ދޯންޏެއް އަރިއަޅާލައި މުދާތައް ކަނޑަށް ދޫވެފައިވާތީ ސަމާލުކަން ދިނުމަށް އިލްތިމާސްކޮށްފި
މާލެއިން ފުރައިގެން ކ.ކަގިއަށް ދަތުރުކުރި "ސަމޯރާ-02" ނަމަކަށް ކިޔާ ދޯނި އެއްފަރާތައް އަރިވެ، ދޯނީގައި ހުރި މުދާތަށް ކަނޑުތެރެއަށް ބޭރުވެފައިވާތީ އެ ސަރަޙައްދުން ދަތުރުކުރާ އުޅަނދުފަހަރުން ސަމާލުކަން ދިނުމަށް އެމްއެންޑީއެފް އިން އިލްތިމާސްކުރަމެވެ.
މިއަދު ހެނދުނު 10:15 ހާއިރު މާހަލުތެރެއިން ހިނގި މި ހާދިސާގެ މަޢުލޫމާތު އެމްއެންޑީއެފް ކޯސްޓްގާޑުގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބުމާއެކު އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންގެ ސިފައިން ޑައިވަރުންނާއެކު ވަނީ އެހީތެރިކަން ފޯރުކޮށްދޭން ފަށާފައިވާކަމަށް މައުލޫމާތު ދެއްވައެވެ. އަދި މި ތަކެތި ނެގުމުގެ މަސައްކަތް ދޯނީގެ ވެރިފަރާތާއި އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންގެ ސިފައިން ގުޅިގެންދަނީ ކުރަމުންނެވެ.
މި ހާދިސާގައި ދޯނިން ކަނޑަށް ބޭރުވެފައިވަނީ މައިގަނޑު ގޮތެއް ގައި ލަކުޑި ފިލާ ބަންޑެލިއެވެ. މިތަކެތި ފެންމަތިން އޮޔާ ދާތީވެ، މިސަރަހައްދުން ދަތުރު ކުރައްވާ ފަރާތްތަކުން މިކަމަށް ޚާއްޞަ ސަމާލުކަމެއް ދެއްވުމަށާއި، އަދި ރޭގަނޑު ދަތުރުކުރައްވާ އުޅަނދު ފަހަރުތަކުން މިކަމަށް އިތުރަށް ސަމާލުކަން ދެއްވުމަށް އެމްއެންޑީއެފް އިން އިލްތިމާސްކުރަމެވެ.
މި ހާދިސާ ހިނގި އިރު ދޯނީގައި ތިބީ 4 މީހުންނެވެ. އޭގެ ތެރޭގައި ހިމެނެނީ ދިވެއްސަކާއި 3 ބިދޭސީންނެވެ. މިއިން އެއްވެސް މީހަކަށް އަނިޔާއެއް ލިބިފައިވާކަމުގެ ރިޕޯޓެއް ލިބިފައެއް ނުވެއެވެ.
Advertisement
This content is created and paid for by advertisers and does not involve Voice Journalists