުށަހެޅި އެއްވެސް ޝަކުވާއަކަށް މިހާތަނަށް ކުރިއެރުމެއް އައިސްފައި ނުވާ ކަމަށް އެ ލޯ ފާމުން ފާހަގަކޮށްފައިވެއެވެ.

ކޭޕާކް ޕްރޮޖެކްޓް ތަރައްޤީކުރި ކުންފުންޏާ ބައްދަލުކޮށް ހައްލެއް ހޯދުމަށް ވެސް މަސައްކަތް ކުރި ކަމަށާއި ނަމަވެސް އެ ކުންފުނި މިހާރު ވުޖޫދުގައި ނެތުމުން މުޢާމަލާތްކުރެވެން އޮތް ހުރިހާ ދޮރެއް ބެދިފައިވާ ކަމަށް އެޑްވޮކެސީ ޗެމްބާޒުން ބުނެފައިވެއެވެ.

މި ޕްރޮޖެކްޓް ފެށީ ދެކުނު ކޮރެއާ ކުންފުންޏެއްގެ ނަމުގައި ނަމަވެސް ފަހުން އެނގުނު ގޮތުގައި މުޅި ކަންތައް ރާވައި ހިންގީ ހަންބޯ ކުންފުނީގެ މައިނޯރިޓީ ހިއްސާދާރު ހަސަން މަމްދޫހު (މަންޑޭ) ކަމަށެވެ. މަންޑޭ ވަނީ އެތައް ބަޔަކަށް އޮޅުވާލައި ޔުނިޓްތައް ވިއްކައި ބައެއް ޔުނިޓް އެއް ފަހަރާ ދެ ތިން ފަރާތަކަށް ވެސް ވިއްކާފައެވެ.

ކޭޕާކް ހިޔާނާތްތެރިޔާ މަންޑޭ

ޓެކުމާއި މަކަރާއި ހީލަތް ހެދުމާއި މަނީ ލޯންޑްރިންގެ ކުށް ސާބިތުވެ ކްރިމިނަލް ކޯޓުން ވަނީ މަންޑޭގެ މައްޗަށް ޖުމްލަ 397 އަހަރާއި ހަ މަހާއި 20 ދުވަހުގެ ޖަލު ހުކުމެއް އިއްވާފައެވެ. މި ޖަރީމާގައި ބައިވެރިވި ޖައިޝާން ސައީދުގެ މައްޗަށް ވެސް 159 އަހަރާއި ފަސް މަހާއި 14 ދުވަހުގެ ޖަލު ހުކުމެއް އައިސްފައިވެއެވެ. ހަމައެއާ އެކު، މަނީ ލޯންޑްރިންގެ ކުށް ސާބިތުވުމުން އެފްޑަބްލިއު ރެޒިޑެންސްގެ އެޕާޓްމަންޓަކާއި ޕާކިން ސްލޮޓެއް ދައުލަތަށް ނަގާފައިވެއެވެ.

ޖިނާއީ ހުކުމްތައް އައި ފަހުން އެޗްޑީސީން ވަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ހަވާލުކޮށް ޔުނިޓްތައް ނިންމައި ހަވާލުކުރަން ފަށާފައެވެ. އެހެން ނަމަވެސް، އަސްލު އެއްބަސްވުމުގައި ހިމެނުނު ގިނަ ކަންކަން އުނިވެފައިވާ ޔުނިޓްތަކެއް ހަވާލުކުރަމުންދާތީ އެޕާޓްމަންޓް ގަތް ފަރާތްތައް މާލީ ގޮތުންނާއި ނަފްސާނީ ގޮތުން ބޮޑު ބުރައެއް އުފުލަމުންދާ ކަމަށް އެ ފަރާތްތައް ތަމްސީލުކުރާ ލޯ ފާމުން ބުނެފައިވެއެވެ.