"ކިޔާލަމާ"ގެ "ރޯޒީ ދަ ރެއިންޑްރޮޕްސް އެޑްވެންޗާ: ދަ ވޯޓާ ސައިކަލް" ގެ ނަމުގައި އައު ވާހަކަފޮތެއް ޝާއިއުކޮށް ނެރެފިއެވެ. 

މައުލޫމާތުން ފުރިގެންވާ މި ފޮތަކީ ދިވެހި ޝާޢިރު، ފާތިމަތު އަމީރާ އޮސްމަނަގިޗް ލިޔެ، ދިވެހި ކުރެހުންތެރިޔެއް ކަމަށްވާ މަރިޔަމް މަންހަލް އަޖީބު އިލަސްޓްރޭޓު ކޮށްފައިވާ ކުޑަކުދިންނާ ގުޅޭ ހިތްގައިމު ކުރެހުންތައް ގެނެސްދީފައިވާ ފޮތެކެވެ. 

ފޮތާއި ގުޅިގެން 'ވޮއިސް' އަށް މަޢުލޫމާތު ދެއްވަމުން އަމީރާ ބުނީ، މި ވާހަކައިގެ މަގުސަދަކީ ތުއްތު ކުދިންގެ ޝައުގުވެރިކަން ވަށައިގެންވާ މާހައުލަށް އަނބުރާލައި، ސްކޫލުގައި ކިޔަވާ ވޯޓާ ސައިކަލަށް ތުއްތު ދުވަސްވަރުން ފެށިގެން އަހުލުވެރިކުރުވައި، ދަސްކޮށްދިނުން ކަމަށެވެ.

އަދި ތުއްތު ސިކުނޑިތަކަށް އެކުދިންގެ މާޙައުލުގައިވާ އަޖާއިބުކުރަނިވި ކަންތައްތައް ޅައުމުރުގައި ދަސްކޮށްދީ، އަހުލުވެރިކުރުވުމަށް މިފޮތުގެ އެހީގައި ބެލެނިވެރިންނަށް ފަސޭހަވެގެންދާނެ ކަމަށް އަމީރާ ގަބޫލުކުރެއެވެ. 

މިފޮތް މިހާރު މާލެއާއި އައްޑުއިން ވަގުތުން ލިބެން ހުރިއިރު ފޮތެއްގެ އަގަކީ 220ރ. އެވެ. ފޮތް އޯޑަރުކުރުމަށް ކިޔާލަމާގެ އިންސްޓަގްރާމު ޕޭޖަށް ޒިޔާރަތްކުރުމަށްފަހު ވަގުތުން ގަނެވޭނެ ކަމަށް އަމީރާ ބުނެފައިވެއެވެ.

އަދި މާލެއާއި ހުޅުމާލެ އަދި އައްޑޫގެ އެކި ހިސްބުތަކަށް މި ފޮތް ހިލޭ ޑެލިވަރީ ކުރުމުގެ އިންތިޒާމުވެސް ހަމަޖެހިފައިވާ ކަން އޭނާ ފާހަގަކޮށްފައިވެއެވެ.

މީގެ އިތުރުން، ރާއްޖޭގެ ހުރިހާ ކަންކޮޅުތަކުން ފޮތް ލިބޭނެ އިންތިޒާމުވެސް ވަރަށް ކައިރި މުސްތަޤުބަލެއްގައި ހަމަޖެހިގެންދާނެ ކަމަށާ، އެކަމާއި ގުޅޭ އެންމެ ފަހުގެ ޚަބަރުތައް ކިޔާލަމާގެ އިންސްޓަގްރާމް ޕޭޖުން ލިބިގެންދާނެ ކަމަަށް އަމީރާ ބުންޏެވެ. 

https://instagram.com/kiyaalamaa

އަމީރާ އިތުރަށް ބުނީ، ރާއްޖެއިން ބޭރުން ފޮތް ގަންނަން ބޭނުންވާ ފަރާތްތަކަށް އެމެޒަން މެދުވެރިކޮށްވެސް ފޮތް ގަނެވޭނެ ކަމަށާ، އެމެޒަން ގައި 12$ އަށް ފޮތް ލިބެން ހުންނައިރު 6$ އަށް މިފޮތުގެ އީބުކް ވެސް އެމެޒަން އިން ލިބެން ހުންނާނެ ކަމަށެވެ. 

"އަޅުގަނޑުމެން، ކިޔާލަމާ ޓީމުން އުއްމީދުކުރަނީ ރާއްޖެއާއި ރާއްޖެއިން ބޭރުންވެސް ވީހާވެސް ގިނަ ތުއްތު ކުދިންނަށް 'ރޯޒީ ދަ ރެއިންޑްރޮޕްސް އެޑްވެންޗާ ތަޖުރިބާ ކޮށްލެވުމުގެ ފުރުސަތު ލިބުމަށް" އަމީރާ ބުންޏެވެ. 

ކިޔާލަމާއިން މިހާރު މަސައްކަތް ކުރަމުން އަންނަނީ, ކުޑަކުދިންގެ ސިކުނޑިތައް ސައިންސާއި، ވަށައިގެންވާ މާޙައުލަށް މިސްރާބު ޖަހާނެ މިފަދަ އިތުރު ފޮތްތައް ދިވެހި އަދި އިނގިރޭސިން ތައްޔާރުކޮށް ބާޒާރަށް ގެނެސްދިނުމަށް ކަން އަމީރާ ފާހަގަކުރެއެވެ.